Sekaria 2 - Uwumbɔr aagbaŋ

Ŋŋmin mu bi joo ŋaŋni tiwan na aadaŋ

¹ Tidaŋ tiken ponn ni le m nan kan uja ubaa joo ŋŋmin mu bi joo ŋaŋni tiwan aafɔfɔk na uŋaal ni.

² Le m baa u ke, “Aa cha la chee?” Le u gar mi ke, “M cha m ti ŋaŋ Jerusalem aatiŋ la, m ban m ti ŋaŋ ki, ki bee kaafɔfɔk ni kaawawaan aah ye pu na la.”

³ Le m kan ntuun mu ba bi len m chee tibɔr na nyan sil ni, le ntuun muken dan nan sil mu chee.

⁴ Le njan aatuun na bui uŋeen aatɔ na ke, “Li san ki ti bui unachipɔɔn u joo ŋŋmin mu bi joo ŋaŋni tiwan aafɔfɔk na, ke binib ni tiwakor ti ga li bi Jerusalem aatiŋ ni na ga li wiir pam, le Jerusalem aatiŋ ga li wiir ki jer baah ga ŋmaa maa ŋigon gob ki pu na.

⁵ Uwumbɔr puu ke uma ubaa le ga li ye mmii aagoln ki mann goln kitiŋ ngbaan ki ga li kii ki, le ki ga li bi ki ni, ki wiin chain.”

Uwumbɔr bui waanib ke bi gir kun Jerusalem

^6-7 Uwumbɔr nan bui waanib ke, “Min le nan cha ni yaa koo ŋipepel mɔmɔk ni. Tɔ, dandana wee, nimi binaagbiib, san nya Babiloŋ aatiŋ ni, ki gir ni Jerusalem aatiŋ ni man.”

⁸ Uwumbɔr Mpɔɔnsakpiindaan u kpa kipak mɔmɔk na di tibɔr timina tun mi ŋitimbol ŋi nan jan ki gaa waanib aawan na chee ke: “Unii umɔk faa maanib na faa tiwan ni m gee sakpen ke nnimbil na la.

⁹ Min Uwumbɔr ubaa le ga daa nimi ŋitimbol ngbaan aatafal, le binib bi nan ye nimi aanaagbiib na ga gaa nimi aawan mpɔɔn kijaak ponn ni.” Buyoonn nimina nan ŋa na, le ni ga bee ke Uwumbɔr Mpɔɔnsakpiindaan le tun ni mi.

¹⁰ Uwumbɔr nan ki bui ke, “Jerusalem aanib, li gaa mpopiin aalahn. M choo m nan li koo ni chee la.”

¹¹ N‑yoonn ngbaan kan, ŋitimbol pam ga dan Uwumbɔr chee, ki nan kpaln waanib. U ga nan li koo ni chee, le ni ga bee ke uma le tun ni mi.

¹² Juda aapepel ga ki gir ŋa Uwumbɔr aawankpaan ki bi waatiŋ ki bi chain na pu, le Jerusalem li ye kitiŋ ki u gee jer ntim muken na.

¹³ Ni mɔmɔk ŋmin chii Uwumbɔr aanimbiin ni man, ba pu? u nyan ni waakookoo yaan ni bi chain na ni, le ki choo.