Sekaria 3 - Uwumbɔr aagbaŋ

Maah nan kan Uwumbɔr aatotoorninkpel tidaŋ ni pu na

¹ Tidaŋ tiken ponn ni le Uwumbɔr nan di waatotoorninkpel Josua mɔk mi, u si Uwumbɔr aatuun aanimbiin ni. Le kinimbɔŋ mu si gbɔk Josua, ki kii ke u galn u.

² Uwumbɔr aatuun ngbaan nan bui kinimbɔŋ ke, “Sin kinimbɔŋ, Uwumbɔr bui ke aa ŋmin. Uwumbɔr u gee Jerusalem na bui ke aa ŋmin. Uja wee bi ke ndɔ mu bi chuu daa nyan mmii ni na la.”

³ Josua nan si nima chee, le ki pee tiwanpeenkaan ni kpa tijɔŋ na.

⁴ Ntuun ngbaan nan bui paacham yaab bi bi u chee na ke, “Chuu peer uja wee aah si pee tijɔŋ aawan ni na,” le ki bui Josua ke, “M chuu nyan saatunwanbir aa pu, le ki ga tii si tiwanpeenkaan nyaan aa peen.”

⁵ Le m bui ke, “Cha bi di kiyikpupuk ki kaa kpa tijɔŋ na chiŋ Josua aayil pu.” Le bi ŋa kina, le ki di tiwanpeenkaan nyaan na peen u, Uwumbɔr aatuun ngbaan aanimbil ni.

⁶ Le ntuun ngbaan nan bui Josua ke

⁷ Uwumbɔr Mpɔɔnsakpiindaan len ke: “Aa yaa joo maakaal, ki tun lituln li m di tii si na kan, aa ga li beenin ye Maadichal ni laachin aajojoor, le m ga tii si nsan ke aa dan nnimbiin ni ke maatuuntiib ngbaan.

⁸ Kina pu na, Josua, sin u ye Utotoorninkpel na, ni nimi bi ye utotoorŋeen aatɔtiib ki ye n‑yoonn mu choo na aamɔkl nyaan na, li pel man: M ga nyan maatutunn, u bi yin u ke Mbon ngbaan na mpaan pu.

⁹ M ban m di litakpal libaa li kpa ŋipepel ŋilole na bil Josua aanimbiin ni. M ga di kichiln ŋmee tiwan paan li pu, le ki di liwinbaal nyan kitiŋ kimina aatunwanbir.

¹⁰ Nwiin ngbaan yaa nan fuu ni kan, ni mɔmɔk ga yin niŋeen aatɔtiib ke bi dan ki nan ji nsuudoon ni ŋŋmarm aamɔɔn, le ndaan aasubil aasar ni ŋisubil ŋiken ga mann goln nimi.” Uwumbɔr Mpɔɔnsakpiindaan le len kina.