Solomonn Aalahn 8 - Uwumbɔr aagbaŋ

¹ Aa yaa ba ye nninja kan, ki yaa ba ŋaa nna aabiil kan, m ba gee kina. Le m yaa ba ton si nsan ni kitiŋ ponn ni kan, m ba ga moor aatakpiln aan ubaa aa ba ga len tibaa.

² M ba ga di si buen nna aadiik ni le aa ti mɔk mi mbɔngeehm. M ba ga tii si ndaan mu nu mɔ na, m ba ga tii si ŋisubil aadaan aan aa nyu.

³ Aa di aaŋangan le kul n‑yil, le aaŋangii kpaal nwon mɔmɔk pu.

⁴ Jerusalem aapiib, puu tii mi man ke naan bɔ timi aabɔtiik aabɔr ni.

Nlahn loloob Bipiib aalahn

⁵ Ŋma ye aan u ni ubɔɔn lɔk tɔb kina, ki nyan ni nteersakpiin ni ki choo ngbaan? Nin chee bi nan ma si linyɔkl aasub taab na, le m nan finn si.

Upii aalahn

⁶ Taa ki bɔnn upii ubaa ki kpee m pu; taa ki cha aaŋaal bub ubaa ki kpee m pu. Mbɔngeehm pɔɔ ke nkun na la; Mbɔngeehm pɔɔ ke kitekpiitiŋ na la. Mu ti gaal ke mmii na la, le ki wu ke kichook ni aamii na.

⁷ Nnyun aan ŋmaa junn mu, nwam mubaa aaboln aan ŋmaa biin mu pu. Tɔ, unii yaa pɔɔni ubaa ke u di liwangol daa mbɔngeehm kan, yaansara baanja le u ga kan.

Upii ngbaan aaninjatiib aalahn

⁸ Ti kpa ninkpan u laa diin na, le u laa bi nya ŋibii. Unachipɔɔn yaa bi ban u kan, ti ga ŋa ba tii u?

⁹ U yaa ba ye ligoln kan, ti ba ga di tikunabr maa bikikiib aadifɔfɔŋ tii u. Tɔ, u yaa ba ye jaaleŋ kan, ti ba ga di santina aakpan gob kiir u.

Upii aalahn

¹⁰ M ye ligoln la, le maabii ye laakikiib aadifɔfɔŋ. Mbɔɔn nyi ke m kani maah gee pu na, ni nsuudoon u chee.

Uja aalahn

¹¹ Libuul li ni bi yin li ke Baal Hamonn na, le Solomonn kpa ŋisubil aasaak. Bikpaab bi, le ki gaa ki, ki pa u ki pu; ukpaal mɔk pa u tikunabr aamombil lichur la.

¹² Solomonn gaal waamombil lichur ni mpopiin la, le bikpaab ngbaan mu gaal baapar ikui ilelee; m kpa mbaa aasubil aasaak.

¹³ Mbɔɔn, cha m ŋun saaneel pu kisaak ni, ŋŋeen aatɔtiib si kii ke bi ŋun saaneel pu la.

Upii aalahn

¹⁴ Mbɔɔn, dan m chee ke upeeyun na, li san ni ke lipeemanbil aah bi lijool li pu tulalee tiib aasui bi na, aah san pu na.