Solomonn Aalahn 1 - Uwumbɔr aagbaŋ

¹ Solomonn aalahmɔɔn i kaa kpa ŋeen aatɔ na.

Njan aalahn Upii aalahn

² Aa joo aamɔb moor nwon mɔmɔk la; saabɔngeehm mɔ jer ŋisubil aadaan.

³ Saabaan nu mɔ sakpen a; le bi yaa yin saayimbil kan, mbaan ngbaan nyani. Upii mɔk gee si la.

⁴ Yoor mi, ki cha ti san; li ye maabɔr, ki di mi buen saadiik ni. Ti ga li kpaan koo le ni mɔ timi, ki ga nyu ndaan taah gee pu na, le ki mɔk tɔb taah gee tɔb pu na. Ni sil ye mbamɔn ke upii mɔk gee si.

⁵ Jerusalem aapiib, m bɔn le ki ŋan, m bɔn ke Kedar aateersakpiin ni aakeken aaboo na la, le ki tee ŋan jer Solomonn aabɔrchiln ni aakeken ŋi lee tidir aabisamɔi na.

⁶ Taa lik seeni mi maabɔmbɔn pu man, nwiin le seer mi, le m bɔnn kina. Nninjatiib le nan gee m pu liŋuul ki cha m tun lituln ŋisubil aasaak ni. Maa nan kpa n‑yoonn ke m di toor mbaa.

⁷ Mbɔɔn, tuk mi saah ga di saawakor buen nin chee aan ti ti ŋmɔ timoor na. La chee aan saawakor ga nan baŋ nwiin pu? Naa ŋan ke m nan li bi ban si bipihdam biken ponn ni.

Uja aalahn

⁸ Upii nyanyaan, saa nyi nima chee ee? Saa nyi kan, li dii tiwakor cha; li kii saaŋoob biwakodam aaboo chee.

⁹ Mbɔɔn, sin le ye upii nyanyaan, ki ŋan ke ijipt aabɔr aataan aah ŋan pu na.

¹⁰ Tafajɔnjɔn ti bi aatafal pu na cha aa ŋan sakpen, Nleenyaan mu bi aasil pu tii si kinyaan pam.

¹¹ Le ti ga ŋa salmaa aaleen mu ŋmar tikunabr aakur na tii si.

Upii aalahn

¹² Maabɔr nan dɔ waayikukul aajal pu, le maatulalee aanunun gaa ni mɔmɔk.

¹³ Mbɔɔn yaa dɔ paa m pu kan, waabaam nu mɔ ke mir aatulalee na la.

¹⁴ Mbɔɔn nu mɔ ke timoor ni aasupuun mu poor ki bi Enn Gedi aasubil aasar ni na la.

Uja aalahn

¹⁵ Mbɔɔn, aa ŋan sakpen a; le aanimbil ponn ni kpa ngeehm.

Upii aalahn

¹⁶ Mbɔɔn unyaan, saanyaan nyaŋ a; le aa tii mi mpopiin. Timosɔnn le ga li ye timi aawandookaan,

¹⁷ santina tiib le ye timi aadichal aalɔkdɔ, le lisalaasiil aasui bii ti pu.