Solomonn Aalahn 6 - Uwumbɔr aagbaŋ

¹ Upii u ŋan jer bipiib mɔmɔk na, aabɔɔn buen la chee? Mɔk timi aabɔɔn aah buen nin chee na, aan ti ter si, aan aa ban kan u.

Upii aalahn

² Mbɔɔn buen waasaak ni la, nin chee tulalee aasui bi na. U bi kpiini waawakor waasaak ni, le ki bar nsupuun.

³ Mbɔɔn ye mi yoo la, le m mu ye u yoo; u kpiini waawakor nsupuun ni la.

Nlahn ŋmuŋmur Uja aalahn

⁴ Mbɔɔn, aa ŋan ke Jerusalem aatiŋ na, ki ŋan ke Tirsa aatiŋ na, le saanyaan bi ke bijab bi cha butɔb ni na aatuutaa.

⁵ Fenn aanimbil m chee; ŋi chuu mi siin libuul libaa ni la. Aayikpir gbeeni ke iŋoob le aah san sunni Gilead aagongon na.

⁶ Aanyin piin ke ipiih i bi laa fu i nnyun na. Ŋi ponn ni libaa aa fenn; ŋi mɔmɔk ŋak tɔb deedee la.

⁷ Aa di kiyibubuuk poo biin aanimbil wɔb, le aatakpin beenin moor ni lak lak.

⁸ Ubɔr ga li ŋmaa kpa puutiib imonko itaa, ni bɔtiib imonko inaa, u ga li ŋmaa kpa bipiisapɔm churbakaa,

⁹ le mma gee ubaa, le u ŋan ke linanjel na. Uma baanja le ye una aapiibo, uma le ye una aabogeehn. Bipiib mɔmɔk lik u la, le ki pak u; bibɔrpiib ni bibɔtiib gaa ilahn pak u la.

¹⁰ Ŋma yaar lik mi aan ni bi ke lichakpitaawoln aawiihn na? U ŋan le ki bi chain, ki moor lak lak ke nwiin ni uŋmal na, le waanyaan bi ke bijab bi cha butɔb ni na aatuutaa.

¹¹ M sunn koo ni nkpan aasui ponn ni ke m nan kan tisubir ti bi kifataŋ ni na, ni ndaan aasubil aasui aafar aah bi kpenni pu na, ni ŋisubil ŋiken aasui aasupuun.

¹² Nwon gbaa la, aa cha nwon finni aa pu ke tɔroku aatandaan aawon aah finni butɔb pu pu na.

Bipiib aalahn

¹³ Li waa, Sulam aasapɔɔn, li waa, aan ti lik saah waa pu na. Ba ŋa ni ban ke m li waa liwaal binib bi si lik na ponn ni, aan ni si lik mi?