Sefania 2 - Uwumbɔr aagbaŋ

Fenn gir ni Uwumbɔr chee man

¹ Ŋa nlan, sin maasanimɔɔn aatimbol,

² waahr aan ki nin kuur ki kpo ke mmopuun na, waahr aan Uwumbɔr nin mɔk waaŋuul li wu ke mmii na aawiin nin fuu ni aa chee.

³ Fenn gir ni Uwumbɔr chee, nimi binib bi mɔmɔk sunn nibaa taab ki kii waakaal na, fenn gir ni u chee man. Ŋa tiwan ni ŋan na man, ki sunn nibaa taab Uwumbɔr aanimbiin ni. Nibaakan, ni ga nan nya ntafadaan ni, bundaal aan Uwumbɔr ga nan nyan waaŋuul paacham na.

Ŋitimbol ŋi mann goln Israel aatimbol na aah ga kuln pu na

⁴ Unii ubaa aan gur Gasa aatiŋ ni. Bi san cha Askelonn aatiŋ nkuun a. Liwingeln le bi ga di jenn nyan Asdod aanib baatiŋ ni, ki jenn nyan Ekronn aatiŋ aanib mu.

⁵ Nimi Filistia yaab bi bi nnyusakpem aagbaan na, ni kuln a. Uwumbɔr jin nimi tibɔr ki siin waah ga ŋa nimi pu na a. U ga kuln nimi, le ni ponn ni ubaa aan ŋmar.

⁶ Nimi aatiŋ ki bi nnyusakpem aagbaan na ga li gur ye bipihdam ni ipiih aabɔkpenn ŋmeen la.

⁷ Juda aanib bi ŋmar na le ga gaa nimi aatiŋ. Baawakor ga li ŋmɔ timoor nima chee la, le bi mu li doo Askelonn aanib aadichal ni. Bidindaan Uwumbɔr ga li bi bi chee ki cha bi ki kan liwangol.

⁸ Uwumbɔr Mpɔɔnsakpiindaan bui ke, “M ŋun Moab yaab ni Amonn yaab aah seei maanib ki bii bi pu, ki kpa kipupuk baah ga gaa baatiŋ pu na.

⁹ Maah sil ye Uwumbɔr u bi n‑yoonn mɔmɔk, ki ye Israel yaab Aawumbɔr na, m puu ke m ga kuln Moab ni Amonn aatim ke maah nan kuln Sodom ni Gomora aatim pu na. Mu ga kpaln baah gbii n‑yaan nin chee na, ni baah kuln nin chee kookoo aan timoor gaa nima chee na la. Maanib bi ŋmar na ga yoor baawan ni baatiŋ mu.”

¹⁰ Kina le Uwumbɔr Mpɔɔnsakpiindaan ga daa Moab yaab ni Amonn yaab bi kpa kigaak ni kipupuk ki seei waanib na aatafal.

¹¹ Uwumbɔr ga cha ijawaan chuu bi. U ga cha kitiŋ kee pu aawaa taa ki li ye nibaa, le ŋitimbol mɔmɔk aanib li gur dooni u baatim ni.

¹² Uwumbɔr ga ku Kus aatiŋ aanib mu.

¹³ Uwumbɔr ga di waapɔɔn kuln Asiria aatiŋ. U ga cha kaatiyil Ninefa kpaln tilangbenn, ni nteersakpiin mu kaa kpa nnyun na.

¹⁴ Nima chee le ipiih, ni iŋoob, ni inaa, ni tiwakor mɔmɔk aabɔŋ ga li doo. Ifiin ga li koo kaalangbenn ni, le ki wii takolu tiib ni kinyeek. Ikakal ga li tɔk ibisamɔi pu le ki wii nima. Santina tiib aadɔ i bi di maa baadichal na ga nya lir kitiŋ,

¹⁵ kina le u ga ŋa kitiŋ ki kpa kigaak sakpen kibaa aapɔɔn pu, ki dak ke nibaa aan ŋmaa ŋa ki na. Kaanib dak ke baatiŋ le pɔɔ jer ntim mɔmɔk dulnyaa wee ni. Ki ga kpaln tilangbenn la, le ipeel ga li doo nima chee ki fuur. Unii umɔk jer nima chee na ga sur upuwɔb ijawaan pu.