Ulandaan 4 - Uwumbɔr aagbaŋ

¹ Le m ki fenn lik beebee aatuln li tun dulnyaa wee ni na. Baah muk binib bi na nan wii la, le ubaa aa ter bi. Binib bi muk bi na nan kpa mpɔɔn la, le ubaa aa nan ter bi.

² M kpa lipiipoln binib bi kpoi kaa ki bi na pu. Bi yaan soor binib bi kaa kpo na.

³ Binib bi yaan ŋan sakpen na, le ye baah kaa kee ma bi na. Bima aah kaa kee kan dulnyaa wee ni aabeebee aatuln na, bi yaan soor.

⁴ M nan ki bee naah ŋa pu aan binib nyani kitotoŋ sakpen ke bi li kpa na; nima le ye ke bi kpa biŋeen aatɔtiib pu lipiipoln. Tɔ, ni mu ye fam la. Ni bi ke unii aah san dii libuln pu na la.

⁵ Bi len le ke unii yaa bɔɔb uŋaal ki ka ki ti kpo nkon kan, u ye ujɔr la.

⁶ Nibaakan ti gbii kina; tɔ, aa yaa kpa siib, aan saalan dɔ suuna kan, ni soor ni ke aa li joo aaŋaal ilee mɔk yanni n‑yoonn mɔmɔk ke aa chuu libuln.

⁷ M ki kan tiwan nibaa dulnyaa wee ni, le ni mu ye fam.

⁸ Uja ubaa le bi ki koo ubaa. Waa kpa bo, kaa kpa naal, bee kpel mu, le ki mu tee tun lituln n‑yoonn mɔmɔk. Unimbil aa nan gbiin liwangol li u kpa na. U bi tun tii ŋma, kaa tii ubaa mpopiin? Nimina mu ye fam la, kina aabimbin ye falaa la.

⁹ Bilee ŋan jer ubaa; bi yaa kpaan kan, bi ga tun ki nyan tinyoor.

¹⁰ Ubaa yaa lir kan, uma na ga fiin u. Tɔ, unii yaa bi ubaa ki ti lir kan, naa ŋan kpala, ba pu? ubaa aa bi u chee ki ga ter u.

¹¹ Tiwoor yaa bi kan, bilee ga doon ki bub tɔb le biwon toŋ; tɔ, unibaan ga ŋa kinye tiwoor taa ku u?

¹² Binib bilee ga ŋmaa nyaŋ kijaak ki ba ga nyaŋ unibaan na. Baah paa ŋŋmin mu ki gir mil mu na aan ŋmaa kii mala.

^13-14 Unii ga ŋmaa nya igiin ni ki ti kpaln waatiŋ aabɔr, bee u ga ŋmaa nya kiyondiik ni ki ti kal libɔrjal pu. Tɔ, waaninkpir ni kan, u kpaln ujɔr le kaan ki ŋun isur, unachipɔɔn u ye ugiin ki tee kpa nlan na soor u.

¹⁵ M nan kal dakl binib bi mɔmɔk bi dulnyaa wee ni na aabɔr, le ki kan ke bi ponn ni nibaa chee unachipɔɔn bi ki ga ji nnaan.

¹⁶ Ubɔr aah joo binib bi na gee bi li wiir ba pu, u yaa nan kpo kan, ubaa aan teer ki pak u waah nan tun pu na pu. Ni ye fam la. Ni bi ke unii aah san dii libuln pu na la.