Solomonn Aalahn 3 - Uwumbɔr aagbaŋ

¹ Maah doo geeni maawandookaan pu kinyeek mɔmɔk na, m daŋni maah gee u na pu la; m nan bi ban u, le kaa ŋmaa kan u.

² M nan chuun kpak kitiŋ ponn ni, m nan chuun kaasan, ni nsanbim mɔmɔk ni. M nan chuun ban maah gee u na la. M nan ban u, kaa kan u.

³ Bikikiib bi nan chuun manni kitiŋ ni na nan kan mi. M nan baa bi ke, “Ni kan mbɔɔn aa?”

⁴ Le maah kpaan siir bi chee na, le m kan u. M nan bub chuu u, kaan ki di u lii, le u ti nin fuu nna aadiik ni, kidiik ki ponn ni bi nan ma mi na.

⁵ Jerusalem aapiib, puu tii mi man; puu upeeman ni upeeyun i bi timoor ni na pu ke naan bɔ timi aabɔtiik aabɔr ni.

Taataa aalahn Upii aalahn

⁶ Ni ye ba ki nyan ni nteersakpiin wɔb ki naahn iŋmanyuu sakpiin, ki kpa tulalee ni mir aatulalee aabaan, ke tulalee u biwantiirb kooh u na?

⁷ Solomonn, le bi tu u waabɔrjal pu choo; Israel aajab bi nyi butɔb aabɔr mbamɔm ki ye bijab bi kii u na ponn ni imonko itaa le dii u.

⁸ Bi mɔmɔk nyi kijaak aajum aabɔr mbamɔm; bi ye bijab bi chaa butɔb ni ki nyaŋni na la. Bi mɔmɔk joo kijaak aajum la, ki kii ke nibaakan bibaa nan loon bi kinyeek.

⁹ Busub bu ŋan ki pɔɔ na le bi di kpii Solomonn aabɔrjal ki tu u li pu.

¹⁰ Bi di tikunabr le boon idɔ i bi joo tui li na; le ki di salmaa aakokonn gbaŋ likekeln li paa li pu na. Bi di ŋitan ŋi man ki bɔn timm na le di ŋa likekeln gob li, Jerusalem aapiib le gbaŋ li ni kinyaan ŋmeen.

¹¹ Sionn aapiib, dan nan lik man ubɔr Solomonn. U chik kibɔryikpupuk ki una nan di chiŋ uyil pu waabɔndinn daal, nwiin mu nan ye waapopiin ni mmɔɔn daal na la.