Nnyam 8 - Uwumbɔr aagbaŋ

Ŋipulaatal aafalaa

¹ Uwumbɔr nan ki bui Moses ke, “Li cha ki ti tuk ubɔr ngbaan ke Uwumbɔr bui ke, ‘Cha maanib ngbaan buen, nima kan, bi ga ti ŋmaa doon mi.

² Aa yaa yii kan, m ga daa saatiŋ kee aanib aatafal, ki cha ŋipulaatal gbiin kitiŋ kee ni.

³ Le ŋipulaatal ga gbiin Nail aamɔɔl mɔmɔk ni, le ki nya dan saabɔrdichal ni, ki koo saadidookaan, ni saawandookaan pu, ni saaninkpiib, ni saanib mɔmɔk aadichal ni, hali ifan ponn ni, ni ŋisambil ponn ni, ga li ye ŋima la.

⁴ Ŋi ga yuk kal aa ni saaninkpiib, ni binib mɔmɔk pu.’”

⁵ Uwumbɔr nan ki bui Moses ke, “Tuk Aaronn ke u yoor waajaangbeek na paacham ki di mɔk ŋimɔɔ, ni ikpen, ni ibun, aan ŋipulaatal nyan ni lipaal, ki gbiin Ijipt aatiŋ mɔmɔk ni.”

⁶ Nima pu na, Aaronn nan yoor waajaangbeek ngbaan paacham ki di mɔk nnyun ngbaan mɔmɔk, le ŋipulaatal nyan ni, ki gbiin kitiŋ ngbaan mɔmɔk ni.

⁷ Le binyɔkdam ngbaan mu nan cha ŋipulaatal nyan ni kitiŋ ngbaan ni.

⁸ Ubɔr nan yin ni Moses ni Aaronn le ki nan bui bi ke, “Mee Uwumbɔr ke u nyan ŋipulaatal ngbaan, aan m cha waanib ngbaan nya buen, nima kan, bi ga ŋmaa toor kitork tii u.”

⁹ Moses nan kii le ki bui u ke, “M ga li kpa mpopiin ke m mee Uwumbɔr. Siin n‑yoonn mu aa ban ke m mee u tii aa ni saaninkpiib ni saanib na. Le ni ga kan nibaa ŋipulaatal ngbaan chee, ŋi ga li gur bi Nail Aamɔɔl ni baanja la.”

¹⁰ Ubɔr ngbaan nan bui ke, “Ni yaa fe woln kichakpiik ni kan, aa mee Uwumbɔr.” Le Moses bui u ke, “M ga ŋa saah ban pu na, nima kan, aa ga sil bee ke Uwumbɔr ubaa aa ki bi ki kpee Tidindaan Uwumbɔr ngbaan pu.

¹¹ Aa ni saaninkpiib ni saanib ngbaan ga kan nibaa ŋipulaatal ngbaan chee, le ŋi ga li gur bi Nail aamɔɔl ni baanja.”

¹² Moses ni Aaronn nan siir ubɔr chee, le Moses mee Uwumbɔr ke u nyan ŋipulaatal ngbaan Ijipt aatiŋ ni.

¹³ Uwumbɔr nan ŋun Moses aah mee pu na, le ki cha ŋipulaatal ŋi mɔmɔk bi ŋidichal ni, ni ŋipaa, ni ikpaakon ni na mɔmɔk kpoi.

¹⁴ Ijipt yaab nan kuun ŋi tiŋ ŋikpuk ŋikpuk, le kitiŋ ngbaan mɔmɔk ti nuŋ ŋipulaatakpol pu.

¹⁵ Ubɔr ngbaan aah kan ke ŋipulaatal mɔmɔk kpo doo na, le u ki pɔɔk usui, le ni gbiin Uwumbɔr aah nan tuk Moses ni Aaronn pu na, ke ubɔr ngbaan ga pɔɔk usui kaan tii bi nsan.

Tinaapulor aafalaa

¹⁶ Uwumbɔr nan bui Moses ke, “Tuk Aaronn ke u di waajaangbeek ngbaan ki di faa kitiŋ, aan kitangbaak kpaln tinaapulor ki gbiin Ijipt aatiŋ ngbaan ni.”

¹⁷ Nima pu na, Aaronn nan di waajaangbeek faa kitiŋ, le kitangbaak mɔmɔk kpaln tinaapulor ki nyan gbiin, ki biin binib ni tiwakor mɔmɔk pu.

¹⁸ Le ubɔr aanyɔkdam mu pɔɔn bibaa ke bi ŋa kina, le kaa ŋman. Tinaapulor nan bi ni mɔmɔk,

¹⁹ le binyɔkdam ngbaan bui ubɔr ke, “Uwumbɔr le ŋa kina.” Tɔ, hali Uwumbɔr aah ŋa lijinjiir aawan nimina mɔmɔk na, ubɔr ngbaan nan moo pɔɔk usui, le ni gbiin Uwumbɔr aah nan tuk Moses ni Aaronn pu na.

Tisibir aafalaa

²⁰ Uwumbɔr nan ki bui Moses ke, “Fen kichakpiik ni, aa fe pue ki ti to ubɔr buyoonn u cha limɔɔl ni na, aan ki tuk u ke Uwumbɔr bui ke, ‘Cha maanib nya saatiŋ ni, nima kan, bi ga ŋmaa buen ki ti doon mi.

²¹ M sur si ke aa yaa yii kan, m ga daa aatafal, ki cha tisibir dan aa ni saaninkpiib ni saanib aatiŋ kee ponn ni. Tisibir ga gbiin Ijipt yaab aadichal, ni lipaal mɔmɔk.

²² M mu aan cha tisibir ngbaan nya Gosenn aapepel wɔb, nin chee maanib bi na. M ga ŋa kina aan aa ni saanib bee ke min Uwumbɔr bi tun lituln kitiŋ kee ni.

²³ M ga gaa maanib lii, kaan cha falaa ngbaan dan bi pu. Fen le lijinjiir aatuln ngbaan ga fe ŋa.’”

²⁴ Uwumbɔr nan cha tisibir nyan gbiin ubɔr ni waanib mɔmɔk do. Le Ijipt aatiŋ ngbaan mɔmɔk nan kpaln tisibir ŋmeen, ki bii.

²⁵ Ubɔr ngbaan nan yin Moses ni Aaronn, le ki nan bui bi ke, “Li cha man aan ni ti toor kitork ki doon nimi Aawumbɔr kitiŋ kee ni.”

²⁶ Le Moses giin bui u ke, “Naan li ŋan ke ti ŋa kina kitiŋ kee ni; ba pu? Ijipt yaab aan li gee taah ga di tiwakor ti toor kitork ki doon Tidindaan Uwumbɔr na. Nibaakan ti yaa di tiwakor ti kɔ Ijipt yaab chee na toor kitork kan, naan li mɔ bi chee, le bi ga mae ŋitakpal ku timi,

²⁷ see ti chuun iwiin itaa ki buen nteersakpiin ni, le ki ti toor kitork tii Tidindaan Uwumbɔr, waah bui ke ti ŋa pu na.”

²⁸ Ubɔr nan ki bui ke, “Ni yaa kaan buen dandar kan, m ga cha ni buen ti toor kitork nteersakpiin ngbaan ni, ki tii Nidindaan Uwumbɔr. Ni ti mee u tii m mu man.”

²⁹ Le Moses giin bui u ke, “M yaa siir do kan, m ga mee Uwumbɔr ke fen kan, u cha tisibir ngbaan nya saatiŋ kee pu. Tɔ, aa taa ki ŋmann timi, kaan cha binib ngbaan buen ti toor kitork tii Uwumbɔr.”

³⁰ Moses nan siir ubɔr chee le ki ti mee Uwumbɔr,

³¹ le Uwumbɔr ŋa Moses aah mee u pu na. Tisibir ngbaan nan nyan ubɔr, ni waaninkpiib, ni waanib ngbaan mɔmɔk do, hali kibaa kina aa nan gur.

³² Tɔ, n‑yoonn mue na, ubɔr nan ki pɔɔk usui, le kaa ki cha bi buen.