Ulandaan 12 - Uwumbɔr aagbaŋ

¹ Kina pu na, saah laa pɔɔn na, li teer Uwumbɔr u naan si na bɔr, waahr aan aa nin por, buyoonn aa ga nan bui ke, “Nsui aa ki piin.”

² N‑yoonn ngbaan le nwiin, ni uŋmal, ni iŋmabi aan ki li wiihn aa chee. Utaal aataalangbam mu ga ki gir ni ki ŋa mbɔmbɔɔn.

³ Le saaŋaal i ter si dandana na ga yɔl, le saataa ŋi laa pɔɔ na ga diŋ. Saanyin ŋi ga gur aamɔb ni na aan ŋmaa ŋmɔ tijikaar ti aa ji na. Le saan ki li waa mbamɔm.

⁴ Aatafal ga kpaa, kaan ki li ŋun kitiŋ ponn ni aafuuk pu. Hali kinaak yaa nan kan, saan li ŋun kaafuuk pu mbamɔm, kaan li ŋun ŋigangan mu pu mbamɔm. Le unyoon aawiil ma ga finn si ngeen pu.

⁵ Aa ga li san ke aa tɔŋ tiwan ni fɔk paacham na ijawaan, le lisachuln ga li ye tiwan ni bir na le aa chee. Aayikpir ga piir, le saan ki ŋmaa yoor aataa paacham ki chuun. Lineen mɔmɔk ga nya aa chee. Ti cha timi aakookoo aafuur chee la, le ikpowiil ga li bi kitiŋ ponn ni.

⁶ Tikunabr aaneeleen na ga kii, le salmaa aakaryaa na ga lir ki wii. Ŋŋmin mu bi liboln pu na ga kii, le goomaa ga wii yuk yuk.

⁷ Timi aawon ga ki gir kpaln kitiŋ aatan, le limɔfal aafuurk ga gir buen Uwumbɔr u di li tii timi na chee.

⁸ Ulandaan ngbaan bui ke, “Fam, fam, ni mɔmɔk ye fam la.”

Kookoo aabɔr

⁹ Tɔ, ulandaan ngbaan aah nan kpa nlan na, u nan beenin joo waah nyi pu na mɔk binib. U nan bae ŋiyataŋak le ki tɔŋ ŋaabamɔn mbamɔm ki lik.

¹⁰ Ulandaan ngbaan nan pɔɔn ubaa ke u kan nsuudoon aamɔboln, le waah nan ŋmee pu na ye ibamɔn.

¹¹ Bilandam aamɔbon naahn bipihkpaab aah joo ŋidabil ŋi aamɔi ka aan bi joo kiir baapiih na la. Le ŋiyataŋak ŋi bi ŋmee ŋi bil na yunn, ke kipinbik ki bi kpaa ki mbamɔm na. Uwumbɔr u kpaa ti mɔmɔk na le di ŋi tii ni.

¹² Maabo, tiwan ki bi ke aa li nyi nibɔr. Tigbann aaŋmeen aa kpa ndoon, le aa yaa bae sakpen kan, aa ga ti bak la.

¹³ Nimina mɔmɔk aapuwɔb na, tiwan nibaa baanja le gur ti len naabɔr. Li san Uwumbɔr, ki li dii waakaal, ba pu? kina pu le u nan naan unibɔn.

¹⁴ Uwumbɔr ga ji timi tibɔr, timi aatun mɔmɔk pu. U ga ji timi tibɔr, timi aatunyaan, ni ŋi kaa ŋan na, ni taah tun ŋi libɔɔl ni na pu.