Solomonn Aalahn 4 - Uwumbɔr aagbaŋ

¹ Mbɔɔn, saanyaan ti nyaŋ sakpen a. Aa di kiyibubuuk biin aanimbil wɔb, le saabɔngeehm beenin kpii ni. Saayikpir gbeeni ke iŋoob le aah san sunn ni Gilead aagongon na.

² Aanyin piin ke ipiih i bi laa fu i bukiib ni nnyun na la. Ŋi ponn ni libaa aa fenn; ŋi mɔmɔk ŋak tɔb deedee la.

³ Aamɔgban bi ke litamaln na, le aa yaa len tibɔr kan, ŋi ŋan sakpen. Kiyibubuuk bii aanimbil wɔb, le aatakpiln beenin moor ni lak lak.

⁴ Aasil joon ki bi mɔlb ke David aakikiib aadifɔfɔŋ na la, le nneeleen mu bi ke kijaak aapen lichur na gbin mu pu.

⁵ Saabii naahn ipeeyun la, ki bi ke ipeeman jaan le aah si nsupuun ponn ni ki ŋmɔ timoor na.

⁶ M ga li bi mir aatulalee aagongoln pu la, le lichakpitaawoln aabuln ti daa ni, le mbɔmbɔɔn mu ti doo.

⁷ Mbɔɔn, saanyaan ti nyaŋ sakpen a; saa kpa ŋeen aatɔ.

⁸ Maabɔndinn, nyan ni Lebanonn Aajoo ni ki dan ti li cha; nyan ni Lebanonn ki dan ti li cha. Sunn ni Amana Aajool paab, nyan ni Senir, ni Hemonn aajoo paab, nin chee ichinn ni inaamuun koo na.

⁹ Maabɔngeehn ni maabɔndinn, nlaasaab bi aanimbil, ni nneeleen mu aa gbin na ni la.

¹⁰ Maabɔngeehn ni maabɔndinn, saageehm tii mi mpopiin la. Saageehm mɔ jer ŋisubil aadaan mɔmɔk; le saatulalee nu mɔ jer tulalee mɔmɔk.

¹¹ Mbɔɔn, aamɔgban mirk ke tisiir na la; le aalambil bi ke nnaabiin ni tisiir na m chee. Saawanpeenkaan kpa Lebanonn aatulalee mɔmɔk aanunun.

¹² Maabɔngeehn ni maabɔndinn ye kisaak ki bɔr na la, u ye kisaak ki bi maa ligoln gob ki na, ki ye unibaan aanyunbun.

¹³ Nima chee le isui muuni. I muuni ke ŋisubil aasui aasaak na la, le ki lu ŋisubil ŋi ŋan sakpen na. Tulalee tiib bi bi yin bi ke hena, ni naad,

¹⁴ ni safaronn, ni kalamus, ni sinamonn, ni tulalee mɔmɔk aabɔŋ na aasui bi nima chee. Tulalee tiib bi bi yin bi ke mir ni alos na aasufar mu bi nima ki kpa nnunun mu mɔ sakpen na.

¹⁵ Uyayak aanyunbun le tii kisaak ngbaan nnyun, le nnyun puu nyan ni Lebanonn Aajoo mu ni ki choo ki ponn ni.

Upii aalahn

¹⁶ Ŋŋangan wɔb aabuln, finn ngeen pu. Ŋŋangii wɔb aabuln, daa maasaak pu. Cha nnun mu mɔ na gaa ni mɔmɔk. Cha mbɔɔn dan waasaak ni ki nan moo kaasubil ŋi mɔ na.