Ulandaan 1 - Uwumbɔr aagbaŋ

Limɔfal ye fam la

¹ Ulandaan, u aate nan ye David u nan ye Jerusalem aabɔr na, aah nan len pu na sɔ:

² Ni mɔmɔk ye fam la, ni ye fam la. Limɔfal ye fam la, ni mɔmɔk ye fam la.

³ Aa joo saamɔfal mɔmɔk tun lituln la, ki ji falaa, le ni mɔmɔk aapuwɔb na, saa nan kpa nibaa aa di mɔk.

⁴ N‑yoonn mue ni mu aanib choo, le n‑yoonn mue ni mu aanib jer, le dulnyaa ma beenin bi waabimbin.

⁵ Nwiin beenin puur, le ki beenin lir. Mu chuun mala mala le ki cha nin chee mu ga ti ki piin ni na.

⁶ Libuln daar cha ŋŋangii wɔb, le ki daar cha ŋŋangan wɔb, li daar ki manni gonni, le ki ti ki fuu laah piin nin chee na.

⁷ Limɔɔl mɔk puu cha nnyusakpem ni la, le nnyusakpem aa kpa ke mu gbiin. Nnyun ngbaan gir cha nin chee ŋimɔɔ ngbaan piin na la, le ki ti ki piin ni.

⁸ Tiwan mɔmɔk joo cha tibakr ti unii aan ŋmaa len na ni la. Tinimbil aan ŋmaa kan ki ti bab; le titafal mu aan ŋun tiwan pu ki ti bab.

⁹ Tiwan ni puun dan na ga ki gir dan. Tiwan ni puun ŋa na ga ki gir ŋa. Tiwan nibaa aa bi dulnyaa wee ni ki ye tiwapɔnn.

¹⁰ Bi len le ke, “Lik, tiwapɔnn nibaa sɔ.” Aayii, ni puun dan n‑yoonn mu jer na. Ni puun dan ni yunn le bi nan nin ma timi.

¹¹ Ubaa aa teer tiwan ni nan dan n‑yoonn mu jer na. Le ubaa aan nan teer tiwan ni ŋani dandana na n‑yoonn mu choo na ni.

Ulandaan ngbaan aah kan ki nyi pu na

¹² Min, ulandaan ngbaan nan ye Israel aabɔr le ki ka Jerusalem aatiŋ ni.

¹³ M nan puu ke see m tɔŋ ki bae lik tiwan ni mɔmɔk ŋani dulnyaa wee ni na. Uwumbɔr di mbimbin mu kaa kpa tataa na le di tii timi.

¹⁴ M kan tiwan ni mɔmɔk ŋa dulnyaa wee ni na, le ki ban m bui si ke ni mɔmɔk ye fam la. Ni bi ke unii aah bi san dii libuln pu na la.

¹⁵ Saan ŋmaa naar tiwan ni gɔr na. Saan ŋmaa kahn tiwan ni kaa bi na.

¹⁶ Le m bui mbaa ke, “M kpaln unikpaan la. M kpa nlan jer ubɔr umɔk puen mi joo Jerusalem aatiŋ na. M nyi Uwumbɔr do aalan, ni nlanbaekoo aah ye pu na.”

¹⁷ M nan puu ke m ga bae ki bee nlan ni kijɔrk aah kaa kpaa pu na, ki bee Uwumbɔr do aalan mu, ni kiwaatiik aah kaa kpaa pu na, le ki kan ke m bi san dii libuln la.

¹⁸ N‑yoonn mu aa moo kani nlan na, n‑yoonn ngbaan le ilandak moo kpae. N‑yoonn mu aa moo beer tiwan na, n‑yoonn ngbaan le ni mu tii si iween.