Ulandaan 10 - Uwumbɔr aagbaŋ

¹ Ŋisibikpol ga ŋmaa cha kpalba u gbii tulalee na nuŋ. Le kijɔrk siib kina ga ŋmaa bii nlan sakpem.

² Ni ye Uwumbɔr do aawan le ke ulandaan tun litunyaan, le ujɔr mu tun ni kaa ŋan na.

³ Ujɔr aah ŋani pu na le mɔk ke waa kpa nlan. Binib mɔmɔk beer ke u ye ujɔr la.

⁴ Saatindaan yaa gee aa pu liŋuul kan, taa kpaan bui ke saa ki ye waatutunn. Aa yaa sɔŋ aalan kan, taani sakpiin ga ŋmaa kan chapinn.

⁵ Ŋibamɔn gangal i m kan binib bi joo ntim chee na sɔ:

⁶ bi joo mpɔɔn aasisii tii bijɔrb, le ki suln biwankpadam bɔr.

⁷ M kan binaagbiib dik itaan pu, le bipɔɔndam chuun bitaa pu ke binaagbiib na.

⁸ Aa yaa gbii libuul bil kan, sin le ga nan lir li ponn ni. Aa yaa saa kar ligoln lii kan, uwaa le ga juu si.

⁹ Aa yaa tun lituln baah kpii ŋifakuu nin chee na kan, aa gbeer ŋifakuu la. Aa yaa lar idɔ kan, nima chee le aa kani titotonn.

¹⁰ Saachɔk yaa kaa ka, aa yii kaa luun ki kan, aa tun le ki ti bak. Aa yaa puen ŋa ilandak ki nin tun saatuln kan, ni ŋan sakpen.

¹¹ Aa yaa cha uwaa puen juu si waahr aan aa nin bui ke aa kpa nnyɔk mu ga jɔr u na kan, ni ye fam la.

¹² Ulandaan aamɔliin tii u liyimbil la, le ujɔr ma aamɔliin ku u.

¹³ U di ilatiir le di piin, le ki ti di kiwaatiik doo.

¹⁴ Ujɔr aabɔr aa kpa ndoon. Ubaa aa nyi tiwan ni ki ga ŋa na. Le ubaa mu aan ŋmaa bui timi tiwan ni ga ŋa timi aakun aapuwɔb na.

¹⁵ Ulatiir u kaa nyi udo aasan na le ga di lituln ku ubaa.

¹⁶ Kitiŋ ki aabɔr ye unachipɔɔn, aan kaasalolm mu ji njim ki ti woln kitaak na bi tibɔr ni la.

¹⁷ Tɔ, kitiŋ ki aabɔr ŋani ubaa aalandak, aan kaasalolm mu ji baajikaar tijikaar aajim aayoonn, ki joo bibaa mbamɔm kaa nyu ndaan gbii na, kpa nsisiinyaan.

¹⁸ Uja yaa kpa ligbanyakl kaan pin waadiik kan, ki ga lun, le ki lir.

¹⁹ Njim tii si mpopiin le ndaan cha aa kpa nsuupiin, aa mu aan ŋmaa kan nimina kaa nya ŋimombil.

²⁰ Taa loon ki su ubɔr aapuwɔb, ki taa koo saadiik ni ki su unii u ye uwankpadaan na aapuwɔb. Nibaakan, unyoon le ga di tibɔr ngbaan buen ti tuk bi saah len pu na.