Solomonn Aalahn 7 - Uwumbɔr aagbaŋ

¹ Usapɔɔn, saanyaan ti nyaŋ sakpen a. Aa yaa tak ŋinaatak kan, aataafar ŋan sakpen a. Aataapan aah ti doo nimɔk na ŋan sakpen ki naahn unii u naani tiwan na aatuln.

² Aaŋangboŋ naahn lisambil la, le ndaan mu nu mɔ na aa door li ponn ni. Aachaŋ bi ke lidibɔɔl na la, le nsupuun maln goln ki.

³ Aabii naahn ipeeman jaan la, ki naahn ipeeyun ilee.

⁴ Aasil bi ke jaatɔlk u ye iluub aanyin ŋmeen na la. Aanimbil naahn Hesbonn aatiŋ ponn ni aabɔr aanyun mu dɔ kitisakpeŋ ngbaan aagoln aabisamɔb chee na la. Aamɔfal ŋan ke Lebanonn aakikiib aadifɔfɔŋ ki si Damaskus aatiŋ ni na la.

⁵ Le aayil mu si chab ke Kamel Aajool na. Saah buu aayikpir ti na moor lak lak ke ŋitakpanyaan ŋi joon bɔl bɔl na; taanyaan ga ŋmaa baa ubɔr siin libubaan ni.

⁶ Aa kpa kinyaan sakpen a, aa ŋan ni ti nyaŋ a; le saabɔngeehm aa gur nibaa.

⁷ Aa ŋan ke libɔkpal aasub na la, le aabii naahn laasubil.

⁸ M ga jon libɔkpal aasub ngbaan ki ti ker laasubil. Saabii naahn ndaan aasubil aabon le m chee, le saafuurk nu mɔ ke linyɔkl na,

⁹ le aamɔb ni mɔ ke ndamɔɔn na. Kina kan, cha ndaan ngbaan pii mbɔɔn, ki li puu umɔgban ni unyin pu.

Upii aalahn

¹⁰ M ye mbɔɔn yoo la, le u neen mi.

¹¹ Mbɔɔn, dan aan ti buen timoor ni, ki ti li doo ntimbim ni.

¹² Ti ga fii lichakpitaawoln le ki lik ŋisubil aasui ke i piin bukpenn pu aan yaa kee piin, ki lik ke nsupuun mu ŋeen na bi poor aan mu aa kee bi poor, ki lik ke ŋisubil ŋiken aasui na mu faa mpuun aan yaa kee faa. Nima chee le m ga ti di maageehm tii si.

¹³ Aa ga ŋun ŋisubil aasufar aanunun pu, ni ŋisubil ŋi mɔmɔk nu mɔ na timi aabisamɔb chee. Mbɔɔn, m di tiwanyaan kpok ni nipɔnn mɔmɔk siin kiir si la.