Sekaria 1 - Uwumbɔr aagbaŋ

Uwumbɔr aah yin waanib ke bi gir ni u chee pu na

¹ Ubɔr Darius aah nan ye Pesia aabɔrkpaan pu na aabileler ni aaŋmaniin ponn ni, le Uwumbɔr nan di tibɔr timina tuk waabɔnabr Sekaria. Sekaria aate le nan ye Berekia, le uyaaja ye Ido.

² Uwumbɔr Mpɔɔnsakpiindaan nan bui Sekaria ke u bui Israel yaab ke, “Min Uwumbɔr aaŋuul nan fii niyaajatiib pu sakpen,

³ le m bui nimi dandana wee ke, ‘Gir ni m chee man aan m mu gir ni ni chee.

⁴ Ni taa li bi ke niyaajatiib na. N‑yaayoonn na le bibɔnabr nan di maabɔr tuk bi, ki tuk bi ke bi taa ki tun titunwanbir, ki taa ki li bi kinimbɔŋ aabimbin ni. Le baa ŋun tii mi, kaa kii maamɔb mu.

⁵ Niyaajatiib ni bibɔnabr ngbaan aa ki bi.

⁶ M nan cha maatutum bi ye bibɔnabr na tii niyaajatiib ikaal ni nsurm, le bi yii i, le ki jin falaa i pu. Le bi bee ke bi tun taani, ki bee ke min, Uwumbɔr Mpɔɔnsakpiindaan le daa bitafal ke maah nan puu ke m ga ŋa pu na, ki ŋeer baah tun pu na.’”

Uwumbɔr aabɔnabr ngbaan aah daŋ tidaŋ ki kan itaan pu na

⁷ Darius aah nan ye ubɔrkpaan pu na aabileler aaŋmapiik ni ubaa, uŋmal u bi yin u ke Sebat na aawiin moninko ni inaa daal, le Uwumbɔr nan kpiir tibɔr tee tuk mi tidaŋ ni, kinyeek.

⁸ M nan kan Uwumbɔr aatuun dik utaman pu. U nan sil ikpasɔi aasui ibaa taab kifataŋ ni, le itaan i nan ye itaman, ni itachachal, ni itapiin na nan paa upuwɔb.

⁹ Le m baa u ke, “Maaninkpel, itaan yee aatataa ye kinye?” Le Uwumbɔr aatuun mu bi len m chee na gar mi ke, “M ga mɔk si yaatataa aah ye pu na.”

¹⁰ Le Uwumbɔr aatuun u si ikpasɔi aasui ngbaan taab na bui mi ke, “Uwumbɔr le tun i ke i chuun mann kitiŋ.”

¹¹ Tɔ, i nan tuk Uwumbɔr aatuun mu si ikpasɔi aasui taab ngbaan na yaah kan pu na ke: “Ti chuun dulnyaa mɔmɔk ni ki kan ke dulnyaa wee bi suuna la.”

¹² Le ntuun ngbaan bui ke, “Uwumbɔr Mpɔɔnsakpiindaan, saaŋuul nan fii Jerusalem ni Juda aatim pu ki ti saa ŋibin imonko itaa ni kipiik le na. Bayoonn aan aa ga san mu kinimbaak?”

¹³ Le Uwumbɔr di nsuudoon aabɔr ti ŋan na gar ntuun mu len m chee na.

¹⁴ Le ntuun ngbaan bui mi ke m di Uwumbɔr Mpɔɔnsakpiindaan aah len pu na moon ke: “M gee Jerusalem sakpen, le ntafal bi maatiŋ ki bi chain na ni,

¹⁵ le maaŋuul fii ŋitimbol ŋi kpa kigaak ki bi nsuudoon ni lifuur ni na pu sakpen. Buyoonn m nan laa joo maaŋuul ke li taa pii maanib na, le ŋitimbol ngbaan nan cha maanib aafalaa moo nyaŋ.

¹⁶ Kina pu le m gir ni Jerusalem aatiŋ ni ke m nan mɔk ki maanimbaasaln. Maadichal ga ki gir sil, le bi ga ki gir maa kitiŋ ngbaan.”

¹⁷ Ntuun ngbaan nan ki tuk mi ke m moon ke: “Uwumbɔr Mpɔɔnsakpiindaan bui ke waatim ga ki kan nkam, ke u ga ki ter Jerusalem ki di ki ŋa ubaa aatiŋ.”

Iyiin aadaŋ

¹⁸ Tidaŋ tiken ponn ni le m nan kan inaayiin inaa.

¹⁹ M nan baa ntuun mu nan bi len m chee tibɔr na ke, “Iyiin ngbaan aatataa ye kinye?” Le u nan gar mi ke, “I si dulnyaa wee aapɔɔn inaa i yaa Juda, ni Israel, ni Jerusalem aanib na aasisii la.”

²⁰ Le Uwumbɔr nan di bichaab binaa mɔk mi.

²¹ Le m baa ke, “Bichaab bee dan bi nan ŋa ba?” Le u gar mi ke, “Bi dan ke bi nan faan ki kuln ŋitimbol ŋi wii Juda aatiŋ ki yaa kaanib na la.”