Solomonn Aalahn 5 - Uwumbɔr aagbaŋ

¹ Maabɔngeehn ni maabɔndinn, m koo maasaak ponn ni la. M bi nyani maatulalee aakpiin ni mir la; m bi ji maasiinyun ni nsiikpan la; m bi nyu maasubil aadaan ni nnaabiin la. Bɔtiib, li ji ki nyu man ki ti saa buyoonn mbɔngeehm ga gbii nimi na.

Bipiib aalahn Nanaa aalahn Upii aalahn

² Maah nan dɔ geen na, nsui ma nan waa la. M nan daŋ tidaŋ ke mbɔɔn dan nan kpaar maajaaleŋ pu. Mbɔɔn, maabɔngeehn, ni maananjel, cha m koo ni. Limaln le sɔŋ n‑yil, le likpakpal mu sɔŋ n‑yikpir.

Uja aalahn Upii aalahn

³ M puun gbabr maakeken a; maan ki ŋmaa di ŋi gbab. M puun finn ntaa a; maan ki cha ŋi ŋa tijɔŋ.

⁴ Mbɔɔn nan di uŋaal meeh jaaleŋ, le ni ŋa mi ke waah duun ni mi le na.

⁵ M nan gor ke m cha u koo ni. Tulalee u bi yin u ke mir na le nan gaa ŋŋaal ni mɔmɔk, mir aatulalee nan tuu ŋŋanbim pu ki lir kitiŋ, le m ti bub chuu jaaleŋ.

⁶ M nan chuu piir jaaleŋ ke mbɔɔn koo ni, le ki muin u puun siir a. M nan neen ke m ŋun uneel pu sakpen; m nan ban u, le kaa kan u. M nan yin u, le kaa ŋun u pu.

⁷ Bikikiib bi nan chuun manni kitiŋ ni na nan kan mi; bi nan gbaa mi ki lakr nwon; bikikiib bi nan kii kitiŋ ngbaan aagoln na nan daa per maayibubuuk.

⁸ Jerusalem aapiib, puu tii mi man ke ni yaa kan mbɔɔn kan, ni ga bui u ke maah neen pu ke m kan u na yɔl nwon mɔmɔk a.

Bipiib aalahn

⁹ Upii u ŋan jer bipiib mɔmɔk na, aabɔɔn aabimbin ni biken yaan aa kpaan la aa? U kpa lijinjiir aawan nilani aan aa bui ke ti puu tii si?

Upii aalahn

¹⁰ Mbɔɔn ŋan le ki pɔɔ; binib ŋichur kipiik ni kan, aa ga kan waaboln ubaa la.

¹¹ Unimbil wɔb joon kpal kpal, le ki man chaun ke tikumann na; uyikpir ŋan, le ki bɔn chin chin ke likakaal na.

¹² Unimbil ŋan ke ŋinanjel ŋi bi nkpen mu puu na ni aah ŋan pu na la, ki bi ke ŋinanjel ŋi bi di nnaabiin fu ŋi aan ŋi si nkpen chee na.

¹³ Utakpin ŋan ke kisaak ki ponn ni kpa tulalee aasufabir mɔmɔk aabɔŋ na la. Umɔgban bi ke nsupuun na la, le mir aatulalee sɔŋ ŋi.

¹⁴ Uŋaal dii tɔb mbamɔm la, le u ŋmaa ibuen i bi di ŋitakpanyaan ŋi kpa kidaak sakpen na di ŋmal i ponn ni na. Uwon joon ke uluub aanyin ŋi bi kpii ŋi, aan ki di ŋitakpanyaan tam ŋi na la.

¹⁵ Utaapan bi ke ŋitakpanyaan piin aajaatɔlk aah tɔk salmaa pu pu na la. U si chab ke Lebanonn aajoo ŋi kpa santina aasui fɔfɔk na.

¹⁶ M yaa moor umɔb kan, ni mirk la; waawan mɔmɔk cha m moo neen u la. Jerusalem aapiib, mbɔɔn bi kina la.