Sekaria 11 - Uwumbɔr aagbaŋ

Mbiindam aah lir pu na

¹ Lebanonn aatiŋ, chuu piir saajaaleŋ tiib, aan mmii wu saasantina aasui.

² Santina tiib aah lir pu na, nimi ŋisalaasii, li wii ki kaani man; isui i kpa kinyaan na bii doo a. Isukpaan i bi Basann ni na, li wii ki kaani man, ba pu? kichook sakpeŋ na lir a.

³ Bijojoob na wii mpombiin pu la; baapɔɔn mɔmɔk doo a. Li pel ichinn aah ŋuuni pu na; kichook ki ponn ni i koo Jɔɔdann aamɔɔl aagbaan na kuln a.

Bipihkpaab bilee aabɔr

⁴ Ndindaan Uwumbɔr nan bui mi ke, “Ŋa ke sin le ye upihkpaal u aapiih bi joo i cha bi ti kɔr na.

⁵ Idindatiib ku i, le ubaa aa dar bitafal. Bi kooh yaanann le ki bui ke, ‘Ti pak Uwumbɔr, ti kan liwangol. Hali binib bi kpaa i na aa san i kinimbaak.’”

⁶ Uwumbɔr ki bui ke, “Maan ki san unii ubaa kinimbaak kitiŋ kee pu. Min mbaa le ga di binib mɔmɔk ŋa baajojoob aaŋaal ni. Bijojoob ngbaan le ga bii kitiŋ, le maan gaa ki lii.”

⁷ Binib bi daa ki kooh ipiih na, nan pan mi, le m kpaln ipiih i bi joo i cha bi ti kɔr na aapihkpaal. M nan ban idɔ ilee, m nan yin mubaa ke “Lineen” le ki yin muken na ke, “Kimɔbaan.” Le m nan kpaa ipiih ngbaan.

⁸ Maaŋuul nan fii bipihkpaab bitaa bi kaa gee mi na pu, le m jenn bi mɔmɔk uŋmabaan ni.

⁹ Le m bui ipiih ngbaan ke, “Maan ki li ye unii u kpaa nimi na. Cha i ga kpo na kpo. Cha baah ga kuln i na, bi kuln i. I gur na le ga kuln tɔb.”

¹⁰ Le m nan yoor ndɔ mu m yin mu ke “Lineen” na, le ki nyii koo mu, ke m bii tipuur ti Uwumbɔr nan puu tii ŋitimbol mɔmɔk na.

¹¹ Kina pu na, liyaadaal ngbaan le tipuur ngbaan aabɔr nan doo. Binib bi nan daa ki kooh ipiih na nan si lik mi, le ki bee ke Uwumbɔr le bi tuk bi tibɔr, maatuln ngbaan ni.

¹² Le m bui bi ke, “Ni yaa gee kan, pa mi maapar man. Tɔ, ni yaa kaa gee kan, ni li joo li.” Le bi tii mi tikur aamombil piitaa.

¹³ Uwumbɔr nan bui mi ke, “Di ŋi ŋa Maadichal aamombil ni.” Le m nan yoor tikur aamombil piitaa ŋi bi nan dak ke ŋi ŋeer maadaak na, ki di ŋi ŋa Uwumbɔr Aadichal aamombil ni.

¹⁴ Le m yoor ndɔ muken na, mu m yin mu ke “Kimɔbaan” na, ki nyii koo mu, le kimɔbaan ki nan bi Juda ni Israel aakaasisik ni na yaa.

¹⁵ Le Uwumbɔr nan ki bui mi ke, “Ki gir ŋa ke saah ye upihkpaal u kaa bi tibaa ni na.

¹⁶ M ban upihkpaal tii maapiih, le waa ter ipiih i bi ban bi ku i na. Waa ban kani i wɔŋ na, kaa tei i bun na, kaa kpiini i ŋmar na mu. U tee labr le ki ŋmɔ isakpiin na aanann, le ki dar par itaabuseen.

¹⁷ Upihkpaal fam ngbaan aamɔfal junn a. U san cha waapiih. Butɔb ga bii waapɔɔn pel pel. Uŋaal ga faan, le unimbigiir mu jɔb.”