Sekaria 9 - Uwumbɔr aagbaŋ

Uwumbɔr ga daa Israel yaab aadim aatafal

¹ Uwumbɔr aanaŋ sɔ: U siin Hadrak aapepel ni Damaskus aatiŋ aatafadaan. Israel aanibol ni Siria aatiyil Damaskus mɔmɔk ye Uwumbɔr yaan la.

² Hamaf aatiŋ, ki bi Hadrak aatinaanmɔk na, mu ye uyaan la. Uma le yeh Taya ni Saidonn aatim, ni mu aanyim mɔmɔk.

³ Taya maa ŋigon gob kaatim mu kpa tijawan na kiir kibaa, le ki kuun tikunabr ni salmaa, le ni ti gur wiir ke titan na.

⁴ Tɔ, Uwumbɔr ga yoor kaah kpa pu na mɔmɔk buen. U ga di kaawangol mee ŋa nnyusakpem ni, le ki see kitiŋ ngbaan mmii lii.

⁵ Askelonn aatiŋ ga kan nimina le ijawaan chuu ki. Gasa aatiŋ ga kan ni le ki ji iween aafalaa. Kina le Ekronn aatiŋ ni kaamakl mɔmɔk ga bii. Bi ga ku Gasa aatiŋ aabɔr, le Askelonn aatiŋ ga kpaln tilangbenn.

⁶ Kiniŋmalk le ga li koo Asdod aatiŋ ni. Uwumbɔr bui ke, “M ga sunn Filistia aagaadam bee taab.

⁷ Baan ki ŋmɔ tinann ti kpa nsin ti ponn ni na, kaan ki ji tijikaar ti kɔ na tibaa. Binib bi ŋmar na mɔmɔk ga kpaln maanib la, ki li bi ke ntaŋaal mubaa na Juda aanibol ni. Ekronn aatiŋ aanib ga kpaln maanib ke Jebus yaab aah ŋa pu na.

⁸ M ga li kii maatiŋ ki taa cha baadim aajab bɔ ki ponn ni jer. Maan cha bibiindam ki muk maanib. Min mbaa aanimbil ga li bi maanib pu.”

N‑yoonn mu choo na aabɔrkpaan

⁹ Li mɔɔni man, Sionn aanib, li mɔɔni man. Nimi Jerusalem aanib, li tar mpopiin pu man. Lik, nimi aabɔrkpaan choo ni chee la. U ye ubimbinyaandaan le ki joo linyaŋ choo, u sunn ubaa taab le ki dik ubon pu, u dik ubon u laa diin na pu la.

¹⁰ Uwumbɔr bui ke, “M ga nyan butɔb aataan aatɔroku tiib Israel aatiŋ ni, ki nyan itaan Jerusalem aatiŋ ni; m ga kool baah joo itɔi i chaa butɔb ni na. Nimi aabɔrkpaan ga cha nsuudoon dan ŋitimbol chee; u ga li joo kitiŋ ki nya nnyusakpem mue chee ki ti saa mue chee, ki nya Yufrates Aamɔɔl ni, ki ti saa kitiŋ aanaanmɔk.”

Uwumbɔr aanib aah ga ki gir pɔr pu na

¹¹ Uwumbɔr bui ke, “Maah nan puu tipuur ti tii nimi ki di kitork aasin biin ti pu na, le ga cha m gaa nimi aanib lii, ki nyan bi tinaagbiir aabuul li kaa kpa nnyun na ni.

¹² Nimi binaagbiib bi bi kitiyayaŋ ni na, ni kpa limakl dandana wee la; gir ni man, gir ni nin chee kpa lifuur na man. M tuk nimi la, m ga gir pa nimi tinyoor nfum mulee ki jer naah nan jin falaa pu na.

¹³ M ga di Juda aanib kpaln uja aatɔm le ki di Israel aanib ŋa ipiin. M ga di Sionn aajab ŋa kijaak aajum, ki di jan Griik aajab kijaak.”

¹⁴ Uwumbɔr ga li bi paacham ki di ubaa mɔk waanib, u ga too waapiin ke utaal aah moor pu na la. Bidindaan Uwumbɔr le ga pii ukpiin; u ga li chuun titaabunn ti nyan ni ŋŋangii wɔb na ni la.

¹⁵ Uwumbɔr Mpɔɔnsakpiindaan ga li kii waanib, le bi ga kuln baadim. Bi ga li tar butɔb ni ke bidagbiib na la, le ki cha baadim aasin nya; mu ga li puu ke kitork aasin mu bi teŋ lisambil ni ki di kpir kitork aabimbiln paab na la.

¹⁶ Nwiin ngbaan daal yaa nan fuu ni kan, Uwumbɔr ga gaa waanib lii, ke unii aah nyani waawakor linimaln ni pu na. Uwumbɔr aanib ga li moor waatiŋ ni ke kibɔryikpupuk aatakpanyaan na.

¹⁷ Baanyaan ga nyaŋ. Tijikaar ni ŋisubil aadaan ga tii binib bi laa diin na mpɔɔn.