Nnyam 9 - Uwumbɔr aagbaŋ

Tiwakor aah kpoi pu na

¹ Uwumbɔr nan bui Moses ke, “Li cha ubɔr ngbaan chee ki ti tuk u ke Hiibru yaab Aadindaan Uwumbɔr bui ke, ‘Cha maanib ngbaan buen, aan ki ti doon mi.

² Aa yaa ki yii, kaa cha bi buen kan,

³ m ga daa aatafal ki cha iween i bir na dan saawakor mɔmɔk pu: itaan, ni ibon, ni laakumii tiib, ni inaa, ni ipiih, ni iŋoob.

⁴ M ga yakr Israel yaab ni Ijipt yaab aawakor, le Israel yaab aawakor kibaa aan kpo.

⁵ Min Uwumbɔr siin ke fen le m ga fe ŋa kina.’”

⁶ Naah woln kitaak na, le Uwumbɔr nan ŋa waah len pu na, le Ijipt yaab aawakor mɔmɔk kpoi, le Israel yaab aawakor kibaa aa kpo.

⁷ Le ubɔr baa tiwan ni ŋa na, le bi tuk u ke Israel yaab aawakork kibaa aa kpo. Tɔ, u nan pɔɔk usui, le kaa kii ke binib ngbaan nya buen.

Ŋichakpelar aafalaa

⁸ Uwumbɔr nan ki bui Moses ni Aaronn ke, “Di niŋaal lee nfatan siib, aan Moses di mu mee yaa paacham, ubɔr ngbaan aanimbiin ni.

⁹ Nfatan ngbaan ga yaa gaa libuln ni, ki daa buen kitiŋ ngbaan mɔmɔk ni, le mu aah ti lir nin chee na, mu ga kpaln ŋichakpelar ŋi ga ŋa ibuun na ki baan binib, ni tiwakor pu.”

¹⁰ Kina pu na, bi nan ban nfatan le ki ti sil ubɔr aanimbiin ni; le Moses di mu mee yaa paacham, le mu kpaln ŋichakpelar ki ŋa ibuun, ki baan binib ni tiwakor pu.

¹¹ Ubɔr aanyɔkdam na aa nan ki ŋmaa dan Moses aanimbiin ni; ba pu? biwon nan kpaln ŋichakpelar ki ŋa ibuun ke Ijipt yaab biken na.

¹² Uwumbɔr nan cha ubɔr ngbaan aasui moo pɔɔk, le ni gbiin waah nan len pu na, ke ubɔr ngbaan aa ŋun tii Moses ni Aaronn.

Ŋitaatakpal aafalaa

¹³ Uwumbɔr nan ki bui Moses ke, “Fen kichakpiik ni kan, ki buen ubɔr chee ki ti tuk u ke Hiibru yaab Aadindaan Uwumbɔr bui ke, ‘Cha maanib ngbaan buen, nima kan bi ga ŋmaa doon mi.

¹⁴ N‑yoonn mue kan, maan ki daa saaninkpiib ni saanib ŋmeen aatafal, m ga daa aa mu aatafal kpee, nima kan aa ga bee ke ubaa aa ki bi dulnyaa wee ni ki kpa mpɔɔn ke min na.

¹⁵ M yaa ba di maapɔɔn ki di iween daa aa ni saanib aatafal kan, kina ni mɔmɔk ba kuln a.

¹⁶ Maah ban m mɔk si maapɔɔn na, maa ku si, nima kan, binib mɔmɔk ga bee maah kpa liyimbil dulnyaa wee mɔmɔk ni pu na.

¹⁷ Linimbaasaln limina mɔmɔk ponn ni, ni mɔmɔk yɔli, aa pɔɔk aasui ki yii ke maanib ngbaan taa buen.

¹⁸ Fen kinakokoona m ga fe cha ŋitaatakpal ŋi pɔɔ aan Ijipt yaab aa kee kan na lir kitiŋ kee pu.

¹⁹ Dandana wee, bui saanib ke bi chur baawakor, ni baawan nimɔk bi lipaal na, ki piin laŋ ni pu. Ŋitaatakpal ga fe lir binib ni tiwakor ni chuun lipaal na pu, le ni ga kpo.’”

²⁰ Ubɔr ngbaan aaninkpiib bibaa aah ŋun kina na, ijawaan nan chuu bi, le bi di baawakor ni baatutum ŋa tidir, ni ŋibobor ni.

²¹ Bibaa mu yii, kaa pak Uwumbɔr aasurm, le ki cha baawakor, ni baatutum bi lipaal.

²² Uwumbɔr nan bui Moses ke, “Yoor aaŋaal paacham ki di mɔk kitaapaak, le ŋitaatakpal ga lir ni Ijipt yaab aatiŋ kee pu, ŋi ga lir ni binib, ni tiwakor, ni timoor ti bi kitiŋ ngbaan ni na mɔmɔk pu.”

²³ Moses nan yoor waajaangbeek mɔk kitaapaak, le Uwumbɔr cha ŋitaatakpal lir, le ki cha utaal moor ki tar kitiŋ pu.

²⁴ U nan cha ŋitaatakpal ŋi pɔɔ na lir, le utaal moor ni mɔmɔk. Kitaabuŋ ngbaan aaboln aa nan kee daa Ijipt aatiŋ ni.

²⁵ Le Ijipt aatiŋ ngbaan mɔmɔk ni, ŋi nan lir tiwan nimɔk nan bi lipaal na, binib ni tiwakor, ki lir timoor pu, ki kpukr isui mɔmɔk lii kitiŋ.

²⁶ Tɔ, Gosenn aapepel wɔb, nin chee Israel yaab nan bi na, ŋitaatakpal aa nan lir nima chee.

²⁷ Le ubɔr ngbaan tun yin Moses ni Aaronn le ki bui bi ke, “N‑yoonn mue m tun bakaa, Uwumbɔr le jin mbamɔn, m ni maanib le galn.

²⁸ Mee Uwumbɔr, ki bui u ke ntafadaan mu u tii timi na ŋeer a. M puu ke m ga cha ni li cha; taa ki li bi do man.”

²⁹ Moses nan bui u ke, “M yaa nyan kitiŋ kee ni kan, libuul ngbaan ni, le m ga yoor ŋŋaal paacham ki mee Uwumbɔr, le utaal aan ki teen, ŋitaatakpal mu aan ki lir, nima kan, aa ga bee ke Uwumbɔr le yeh dulnyaa wee mɔmɔk.

³⁰ M mu nyi ke aa ni saaninkpiib na aa kee san Tidindaan Uwumbɔr ijawaan.”

³¹ Tɔ, tikokonn, ni njikaabim mu bi yin mu ke baale na bii doo, ba pu? baale ngbaan nan biir, le tikokonn mu nan ŋeen.

³² Njikaabim mu bi yin mu ke wiiti na ma aa nan bii, ba pu? mu aa nan kee biir n‑yoonn ngbaan.

³³ Moses nan siir ubɔr ngbaan chee, le ki nyan kitiŋ ngbaan ni, ki yoor uŋaal paacham, ki mee Uwumbɔr. Le utaal aa nan ki tar, kaa ki nu, le ŋitaatakpal mu aa ki lir.

³⁴ Ubɔr ngbaan aah nan kan kina na, le u ki tun titunwanbir, u ni waaninkpiib ki pɔɔk bisui,

³⁵ kaa cha Israel yaab buen, ke Uwumbɔr aah nan cha Moses len pu na.