Solomonn Aalahn 2 - Uwumbɔr aagbaŋ

¹ M ye Saronn aafataŋ ni aasupuun la, m ye nsupuun le ki bi lijool aafataŋ ni.

Uja aalahn

² Mbɔɔn bi bipiib biken ni ke nsupuun aah ŋmal ikokon ni pu na la.

Upii aalahn

³ Mbɔɔn unyaan bi bijab biken ni ke linyɔkl aasub aah bi pu kichook aasui ni na la. M gee ke m li kaa bu aaboon ni, le bu aasubil mɔ m chee pam.

⁴ U di mi koon ni waajim aanaakook ni, le ki di waageehm mɔk mi nima.

⁵ Tii mi ŋisubikuun ŋi ga ki giin ni maapɔɔn na, ki cha linyɔkl aasubil ki pɔɔk nwon. Maah neen si pu kaa pii si na yɔl ntaakpab la.

⁶ Uŋangan kul n‑yil la, le uŋangii kpaal nwon mɔmɔk.

⁷ Jerusalem aapiib, puu tii mi man, puu upeeman ni upeeyun i bi timoor ni na pu ke naan bɔ timi aabɔtiik aabɔr ni.

Lelee aalahn Upii aalahn

⁸ M ŋun mbɔɔn aaneel pu. U nyan ni ŋijoo paab le ki san ni, u san nyan ni ŋigongon ni le ki choo m chee.

⁹ Mbɔɔn naahn upeeyun la, u naahn lipeemanbil la. Uma le ti si tab ligoln na. U baani takolu ni le ki lik, le ki biini takolu aakekeln ki lik ni.

¹⁰ Mbɔɔn len m chee tibɔr. Mbɔɔn, kina kan, dan; mbɔɔn unyaan, cha ti li cha.

Uja aalahn

¹¹ Libuln aa ki daar; utaal mu fir a;

¹² le nsupuun poor timoor ni. Lilahngaal aayoonn sɔ; ŋinanjel bi gaa ilahn ikpaakon ni la.

¹³ Ŋikakan bi puir la; ndaan aasubil aanunun gaa ni mɔmɔk a. Mbɔɔn, kina kan, dan; mbɔɔn unyaan, cha ti li cha.

¹⁴ Aa naahn linanjel li bɔrni litakpal aaloŋ ni na la. Cha m lik aanimbil wɔb, aanimbil wɔb ŋan sakpen. Cha m pel saaneel pu, saaneel mɔ sakpen.

¹⁵ Chuu iŋɔk, chuu iŋɔk waatiir ngbaan waahr aan i nin bii timi aasubil aasaak ki bi ŋeeni na.

Upii aalahn

¹⁶ Mbɔɔn ye min yoo la, le m mu ye u yoo. U kpiini waawakor nsupuun ponn ni la,

¹⁷ le lichakpitaawoln aabuln ti daa ni, le mbɔmbɔɔn mu doo. Mbɔɔn, gir mala ke upeeyun na, gir ni mala ke Beter aajoo pu aapeemanbil na.