Sekaria 14 - Uwumbɔr aagbaŋ

Jerusalem ni ŋitimbol ŋiken aabɔr

¹ Nwiin mundaal Uwumbɔr ga kal ki ji binib tibɔr na peen ni a. Le bi ga yoor Jerusalem aawan mpɔɔn buen, ki ga yakr tiwan ngbaan ninimbil ni.

² Uwumbɔr ga kuun ŋitimbol mɔmɔk nan kpaan, le ŋi tak Jerusalem. Bi ga nyaŋ kitiŋ ngbaan, le ki yoor ŋidichal ni tiwan mpɔɔn, ki chur bipiib mpɔɔn ki doon bi chee. Bi ga di binib ngbaan ligetekr libaa buen tinaagbiir ni, kitiyayaŋ ni, le ligetekr li gur na ga gaar kitiŋ ngbaan ni.

³ Le Uwumbɔr ga nya ki ti tak ŋitimbol ngbaan, ke waah nan ŋani pu n‑yaayoonn na.

⁴ N‑yoonn ngbaan kan, u ga ti li si Olif Aasui Aajool li bi Jerusalem aawipuul wɔb na pu la. Le Olif Aasui Aajool ngbaan ga bool nfum mulee, le kifataŋ sakpeŋ doon kaasisik ni, ki nya liwipuul ki ti saa liwilir. Libool libaa ga di toŋ ŋŋangan wɔb, le liken na di toŋ ŋŋangii wɔb.

⁵ Kifataŋ ki yakr lijool limina nfum mulee na ponn ni, le ni ga dii ki san ŋmar. Ni ga san ke kitiŋ aah nan puu, Juda aabɔr Usia aayoonn, aan niyaajatiib nan san pu na. Ndindaan Uwumbɔr ga joo ni waatuuntiib mɔmɔk ki dan.

⁶ N‑yoonn ngbaan yaa nan fuu ni kan, tiwoor aan ki li bi,

⁷ le libɔmbɔln mu aan li bi. Nwiin ga li bi nwiin pu ni kinyeek mu la. Uwumbɔr baanja le nyi buyoonn nimina ga ŋa na.

⁸ Nwiin ngbaan daal yaa nan fuu ni kan, nnyunpɔm ga li puu nya ni Jerusalem ni. Ligetekr libaa ga li puu cha N‑yaan Aanyusakpem ni, le liken puu cha Kaasisik ni Aanyusakpem ni. Mu ga li puu n‑yoonn mɔmɔk libiln ni la. Mu ga li puu lipeel ni kiseek ni la.

⁹ Le Uwumbɔr ga li ye kitiŋ kee mɔmɔk aabɔr. Unii mɔk ga li dooni u ke u ye Uwumbɔr, le ki li nyi u liyimbil ngbaan pu.

¹⁰ Lipepel ngbaan mɔmɔk ni, ki nya Geba aatiŋ ki bi ŋŋangan wɔb na, ki ti saa Rimonn aatiŋ ki bi ŋŋangii wɔb na ga ŋa taar. Kitiŋ ki mann Jerusalem ki ti ton na ga li waa ki. Kitiŋ ngbaan ga nya mbisamɔb mu bi yin mu ke Benjaminn Aabisamɔb na, ki ti saa mu bi yin mu ke Kilɔlɔŋ ni Aabisamɔb, nin chee mbisamɔb nan puen bi na, ki nya Hananel Aakikiib Aadifɔfɔk na chee ki ti saa libɔrchiln ni aasubil aadaan aabuu aah bi nin chee na.

¹¹ Binib ga li koo nima ni nsuudoon la. Ubaa aan ki di libiil aabɔr faan bi.

¹² Uwumbɔr ga cha iween i bir na nan lir ŋitimbol ŋi mɔmɔk tak Jerusalem na pu. Ŋaanib aawon ga bur le bi laa fu. Binimbil ni bilambil ga bur lir.

¹³ N‑yoonn ngbaan kan, Uwumbɔr ga ŋmal bilan ki cha ijawaan chuu bi sakpen, le umɔk fenn kan uŋeen aatɔb na kan, u ga tak u.

¹⁴ Juda aajab ga jan Jerusalem pu. Bi ga yoor ŋitimbol ŋiken aasalmaa, ni tikunabr, ni tiwanpeenkaan, ni ŋaawangol na mpɔɔn di buen.

¹⁵ Iween i bir na mu ga lir baadim aawakor mɔmɔk pu, baakakaa ni. I ga lir itaan, ni tiwakor ti naahn ibon na, ni laakumii tiib, ni ibon pu.

¹⁶ Le binib bi mɔmɔk ŋmar ŋitimbol ŋi nan tak Jerusalem na ga li chaa nima libiln mɔk ni ki ti dooni Uwumbɔr Mpɔɔnsakpiindaan ke ubɔrkpaan na. Bi ga li chaa ti ji Tikakar mu aajim nima.

¹⁷ Litimbol limɔk yii kaa chaa ti dooni Uwumbɔr Mpɔɔnsakpiindaan ke ubɔrkpaan na kan, utaal aan nu baatiŋ pu.

¹⁸ Ijipt yaab yaa yii kaa ji Tikakar Aajim kan, iweenbaan i Uwumbɔr tii litimbol limɔk yii kaa chaa na le ga lir bi pu.

¹⁹ Ijipt yaab ni ŋitimbol ŋimɔk yii kaa ji Tikakar aajim na aatafadaan le na.

²⁰ N‑yoonn ngbaan kan, hali ŋibɔlun ŋi lee itaan aatangar pu na ga li kpa ŋŋmeen ke “Uwumbɔr Yaan.” Uwumbɔr Aadichal ni aakumbuu ga li bi chain ke ŋisambil ŋi si kitork aabimbiln taab na la.

²¹ Ŋikumbuu ŋimɔk bi Jerusalem ni Juda aapepel liken mɔmɔk ni na ga kpaln Uwumbɔr Mpɔɔnsakpiindaan aadoon aawan la. Binib bi toor kitork na ga li joo ŋima le ŋaani kitork aanann. N‑yoonn ngbaan yaa nan fuu ni kan, binib bi tiir kitiirk na aan ki li bi Uwumbɔr Mpɔɔnsakpiindaan Aadichal ni.