Ulandaan 2 - Uwumbɔr aagbaŋ

¹ M nan ŋa nlandak ke m ji mmɔɔn ki lik ke ni kpa mpopiin aan naa kpa, le ki kan ke ni mu ye fam la.

² M nan kan ke tilaar ye kijɔrk la. M nan bee ke mmɔɔn aa tii unii tinyoor tibaa.

³ Maah nan neen ke m kan nlan sakpen pu na, le m nan piin ki nyu ndaan ke nsui li piin. M nan dak ke kina le unii ga ŋmaa ji waamɔfageŋ kimina kitiŋ kee pu.

⁴ M nan ŋa tiwankpaan pam. M nan maa ŋidichal ki ŋum ndaan aasubil aasui.

⁵ M nan naan tisar ni ŋisubil aasui aasar ti kpa ŋisubil mɔmɔk aabɔŋ na.

⁶ M nan gbii ŋimɔɔ ke nnyun li puu chaa tisar ngbaan ni.

⁷ M nan daa binaagbiib pam, le binaagbiib nan ma nnaagbiibim maachiln ni. M nan kpa tiwakor ki jer unii umɔk nan puen mi ki koo Jerusalem ni na.

⁸ M nan ki kuun tikunabr ni salmaa ki nyan ni nnaan mumɔk nan bi maanaan taab na. Bijab ni bipiib le gaa ilahn ke bi tii mi mpopiin. Le m nan kpa bipiib bimɔk uja ga ŋmaa joo na.

⁹ Mbamɔn, m nan ye unikpaan la. M nan ŋa unikpaan ki jer unii umɔk nan puen mi ki koo Jerusalem ni na. Maalan aa nan jinn mi inimɔɔn daalbaadaal.

¹⁰ M nan kani tiwan nimɔk m ban na. M nan ji mmɔɔn maah gee pu na la. M nan mak maah tun ki kan tiwan ni mɔmɔk na pu. Nimina mɔmɔk nan ye maapar la.

¹¹ Le m nan kal ki dakl lik maah tun pu na mɔmɔk, ni maah di kitotoŋ ki tun kina na, le ki kan ke ni mɔmɔk nan ye fam la. Ni nan bi ke saah bi san dii libuln le na, naa kpa tinyoor kpala.

¹² Naah ye pu na le ye ke ubɔr tun bibɔrb bi loln u pu nsan na aah nan tun pu lii na pu la. Kina pu le m piin ki bi dakl lik nlan, ni tafalaaŋun aatun, ni kijɔrk aatataa aah ye pu na.

¹³ M nyi ke nlan ŋan jer kijɔrk, ke nwiihn aah ŋan jer mbɔmbɔɔn pu na la.

¹⁴ Bilandam waa baah cha nin chee na, le bijɔrb ma aa waa. Tɔ, m mu tee nyi ke ti mɔmɔk aadoon ye tiwan nibaa la.

¹⁵ Le m nan kal ki dakl nneen ni ke, “M ga nan doo ke bijɔrb na la. Kina pu na, maalan na tii mi ba aanyoor?” le ki kii mbaa ke, “Fam, naa tii mi nibaa.”

¹⁶ Ubaa aa teer bilandam bɔr, le ubaa mu aa teer bijɔrb bɔr. N‑yoonn mu choo na, ubaa aan nan ki teer ti mɔmɔk bɔr. Bilandam, ni bijɔrb mɔmɔk ga kpo.

¹⁷ Kina pu na, limɔfal aa nan kpa tinyoor tibaa m chee, ba pu? limɔfal lee aawan mɔmɔk joo ni mi tibɔr ŋmeen la. Ni mɔmɔk ye fam la; m nan bi san dii libuln la.

¹⁸ Maah nan tun ki kan tiwan ni mɔmɔk na aa nan ye m chee nibaa, ba pu? m nyi ke unii u ga nan paan m pu na le ga nan yoor ni.

¹⁹ Nibaakan, u ga nan li ye ulandaan, bee ujɔr la, tɔ, ubaa mu aa nyi. Tɔ, maah tun ki kan tiwan ni mɔmɔk na ga nan kpaln uyaan la. Maah di maalan tun ki kan tiwan ni mɔmɔk na ga nan li ye uyaan la. Ni ye fam la.

²⁰ Kina pu le m nan bee ke maah nan tun ki kan pu na aa ye maawan, le ni bii nsui.

²¹ Aa ga di saalan, ni saachiin, ni saanyim mɔmɔk tun kan tiwan, le ni nan kpaln unii u aatotoŋ aa nan nyan ni pu na aawan. Ni ye fam la, le kaa ŋan kina.

²² Aa ga muk aabaa le ki tun dulnyaa wee ni, le kaa nan kpa tinyoor tibaa.

²³ N‑yoonn mumɔk aa bi limɔfal ni na, saatuln mɔmɔk joo ni limukl ni iyiween la. Hali kinyeek kan, saa ŋmaa doon ki fuur. Ni mɔmɔk ye fam la.

²⁴ Tiwan ni ŋan ke unibɔn ŋa na le ye ke u ji, ki nyu, ki li mɔɔni waah tun ki kan pu na pu. Le m ki kan ke nimina mu nyan ni Uwumbɔr chee la.

²⁵ Aa ba ga ŋa kinye ki di aabaa aapɔɔn kan tiwan ki ji, ki li mɔɔni ni pu?

²⁶ Uwumbɔr tii binib bi piir usui na nlan, ni ichiin, ni mpopiin, le ki tee cha titunwanbirdam tun, ki kani ki gur bilni, ke u nan di tii binib bi piir usui na. Ni mɔmɔk ye fam la. Ni bi ke unii aah san dii libuln pu na la.