Ulandaan 5 - Uwumbɔr aagbaŋ

Sɔŋ aasui ki nin puu tipuur

¹ Li nyi saah chaa Uwumbɔr Aadichal ni pu na. Aa yaa buen nima ke aa ti bae kan, ni ŋan ki jer bijɔrb bi kaa ŋmaa ganni tiwan ni ŋan na, ni ni kaa ŋan na ponn ni aah chaa ke bi ti toor kitork pu na.

² Dakl lik waahr ki nin len, ki taa puur tipuur tii Uwumbɔr fam fam. U bi paacham, le aa bi taab, kina pu na, taa len ki jer saah kpa pu na.

³ Aa yaa dak ilandak sakpen kan, aa daŋni tidaŋ sakpen la. Le aa yaa len tibɔr sakpen kan, aa ga ti len kijɔrk aabɔr.

⁴ Kina pu na, aa yaa puu tipuur tii Uwumbɔr kan, li joo ti gbin gbin. Waa kpa ujɔr aayoonn. Ŋa saah puu ke aa ga ŋa pu na.

⁵ Aa yaa kaa puu tipuur kpala kan, ni soor ni ke aa puu kaa ŋa saah puu pu na.

⁶ Taa cha aabaa aamɔboln di si koon titunwanbir ni, ki taa bui Uwumbɔr aatotoor ke aa ba ŋani yaansara la. Ba ŋa aa ban Uwumbɔr aaŋuul fii aa pu ki bii tiwan ni aa di aaŋaal ŋa na?

⁷ Aa yaa daŋni tidaŋ pu na, ki tun tuyɔlyɔl pu na, ki len tibɔr sakpen pu na kan, aa li san Uwumbɔr.

Limɔfal aa kpa tinyoor tibaa

⁸ Aa yaa kan ke biyidam muk bigiim, kaa tii bi baabamɔn, ni tiwan ni ŋan na kan, taa cha ni ŋa si iwaan. Uninkpel mɔmɔk aah bi unii u aataab na le kiir u. Le unii u jer bimɔk bilee na kii bi.

⁹ Baah chee tijikaar ti na pu le ubɔr bi.

¹⁰ Aa yaa gee ŋimombil kan, saan bab ŋi daalbaadaal. Aa yaa ban ke aa li kpa kan, saan ŋmaa kan saah ban pu na mɔmɔk. Ni ye fam la.

¹¹ Liwangol li aa moo kani li na, kina le aa kpa binib pam ke aa kpiin. Tinyoor ti aa kpa na le ye ke aa nyi ke aa kpa liwangol.

¹² Nibaakan, unii u tun na ga li kpa ki ji, nibaa mu kan, waan kan ki ji. Tɔ, u mu tee geeni kinyeek. Uwankpadaan ma kan, u kpa sakpen u ji, le kaa tee geeni kinyeek, ki dɔ dak ilandak.

¹³ Kiwanbiik sakpeŋ ki m kan dulnyaa wee ni na sɔ: binib bilni ŋimombil ki kii n‑yoonn mu bi ga nan ban ŋi na la,

¹⁴ le ki nan lann ŋi kinimbɔŋ kibaa ni, kaa nan ki kpa nibaa baabim nan nab ni pu.

¹⁵ Ti nya dulnyaa wee ni ke taah koo ni u ponn ni, kaa joo nibaa pu na la. Taah tun lituln li mɔmɔk na aan nan cha ti li joo nibaa cha.

¹⁶ Naa ŋan. Taah dan pu na, kina le ti ga gir buen. Ti tun, le ki pɔɔni tibaa ke ti chuu libuln. Tɔ, ba aan ti kani?

¹⁷ Ti bi limɔfal lee ni, mbɔmbɔɔn ni mpombiin ni la, le ni muk timi, le timi aaŋuul fii, le ti buŋni.

¹⁸ Maah kan pu na sɔ: tiwan ni ŋan ke unii ŋa na le ye ke u ji ki nyu, ki li mɔɔni waah tun ki kan pu kimɔfageŋ ki Uwumbɔr di tii u na ni. Unibɔn aadoon le na.

¹⁹ Uwumbɔr yaa tii unii likpal ni liwangol ki cha u ji naamɔɔn kan, u li dooni u, ki ji waah tun ki kan pu na aamɔɔn. Ni ye Uwumbɔr aapiin la.

²⁰ Uwumbɔr aah tii u nsan ke u li kpa mpopiin na, waa ki jaa waah ga yunn dulnyaa wee ni pu na.