Sekaria 10 - Uwumbɔr aagbaŋ

Uwumbɔr puu ke u ga gaa waanib lii

¹ Mee Uwumbɔr ke u cha utaal nu unaalan yoonn. Uwumbɔr le cha utaal aataalangbam ni titaapupur choo, le ki cha timoor bunn ki tii unibɔn mɔmɔk.

² Binib chaa bibɔɔb ni ŋiwaa chee ti buu tibɔɔr, ni mu aah tuk bi tibɔr ti na ye inyamɔn le kaa kpa ŋitaa. Bibaa mu bui ke bi nyi tidaŋ aatataa, le ki cha ni yenni. Bi mɔmɔk aah tii mpopiin mu na ye fam la. Kina pu le binib ngbaan chuun yiini ke ipiih i wɔŋ na. Baah kaa kpa usaloln na le cha bi bi tibɔr ni.

³ Uwumbɔr bui ke, “Biwɔwɔm bi joo maanib na le cha maaŋuul fii sakpen, le m ga daa bitafal. Juda aanib ye maanib la, le min Uwumbɔr Mpɔɔnsakpiindaan ga li joo bi. Bima le ga li ye maatɔb aataan i pɔɔ na.

⁴ Bi ponn ni le bijojoob, ni bisalolm, ni bijab aaninkpiib ga nyan ni, ki nan li joo maanib.

⁵ Juda aanib ga kan linyaŋ ke bijab bi taa taa baadim ŋmal titan ni kitiŋ ponn ni na la. Uwumbɔr aah bi bi chee na, le bi ga jan, hali ki nyaŋ bidim aatandam.

⁶ M ga tii Juda aanib mpɔɔn; m ga gaa Israel aanib lii. M ga san bi kinimbaak, ki giin ni bi mɔmɔk linampal. Bi ga li bi ke maah kaa kee yii bi daalbaadaal le na. Min le ye Bidindaan Uwumbɔr; m ga kii baameel.

⁷ Israel aanib ga li pɔɔ ke butɔb aajab na la, ki ga li kpa mpopiin ke binib bi bi nyu ndaan na. Biyaabitiib ga nan teer linyaŋ lee pu, le Uwumbɔr aah ŋa pu tii bi na, bi ga li kpa mpopiin.

⁸ M ga yin maanib, ki kuun bi nan kpaan. M ga gaa bi lii, ki cha bi ki wiir ke baah nan bi pu na.

⁹ M cha bi yaa ki koo ŋitimbol ni, bi mu ga li bi dandar le ki teer mbɔr. Bi ni baabim ga ŋmar, le ki kpaan gir kun ni.

¹⁰ M ga nyan ni bi Ijipt ni Asiria aatim ni ki giin bi kunn ni ki nan di bi kaan baatiŋ pu. M ga kaan bi Gilead ni Lebanonn mu aatim ni; kitiŋ ngbaan mɔmɔk ga kpaln binib ŋmeen la.

¹¹ Bi yaa nan nyan baabɔbir ti wiir ke nnyusakpem na ni kan, le min Uwumbɔr ga nyii tinyunkpenn, le Nail aamɔɔl ga foor ki cha kitikuun. M ga sunn Asiria aatiŋ aagaak taab, le mpɔɔndaan Ijipt aatiŋ aapɔɔn ga doo.

¹² M ga tii maanib mpɔɔn; bi ga kii maamɔb ki li dooni mi.” Uwumbɔr le len kina.