Ulandaan 3 - Uwumbɔr aagbaŋ

Tiwan mɔmɔk aayoonn bi la

¹ Tiwan ni mɔmɔk ŋani dulnyaa wee ni na ŋani n‑yoonn mu Uwumbɔr ban na la.

² U siin timar aayoonn, le ki siin nkun mu aayoonn, tiwan aabum aayoonn bi la, le tiwan aaŋɔm mu aayoonn bi,

³ tiwan aakum aayoonn bi, le tiwan aatem aayoonn mu bi, tiwan aabern aayoonn bi, le tiwan aamaam aayoonn mu bi.

⁴ U siin mpombiin aayoonn, le mpopiin mu aayoonn bi, ikpowiil aayoonn bi, le liwaal aayoonn mu bi,

⁵ ŋitakpal aakuun aayoonn bi, le ŋitakpal aayaan aayoonn mu bi, n‑yoonn mu aa ga bub unii na bi, le n‑yoonn mu saan bub u na mu bi.

⁶ U siin n‑yoonn mu aa ga di ban kan tiwan na, le ki siin n‑yoonn mu tiwan ga wɔŋ na, n‑yoonn mu aa ga li ban bilni na bi, le n‑yoonn mu aa ga li yoor mae na mu bi,

⁷ n‑yoonn mu aa ga li dar kar na bi, le n‑yoonn mu aa ga li ŋal na mu bi, n‑yoonn mu aa ga li ŋmin na bi, le n‑yoonn mu aa ga li joo len tibɔr na mu bi.

⁸ U siin ngeehm aayoonn, le ki siin kinanaŋ mu aayoonn, butɔb aayoonn bi, le nsuudoon mu aayoonn bi.

⁹ Timi aatun ŋee mɔmɔk aanyoor ye tilati?

¹⁰ M nyi Uwumbɔr aah di litusakpeln li tun timi na.

¹¹ U siin tiwan mɔmɔk aayoonn dee dee la. U cha ti kpa lineen ke ti li nyi n‑yoonn mu choo na aabɔr, le kaa tee tii timi nsan ke ti bee waah tun pu na aatataa mbamɔm.

¹² Le m bee ke buyoonn ti laa bi dulnyaa wee ni na, ti li kpa mpopiin ki tun taah ga ŋman pu na.

¹³ Ti mɔmɔk li ji ki nyu, ki li mɔɔni taah tun ki kan tiwan ni na pu. Ni ye Uwumbɔr aapiin la.

¹⁴ M nyi ke tiwan ni mɔmɔk Uwumbɔr ŋani na aan li kpa ndoon. Saan ŋmaa di nibaa kpee ni pu, kan ŋmaa bar ni pu. Uwumbɔr ŋani kina ke binib li pak u la.

¹⁵ Tiwan ni mɔmɔk ŋa na, ni tiwan ni ga ŋa na, puun ŋa n‑yoonn mu jer na. Uwumbɔr cha tiwan chachaan ngbaan ŋani le ki gir ŋani.

Beebee aatuln li bi dulnyaa ni na

¹⁶ Tiwan ni ki kpee na le ye ke m kan ke ibamɔn ni lituln li ŋan na aa ba ga li bi nin chee dulnyaa wee ni na, mbiin le bi nima.

¹⁷ Le m bui mbaa ke, “Uwumbɔr ga ji binib bi aabimbin ŋan na, ni titunwanbirdam tibɔr la, ba pu? tiwan mɔmɔk, ni lituln mɔmɔk, ga ŋa n‑yoonn mu u siin ni na la.”

¹⁸ Le m di doo ke Uwumbɔr bi tɔŋni timi ke u mɔk timi ke unibɔn aa jer kiwakork.

¹⁹ Naah ye pu na le ye ke unibɔn aadoon ni kiwakork aadoon ye mubaa la. Unibɔn ga kpo, le kiwakork mu ga kpo. Ni mɔmɔk ye tiwanfuurkaan baan la. Limɔfal aa kpa tataa unibɔn ni kiwakork mɔk chee, kina pu na, nibaa aa jer niken.

²⁰ Ni mɔmɔk cha libubaan ni la, nima le ye titan ni. Ni mɔmɔk nan kpaan nyan ni nima la, le ki ki ga kpaan gir nima chee.

²¹ Ubaa aan ŋmaa bee ke unibɔn aawiin le chaa paacham le kiwakork yaan chaa taab.

²² Le m bee nima chee ke taah ga ŋa pu aan ni li ŋan tii timi na, le ye ke ti li mɔɔni taah tun ki kan tiwan ni na pu. Taan ki ŋmaa ŋa nibaa kpee. Nsan mubaa aa bi ki ga ŋmaa cha ti bee tiwan ni ga ŋa, timi aakun aapuwɔb na.