Sekaria 8 - Uwumbɔr aagbaŋ

Uwumbɔr aah puu ke u ga ki gir maa Jerusalem pu na

¹ Uwumbɔr Mpɔɔnsakpiindaan le nan di tibɔr timina tuk min Sekaria:

² “Maah gee Jerusalem aanib sakpen pu na, le m neen ke m ter ki. Ngeehm ngbaan pu le maaŋuul nan fii kaadim pu.

³ M ga gir ni Jerusalem aatiŋ pu. Kima le ye maatiŋ ki bi chain na, le m ga li koo ki ponn ni. Kaayimbil le ga li ye ke kitiŋ ki dii min Uwumbɔr mbamɔm na, le min Uwumbɔr Mpɔɔnsakpiindaan na aagongoln aayimbil ga li ye ke ligongoln li kaa kpa tijɔŋ na.

⁴ Le bijaninkpiib ni bipininkpiib bi por ki gur joo ŋidabil chuun na, ga ki gir kal kitiŋ ngbaan aaninkpiib aakakaa chee.

⁵ Le mbijabim ni mpiibim mu ga ki gbiin kitiŋ ngbaan ponn ni ki gbiir.

⁶ “Nimina ga li pɔɔ litimbol ngbaan aanib bi gur nima chee na chee, le mma chee kan, naa pɔɔ.

⁷ M ga nyan ni maanib baadim aah di bi buen ntim mu na ni,

⁸ le ki nyan ni bi liwipuul ni liwilir wɔb, bi nan li koo Jerusalem ponn ni. Bi ga li ye maanib, le m mu ga li ye Baawumbɔr, ki joo bi ibamɔn ni, ki cha mbimbinyaan li bi.

⁹ “Min Uwumbɔr Mpɔɔnsakpiindaan le len ke: Cha nitaakpab li pɔɔ man. Ni bi ŋun tibɔr chachaan ti maabɔnabtiib nan len, n‑yoonn mu bi nan ki gir bil ŋitakpal ke bi maa Maadichal na la.

¹⁰ Waahr aan n‑yoonn ngbaan na, ubaa aa nan kpa ŋimombil ke u pa unii bee kiwakork bi tun lituln tii u, le ubaa aa nan kpa lifuur waadin chee. M nan jaani maanib la.

¹¹ Tɔ, maan ki ŋa litimbol limina aanib bi ŋmar na kina.

¹² Bi ga bu baajikaar nsuudoon ni la. Baasubil aasui ga lu ŋisubil, le kitiŋ ga ŋa tijikaar, le utaal ga nu. Maatimbol aanib bi ga ŋmar na le m ga tii bi tinyoor timina mɔmɔk.

¹³ Juda ni Israel aatim aanib, n‑yaayoonn na, nimi aayimbil le biwɔwɔm nan joo puuni lir tɔb pu ki len ke, ‘Tibɔbir ti nan dan Juda ni Israel pu na dan aa pu.’ Tɔ, m ga gaa nimi lii, le biwɔwɔm ngbaan ga bui tɔb ke, ‘Cha tinyoor ti dan Juda ni Israel pu na dan aa pu.’ Kina pu na, taa san ijawaan man. Cha nitaakpab li pɔɔ.”

¹⁴ Uwumbɔr Mpɔɔnsakpiindaan ki bui ke, “Niyaajatiib aah nan cha maaŋuul fii na, m nan ŋa tibɔbir aalandak bi pu, kaa kpeln maalandak, m nan cha mu tun lituln.

¹⁵ N‑yoonn mumina ma kan, m ŋa nlandak ke m tii Jerusalem ni Juda aanib tinyoor. Kina pu na, taa san ijawaan man.

¹⁶ Naah ga ŋa tiwan ni na sɔ: Li len ibamɔn tɔb chee man. Libɔjil ponn ni kan, tii ibamɔn i ga joo ni nsuudoon na.

¹⁷ Ni taa ŋa nlandak ke ni tun niŋeen aatɔ taani. Ni taa puu tipuur ki ŋa inyamɔn aaseeraadaan. Maah kaa gee tiwan ni na le ye inyamɔn, ni ibamɔn gangal, ni mbimbin mu pɔɔ na.”

¹⁸ Uwumbɔr Mpɔɔnsakpiindaan le nan ki di tibɔr timina tuk min Sekaria:

¹⁹ “Bumɔb aalulm bu ni lulni ŋmanaa, ni ŋmaŋmu, ni ŋmalole, ni ŋmapiik ni na ga kpaln mpopiin, ni mmɔɔn aajim le ki tii Juda aanib. Ni li gee ibamɔn ni nsuudoon.”

²⁰ Uwumbɔr Mpɔɔnsakpiindaan nan ki len ke, “N‑yoonn choo, le binib ga nan nyan ni ntim pam ponn ni ki dan Jerusalem ni.

²¹ Kitiŋ kibaa ni aanib ga nan bui kiken ni aanib ke, ‘Ti cha ti ti doon Uwumbɔr Mpɔɔnsakpiindaan le ki mee u ban waanyoor. Cha ti buen man.’

²² Binib pam ni ŋitimbokpaan ga dan Jerusalem ki nan doon min Uwumbɔr Mpɔɔnsakpiindaan, ki mee limeel ban maanyoor.

²³ N‑yoonn ngbaan kan, biwɔwɔm kipiik ga dan nan bui Juu aanii ubaa ke, ‘Ti ban ke ti nan kpaan saanaan ni la, ba pu? ti ŋun ke Uwumbɔr bi ni chee.’”