Ruf Aagbaŋ 3 - Uwumbɔr aagbaŋ

Ruf aah ki kan uja pu na

¹ Naah ŋa iwiin ilee na, le Naomi bui Ruf ke, “Ni ŋan ke m ban uja tii si aan aa ki li kpa aabaa aachiln ki fuur.

² Aa teer uja u bi yin u ke Boas aan aa ni waanaagbiipiib bi tun lituln na, ke u ye tido yoo la. Tɔ, li pel. Kijook kee le u ga chaar waajikaabim.

³ Kina pu na, fu nnyun, ki ŋa tulalee, aan ki ban saakeken ŋi ŋan na di gbab. Aa yaa ŋa kina kan, buen nin chee u bi poi idi na, aa mu taa tee cha u bee ke aa bi nima waahr aan u nin ji ki nyu doo.

⁴ Pɔɔk aabaa ki bee waah dɔ nin chee na; le u yaa geen kan, aa buen ti fiir waakekeln ki doon gbaŋ u, utaa chee. U ga tuk si saah ga ŋa pu na.”

⁵ Le Ruf bui ke, “M ga ŋa saah bui mi ke m ŋa pu na mɔmɔk.”

⁶ Kina pu le Ruf nan buen lidipoipaal ngbaan chee ki ti ŋa uchapii aah tuk u ke u ŋa pu na mɔmɔk.

⁷ Boas aah nan jin ki nyun doo na, le usui piir. Le u buen lidikpukl libaa pu ki ti doon ke u geen. Ruf nan loon suuna, ki ti fiir waakekeln le ki doon gbaŋ u, utaa chee.

⁸ Waah dɔ geen kinyeek na, le u nan jii finn ngeen pu, ki fenn, le waah kan ke upii dɔ gbɔk utaa chee na, le ni ŋa u lijinjiir.

⁹ Le u baa ke, “Ŋma ye?” Le Ruf bui ke, “Maaninkpel, min Ruf ye. Saah yeh mi na, ni ye saatuln le ke aa li kpiini ki lik mi. Kina pu na, m gaŋ si ke aa di mi ŋa aapuu.”

¹⁰ Le u bui u ke, “Uwumbɔr ŋa tinyoor ŋa aa pu. Saah bi ŋani pu dandana wee na mɔk saah kii tii timi aadichal pu na ki jer saah nan ŋa aachapii pu na. Aa ba ga ŋmaa buen nibaa wɔb ki ti ban unachipɔɔn, u ye uwankpadaan, bee ugiin na, ke aa mɔn, le saa ŋa kina.

¹¹ Kina pu na, Ruf, taa cha nibaa li muk si. M ga ŋa saah ban pu na mɔmɔk; unii umɔk bi kitiŋ kee ponn ni na bee ke aa ye upii u ŋan na la.

¹² Ni ye mbamɔn ke m yeh si, le ni ki ye maatuln ke m li kpiini ki lik si. Tɔ, uja ubaa bi ki yeh si ki jer mi.

¹³ Li dɔ do aan kitaak woln; kichakpiik ni kan, ti lik ke u ga gaa si ki li kpiini ki lik si aan waan gaa si. U yaa kii kan, ni ŋan; u yaa yii kan, m puu Uwumbɔr u bi n‑yoonn mɔmɔk na ke m ga gaa si ki li kpiini ki lik si. Kina pu na, li dɔ do aan ni woln.”

¹⁴ Kina pu le u nan dɔ gbɔk utaa chee, le ki nan tee pue fii ke ubaa taa kan u; ba pu? Boas aa nan ban ke ubaa bee ke u dan nima.

¹⁵ Le Boas bui u ke, “Chuu peer saakekeln li aa pee paacham na ki taln li bil do.” U nan ŋa kina, le Boas lee ndibim mu ga gbiin kibɔɔkusakpeŋ na tii u, ki ter u, u di paan ubɔgbiln pu. Le u di i gir kun linampal.

¹⁶ Waah ti fuu na, le uchapii baa u ke, “Mbisal, ni ti bi kinye?” Le Ruf bui u Boas aah ŋa u pu na mɔmɔk;

¹⁷ le ki ki len ke, “U bui mi ke maan ŋmaa gir ni aa chee kaa joo nibaa, le ki lee idi yee mɔmɔk tii ni mi.”

¹⁸ Le Naomi bui ke, “Tɔ, Ruf, chuu aabaa suuna, ki ti saa buyoonn ti ga kan nimina mɔmɔk aah ga doo pu na. Boas yaa kaa toor tibɔr tee din wee doo kan, waan fuur.”