Obadia 1 - Uwumbɔr aagbaŋ

¹ Tidindaan Uwumbɔr aah di tibɔr ti tuk waabɔnabr Obadia, ki joo cha Edom aatiŋ wɔb na sɔ. Uwumbɔr tun waabɔnabr ŋitimbol mɔmɔk chee, le ti ŋun waabɔr ti u tuk u na ke, “Gor nibaa man. Cha ti buen ti to Edom yaab butɔb man.”

Uwumbɔr ga daa Edom yaab aatafal

² Uwumbɔr bui Edom yaab ke, “M ga ŋa nimi bigiim, unibɔn mɔmɔk ga lik nimi fam.

³ Nimi aagaak le ŋmann nimi. Nimi aatiyil pɔɔ ke litakpal na la, le nido bi ŋijoo ŋi fɔk na pu, le ni bui nibaa ke, ‘Ŋma ga ŋmaa daa ker timi lii ni taab?’

⁴ Hali ni yaa di nimi aadichal ti maa paachapaacham ke likaagiil aadir na, aan ŋi daa ke iŋmabi na kan, m ga ŋmaa daa ker nimi lii ni taab.

⁵ Binaayukb yaa dan kinyeek bi nan su tiwan kan, bi yoor tiwan ni bi ban na baanja la. Bipiib mu yaa peei ikpa kan, bi peei le ki gur ngem. Le nimi aadim ma ku doo nimi kookoo.

⁶ Esɔ aayaabitiib, binib sun nimi aawangol mɔmɔk a.

⁷ Nimi aamaantɔtiib ŋmann nimi la; le bi jenn nyan nimi, nimi aatiŋ ponn ni. Binib bi nan ye nijɔtiib na le nyaŋ nimi butɔb ni dandana wee na. Nijɔtiib bi nan ji ni chee tijikaar na le ŋmann nimi koon gaawɔb ni; bi baa le ke, ‘Baalan mu bi kpa na bi la?’

⁸ Nwiin mundaal m ga daa Edom yaab aatafal na, m ga ku bilandam mɔmɔk aan baalan mɔmɔk doo.

⁹ Temann aajab bi jaa kijaak na ga san ijawaan pam, le baatiŋ Edom aatɔb aajab mɔmɔk ga kpoi.

Budabu pu Uwumbɔr ga daa Edom yaab aatafal na

¹⁰ “Naah ŋa pu ki sun ninaabitiib, bi ye Jakob aayaabitiib na aawan, ki ku bi na, kina le binib ga lik nimi fam ki kuln nimi.

¹¹ Nwiin mundaal aan baadim nan koo ni baatiŋ ni ki bii baawan na, ni nan si nima kaa gar tibaa. Ni bir ke biwɔwɔm bi nan yoor Jerusalem aatiŋ aawangol di buen ki ti yakr na la.

¹² Naa ŋan ke ni ba li mɔɔni buyoonn ninaabitiib Juda yaab kan mpombiin na. Nwiin mundaal bi nan kuln baatiŋ na, naa ba ga nan li kpa mpopiin liyaadaal ngbaan. Naa ŋan ke buyoonn bi nan bi tibɔbir ni na, nimi li bi laa.

¹³ Naa ba ga nan koo maanib aatiŋ ni ki ti lik bi fam, ki su baawangol nwiin mundaal bi bi tibɔbir ni na.

¹⁴ Naa ba ga nan li si isayakr ki chur binib bi nan san ke bi ŋmar na, kaa ba ga di bi tii baadim, nwiin mundaal bi nan bi tibɔr ni na.

Uwumbɔr ga ji ŋitimbol tibɔr

¹⁵ “Nwiin ngbaan peen ni, bundaal aan min Uwumbɔr ga ji ŋitimbol mɔmɔk tibɔr na peen ni. Edom yaab, naah ŋa pu na, kina le ni ga kan. Naah tii pu na, kina le bi ga giin tii nimi.

¹⁶ Maanib nan kan ntafadaan mu bir na maajool li bi chain na pu. Binib bimɔk bi ki mann goln na ga kan ntafadaan mu jer kina na. Bi ga kan ntafadaan, le ki lil, kaan ki gir ni.

Israel yaab aah nyaŋ kijaak pu na

¹⁷ “Sionn aajool na pu le binib bibaa ga ŋmar, le lijool ngbaan pu ga kpaln miyaan. Jakob aayaabitiib ga gaa baatiŋ ki ye baatiŋ ibamɔn ni na.

¹⁸ Jakob ni Josef aanib ga li naahn mmii la; bi ga doo Esɔ aanib ke mmii aah wu kinaakook pu na la. Esɔ aanib ponn ni ubaa aan ŋmar. Min Uwumbɔr le len kina.

¹⁹ Binib ga nyan ni Juda aawilir aaŋangii wɔb le ki nan gaa Edom aatiŋ; le binib bi bi liwilir wɔb aagongon ni na ga gaa Filistia yaab aatiŋ, Israel yaab mu ga gaa Efraim ni Samaria aatim, le Benjaminn aanib ga gaa Gilead aatiŋ.

²⁰ Israel yaab bi binib nan chur bi buen kitiyayaŋ ni ki cha baatiŋ liwipuul aaŋangan wɔb na ga ki gir nan gaa Fonisia aatiŋ ki ti saa Sarefaf aatiŋ ni ŋŋangan wɔb. Jerusalem yaab bi binib nan chur bi tinaagbiir ki di bi buen Sadis aatiŋ ni na le ga gaa ntim mu bi Juda aaŋangii wɔb na.

²¹ Jerusalem yaab bi ga nyaŋ baadim mɔmɔk na ga tak Edom yaab ki nyaŋ bi. Le Uwumbɔr uma ubaa ga li ye Ubɔrkpaan.”