Ruf Aagbaŋ 2 - Uwumbɔr aagbaŋ

Ruf ti bi tun lituln Boas aakpaakon ni

¹ Naomi aachatiib aanii ubaa nan bi, le bi yin u ke Boas. U nan ye uwankpadaan u binib biken aanimbil gbiin u na la, le u ye Elimelek aamaal ponn ni ubaa.

² Daalbaadaal le Ruf nan bui Naomi ke, “Cha m buen ikpaakon ni ki ti lɔi idi. M nyi ke ubaa ga ti san mi kinimbaak ki cha m li paa upuwɔb ki lɔi idi.” Le Naomi kii u ke, “Mbisal, li cha.”

³ Kina pu le Ruf nan buen ikpaakon ni ki ti chuun paa bidicheeb aapuwɔb, ki lɔi idi. Waah nan ti bi nkpaakon mu ponn ni na nan ye Boas aakpaakon la.

⁴ Puwɔb le Boas ubaa nan nyan Betlehem ki fuu ni, ki nan doon bidicheeb ngbaan. U nan doon bi ke, “Uwumbɔr bi ni chee.” Le bi kii u ke, “Uwumbɔr ŋa waanyoor ŋa aa pu.”

⁵ Boas nan baa waadicheeb ngbaan aaninkpel ke, “Ŋma ye upiisapɔɔn ngbaan?”

⁶ Le u bui u ke, “Uwɔwɔnpiibo u nyan ni Moab aatiŋ ni ki dii ni Naomi na le bi na.

⁷ U mee mi ke m cha u li paa bidicheeb pu, ki li lɔi idi la. Kichakpiik ni mɔk le u bi do lɔi idi, le ki laa buen u ti kal fuur mboon ni siib.”

⁸ Le Boas bui Ruf ke, “Cha m sur si siib kina. Taa ki buen nkpaakon mubaa ni ke aa ti lɔi idi, see mue ni baanja. Li lɔi maatutunpiib bee chee;

⁹ li lik bi ki bee nin chee bi bi chee na, ki li bi bi chee. M tuk maajab ke bi taa muk si. Nnyunyuu yaa ti chuu si kan, buen ti nyu baatuun ponn ni aanyun mu bi lun siin na.”

¹⁰ Ruf nan gbaan ki boon le uyigbeer ti mee kitiŋ, le ki bui Boas ke, “Ba ŋa aa cha aalaasaab bi m ni kina? Ba ŋa aa kpa tiŋann uwɔwɔnii chee kina?”

¹¹ Le Boas gar u ke, “M ŋun aachal aah kpo aan aa joo aachapii pu na mɔmɔk. M nyi saah nyan cha aate, ni aana, ni saatiŋ, ki dan nan koo binib bi saa nan nyi bi daalbaadaal kpala na chee pu na.

¹² Uwumbɔr ga pa si saah tun pu na pu. Israel yaab Aadindaan Uwumbɔr, u chee aa dan ki ban ke u li kii si na, ga pa si saapal mɔmɔk.”

¹³ Ruf nan kii u ke, “Maaninkpel, aa kpa m pu tiŋann sakpen. Min ni saanaagbiib ubaa aa ŋak, le aa len m chee tibɔr suuna ki cha nlan sɔŋ kina.”

¹⁴ Tɔ, baah nan ban bi ji tijikaar na, le Boas bui Ruf ke, “Dan nan gaa boroboro ki di tu ŋisubil aadaan ki ŋmɔ.” Le u buen ti kal bidicheeb ngbaan chee, le Boas di baah pun nkalmaan ŋi na laan u. U nan jin bi chee ki ti bab, le ki gur tijikaar.

^15-16 Waah fii buen u ti ki lɔi idi na, le Boas tuk bidicheeb ngbaan ke, “Cha man u li lɔi ki ti saa nimɔk ŋidibɔɔ beenin dɔ na, ki taa bui u tibɔr ti ga jenn u na. Ki kpee na, ni li nɔr idi ibaabaa lir aan u li peei.”

¹⁷ Kina pu le Ruf nan bi lɔi idi ki ti joor kijook. Waah nan poi i na, u nan kan idi i ban i gbiin liyikpiln na.

¹⁸ U nan yoor i di kun linampal, le ki ti di mɔk uchapii waah lɔi pu na. U nan ki di waah jin gur tijikaar ti na mu di tii u.

¹⁹ Le Naomi baa u ke, “Aa kan idi yee mɔmɔk la chee? Ŋma aakpaakon ni aa ti lɔi? Uwumbɔr ŋa tinyoor ŋa uja u lik si ki san si kinimbaak na pu.” Le Ruf bui Naomi ke u ti lɔi uja u bi yin u ke Boas na aakpaakon ni la.

²⁰ Le Naomi bui ke, “Uwumbɔr ŋa tinyoor ŋa Boas pu. Uwumbɔr joo waah puu tipuur ti na, binib bi fu na, ni bi kpo na chee la,” le ki ki len ke, “Uja ngbaan ye timi aadichal ni aanii la. Bi ye ke bi li kpiini ki lik timi na ubaa le na.”

²¹ Le Ruf bui ke, “Tiwan ni ti jer ni mɔmɔk na le ye ke u bui mi ke m li lɔi waadicheeb chee ki ti saa bundaln bi ga chee doo na.”

²² Le Naomi ki bui Ruf ke, “Mbamɔn, mbisal, aa yaa tun bipiib bi bi Boas aakpaakon ni na chee kan, ni ŋan. Aa yaa ki buen unii uken aakpaakon ni kan, nibaakan, bi ga muk si.”

²³ Kina pu le Ruf nan tun bi chee ki lɔi idi le bi ti chee tijikaar doo. N‑yoonn ngbaan Ruf nan beenin bi uchapii chee la.