Ulandaan 6 - Uwumbɔr aagbaŋ

¹ M kan dulnyaa wee ni ke ŋibamɔn gangal sakpiin le bi.

² Uwumbɔr ga ŋmaa tii unii ubaa ŋimombil ni liyimbil, ni liwangol; mbamɔn, u ga ŋmaa tii u tiwan ni mɔmɔk u ban na, le kaan tee cha u ji tiwan ngbaan aamɔɔn. Unii uken le ga nan ji ni. Ni ye fam la, le kaa ŋan.

³ Uja ga ŋmaa li kpa mbim nkub, ki yunn pam, tɔ, u gee u yunn dulnyaa ni ba pu, u yaa kaa jin waamɔɔn, kaa kan likpuul li nyuun na kan, ubo u kpo una aaponn ni ki nyan ni na soor u.

⁴ Ubo ngbaan aadam aa kpa tinyoor; u gir koo mbɔmbɔɔn ni la, le bi suln u bɔr.

⁵ Waa kan nwiin aawiihn, le kaa nyi limɔfal aah bi pu na.

⁶ Tɔ, u mu tee kan nin chee u ga fuur na, ki jer uja u jin ŋibin ŋichur ŋilee ki mu aa jin limɔfal aamɔɔn na; ba pu? bi mɔmɔk cha libubaan ni la.

⁷ Unii tun waatuln mɔk ke u kan nibaa ki ji la, le ki mu aan ŋmaa kan bab.

⁸ Ulandaan aa soor ujɔr. Ugiin aah ga ŋmaa ŋa pu ki li bi dulnyaa wee ni na, naa kpa u tinyoor tibaa.

⁹ Ni ye fam la; ni bi ke unii aah san dii libuln pu ke u chuu li na la. Cha aanimbil gbiin saah kpa ni na, ki taa muk aabaa n‑yoonn mɔmɔk ke aa ki kan kpee.

¹⁰ Tiwan ni mɔmɔk ŋani na nan kan naasisii n‑yoonn mu jer na la, le ti mɔmɔk nyi ke unii aan ŋmaa kpak unii u pɔɔ jer u na kinikpakpak.

¹¹ N‑yoonn mumɔk aa bi kpak na, le ni moo ŋani si yɔli, kaa ter si.

¹² Unii aan ŋmaa bee tiwan ni ŋan tii unibɔn, kimɔfageŋ ki kaa kpa tinyoor tibaa ki pinni jer ke kijunjuŋ na ni. Unii aan ŋmaa bee tiwan ni ga ŋa dulnyaa wee ni, waakun aapuwɔb na.