Sekaria 4 - Uwumbɔr aagbaŋ

Karyaa aah chɔŋni tiwan ni pu na aadaŋ

¹ Ntuun mu nan bi len m chee tibɔr na nan ki dan nan faa fiin mi ke maah dɔ geen le na.

² U nan baa mi ke, “Aa waa ba?” Le m gar u ke, “Karyaa aah chɔŋni salmaa aawan ni pu na. Likpasambil chɔk ni paacham. Karyaa tiib bilole le chɔk ni pu ki kpa ŋipal.

³ Olif aakpan aasui ilee le nan si gbɔk ni, bubaa si lipepel libaa, le buken mu si liken.”

⁴ Le m baa ntuun ngbaan ke, “Uninkpel, tiwan ngbaan aatataa ye kinye?”

⁵ Le u baa mi ke, “Saa nyi ii?” Le m gar u ke, “Uninkpel, mbamɔn, maa nyi.”

^10b Le ntuun ngbaan bui mi ke, “Karyaa tiib bilole ngbaan ye Uwumbɔr aanimbil ŋilole ŋi u joo lik dulnyaa wee mɔmɔk na la.”

¹¹ Le m baa u ke, “Tɔ, olif aakpan aasui ilee i si tiwan ngbaan aapepel ŋilee ngbaan na aatataa ye kinye?

¹² Tɔ, olif aabon ilee i bi gbɔk salmaa aakudɔ ilee i kpa tiloln aan olif aakpan diir koo na, mu aatataa ye kinye?”

¹³ Le u baa mi ke, “Saa nyi ii?” Le m gar u ke, “Uninkpel, mbamɔn, maa nyi.”

¹⁴ Le u bui mi ke, “Ima le ye bijab bilee bi Uwumbɔr, u ye kitiŋ kee mɔmɔk Aawumbɔr na, nyan bi ke bi li tun waatuln na.”

Uwumbɔr aah puu tipuur ti tii Serubabel na

⁶ Ntuun ngbaan le nan di tibɔr ti Uwumbɔr di tuk u na tuk mi, ke m di nabr Serubabel ke, “Aa ga nyaŋ, ni mu aan li ye bijab aapɔɔn, bee sin aabaa aapɔɔn, ni ga li ye Maafuur Nyaan aapɔɔn pu la.

⁷ Ŋimuk ŋi filk ke ŋijoo na ga san cha si. Aa ga ki gir maa Maadichal; aa yaa ti di kookoo aatakpal di paan kan, le binib ngbaan ga teen mpɔɔn pu ke, ‘Kinyaan, kinyaan.’”

⁸ Uwumbɔr aabɔr tiken nan ki fuu ni m chee.

⁹ U nan bui ke, “Serubabel bil Maadichal aadinyikl aatakpal, le ki ga maa li doo. Nimina yaa nan ŋa kan, maanib ga bee ke min le tun ni si bi chee.

^10a Lituln ngbaan aah kaa chuun mala mala na, le bitaakpab yɔl. Tɔ, bi ga kan ke Serubabel beenin maa Maadichal cha la, le bisui ga piir.”