Sefania 3 - Uwumbɔr aagbaŋ

Jerusalem yaab aatunwanbir

¹ Jerusalem, kitiŋ ki tun beebee aatuln ki muk kibaa aanib na kuln a.

² Ki yii, kaa ŋun tii Uwumbɔr, kaa kii waasurm, kaa kii tii u, kaa ban u chee nterm.

³ Kaaninkpiib bi ke ichinn i ŋuuni na la; le kaabɔjirb naahn takɔ tiib bi nkon joo bi na, kaan ŋmaa mɔr ke likpabl li dɔ ki ti woln kitaak.

⁴ Uwumbɔr aabɔnabr bi bi ki ponn ni na kpa kigaak kaa kpa mbamɔn; le bitotoorb bii tiwan ni bi chain na, le ki fenn Uwumbɔr aakaal diir baah gee niwɔb na.

⁵ Tɔ, Uwumbɔr mu tee beenin bi kitiŋ ngbaan ponn ni; u ŋani tiwan ni ŋan na n‑yoonn mɔmɔk, kaa ŋani tiwan ni kaa ŋan na kpala. U cha ibamɔn bi waanib chee kichakpiik mɔmɔk ni, le kaa yiil. Le binib bi bi nima chee aan baabimbin aa ŋan na tun taani, kaa san inimɔɔn.

⁶ Uwumbɔr bui ke, “M ŋar ŋitimbomɔn ŋŋaan; m kuln ŋaatim ki cha ŋaagon ni tidifɔfɔŋ na ber doo. Bi fii cha ntim ngbaan a, ubaa aa ki bi mu ponn ni, ubaa aa gur.

⁷ N‑yoonn ngbaan le m nan dak ke maanib ga san mi ki kii maasurm, aan baatiŋ taa kuln, aan maatafadaan mɔmɔk taa dan bi pu. Tɔ, bi nan beenin neen ke bi li tun beebee aatun baatuln mɔmɔk ni.”

⁸ Uwumbɔr nan ki bui ke, “Ni li kii man. Li ŋmin man ki li kii bundaal aan m ga fii sil ki galn ŋitimbol na. M ŋa nlandak ke m kuun ŋitimbol ni nnaan, ki cha ŋi bee maaŋuul aah pɔɔ pu na. M ga di maaŋuusakpeln li wu ke mmii na le di kuln kitiŋ kee mɔmɔk.

⁹ “N‑yoonn ngbaan le m ga kpeln ŋitimbol ngbaan aanib aabimbin, le bi ga li gur mee min baanja ki taa ki mee liwaal libaa. Bi mɔmɔk ga kii maamɔb.

¹⁰ Hali maanib bi yaa ki bi Kus aatiŋ ni dandar dandar na ga joo ni ipiin nan tii mi.

¹¹ N‑yoonn ngbaan na, nimi maanib aan ki san inimɔɔn ke ni nan nyan mpuwɔb. M ga nyan binib bi mɔmɔk kpa kigaak ni kipupuk na ni ponn ni, le naan ki li kpa kalimbaani maagongoln li bi chain na pu daalbaadaal.

¹² M ga cha binib bi aabimbin ŋan aan bi sunn bibaa taab ki ga dan m chee ki nan ban nterm na le li bi nima.

¹³ Israel aanib bi ŋmar na aan tun ubaa taani, kaan gii inyamɔn, kaan ŋmann ubaa. Bi ga kan liwangol, ki li bi ŋŋmarm ni, kaan li san unii ubaa ijawaan.”

Mpopiin aalahn

¹⁴ Israel aanib, li mɔɔni ki tar man. Jerusalem aatiŋ, li mɔɔni sakpen.

¹⁵ Uwumbɔr kuln nimi aatafadaan a; u nyaŋ nimi aadim mɔmɔk a. Uwumbɔr u ye Israel yaab aabɔr na bi ni chee; taa ki san ijawaan man.

¹⁶ N‑yoonn choo, le bi ga nan bui Jerusalem aanib ke, “Sionn aanib, taa san ijawaan man. Taa cha niwon yɔl.

¹⁷ Nidindaan Uwumbɔr bi ni chee; waapɔɔn le tii nimi linyaŋ. Uwumbɔr ga li neen nimi le ki ga tii nimi limɔfapɔln waageehm ni. Nimi pu le u ga gaa ilahn ki li kpa mpopiin,

¹⁸ ki li kpa mpopiin ke binib bi bi ji njim na.” Uwumbɔr nan ki bui ke, “Maan ki faan nimi ke m ga kuln nimi; m nyan nimi aanimɔɔn ni pu a.

¹⁹ N‑yoonn choo, le m ga daa binib bi muk nimi na aatafal; m ga gaa binib bi mɔmɔk ye biwɔb na lii, ki giin ni binib bi bi tinaagbiir ni kitiyayaŋ ni na linampal. M ga cha baanimɔɔn kpaln nnyuŋ, le dulnyaa mɔmɔk ga li pak bi.

²⁰ N‑yoonn ngbaan choo, le m ga giin ni nimi aanib bi yaa na linampal; m ga cha ni li kpa liyimbil dulnyaa wee mɔmɔk ni, ki cha ni ki gir kan liwangol.” Uwumbɔr le len kina.