Sekaria 12 - Uwumbɔr aagbaŋ

Jerusalem aah ga kan ŋŋmarm n‑yoonn mu choo na pu na

¹ Uwumbɔr aah nan len Israel aabɔr ti na sɔ. Uma le ye Uwumbɔr u taln kitaapaak na. Uma le naan kitiŋ, le ki tii unibɔn limɔfal. U len ke,

² “M ga ŋa Jerusalem ke kidayikuuk na la. Ŋitimbol ŋi mann goln ki na ga nyu, le ki chuun gbeer ke bidagbiib na. Le bidim yaa nan gob Jerusalem kan, bi ga gob Juda aatim mu mɔmɔk gur na.

³ Tɔ, n‑yoonn ngbaan yaa nan fuu ni kan, m ga cha Jerusalem nyuŋ ke litakpal sakpeln na. Le litimbol li pɔɔn libaa ke li yoor li na kan, li kan titotonn. Dulnyaa aatimbol mɔmɔk ga kuun nan kpaan ke ŋi tak Jerusalem.

⁴ N‑yoonn ngbaan kan, m ga cha ijawaan chuu baataan mɔmɔk ki cha bijab bi dik i pu na mɔmɔk waar. M ga li lik Juda aanib, le ki cha baadim aataan jɔb.

⁵ Le Juda aayidam ga bui bibaa ke, ‘Tidindaan Uwumbɔr Mpɔɔnsakpiindaan tii waanib bi koo Jerusalem ni na mpɔɔn.’

⁶ “N‑yoonn ngbaan kan, m ga ŋa Juda aataŋaal ke kichook ni aamii na la, bee mmii mu bi njikaabim mu kuur na aakpaab ni pu na la. Bi ga kuln ŋitimbol ŋi mɔmɔk mann goln bi na. Jerusalem aanib ga li bi lifuur ni, baatiŋ ponn ni.

⁷ “Min Uwumbɔr le ga puen di linyaŋ tii Juda aajab. Kina kan, liyimbil li ubɔr David aayaabitiib ni Jerusalem aanib ga kan na, aan jer Juda yaab bi gur na.

⁸ N‑yoonn ngbaan kan, Uwumbɔr ga li kii binib bi bi Jerusalem ponn ni na, le ki cha udaburdaan u ŋmal bi ni na pɔɔk, ke David aah nan bi pu na. David aayaabitiib le ga loln bi pu nsan ke Uwumbɔr aatuun na. U ga loln bi pu nsan ke Uwumbɔr ubaa na la.

⁹ N‑yoonn ngbaan kan, litimbol limɔk pɔɔn libaa ke li tak Jerusalem na kan, m ga kuln li.

¹⁰ “M ga cha David aayaabitiib ni Jerusalem aanib biken li kpa linimbaasaln, le bi ga li ban ke bi mee mi. Bi ga li lik baah saa ku u na pu la, le ki ga wii waakpuul ke baah wii libibaal aakpuul pu na. Bi ga wii waakpuul ke binib aajapɔnbaal yaa kpo kan, bi wii pu na la.

¹¹ N‑yoonn ngbaan kan, Jerusalem aakpowiil ga nyaŋ ke liwaal Hadad Rimonn li bi Megido aatiŋ ni na aakpowiil aah nan nyaŋ pu na la.

^12-14 Lidichal limɔk bi kitiŋ ngbaan pu na ga li wii libaa la; David aadichal yaab ga li wii bibaa la, le Natann aadichal ga li wii bibaa, Liifai yaab mu ga li wii bibaa, Simei aadichal mu yaab ga li wii bibaa, le ŋidichal ŋi gur na mu ga li wii ŋibaabaa. Lidichal mɔk ga wii laakpuul libaa la, le bijab ni bipiib aan kpaan wii likpuul.”