Nnyam 7 - Uwumbɔr aagbaŋ

¹ Uwumbɔr nan bui u ke, “M ga cha aa li bi ke Uwumbɔr na le ubɔr ngbaan chee, le aakpel Aaronn le ga li ye saabɔnabr ki len tibɔr ubɔr chee tii si.

² Tuk Aaronn tibɔr timɔk m ga tuk si na, uma le ga bui ubɔr ngbaan ke u cha Israel yaab nya waatiŋ ni.

³ M ga cha ubɔr ngbaan pɔɔk usui, kaan ŋun tii si; m yaa gee m ŋa ijawaan aatun pu na kan, waan cha ni nya Ijipt aatiŋ ni.

⁴ Le m ga cha ntafadaan mu bir ki pɔɔ na lir Ijipt aatiŋ ni, le ki loln ŋinibol ŋi ye maanib na nsan ki nyan bi kitiŋ ngbaan ni.

⁵ Buyoonn m daa Ijipt yaab aatafal ki nyan Israel yaab baatiŋ ni na, le Ijipt yaab ga bee ke min le ye Uwumbɔr.”

⁶ Moses ni Aaronn nan ŋa Uwumbɔr aah bui ke bi ŋa pu na.

⁷ Buyoonn bi nan buen ubɔr chee ki ti tuk u tibɔr ngbaan na, Moses nan ye ŋibin imonko inaa la, le Aaronn mu ye ŋibin imonko inaa ni ŋitaa.

Aaronn aajaangbeek aabɔr

⁸ Uwumbɔr nan bui Moses ni Aaronn ke,

⁹ “Ubɔr ngbaan yaa ban ke ni ŋa lijinjiir aatuln kan, bui Aaronn ke u di waajaangbeek mee lii ubɔr ngbaan aanimbiin ni, le ki ga kpaln uwaa.”

¹⁰ Nima pu na, Moses ni Aaronn nan buen ubɔr ngbaan chee ki ti ŋa Uwumbɔr aah len pu na. Aaronn nan di waajaangbeek ngbaan di mee lii ubɔr ni waakpambalb aanimbiin ni, le ki kpaln uwaa.

¹¹ Le ubɔr ngbaan yin ni waalandam ni binyɔkdam, le bi mu di baanyɔk ŋa kina.

¹² Bi mu nan di baajaangbar mee lii, le ti kpaln iwaa. Le Aaronn aajaangbeek ki kpaln uwaa na nan chur baawaa na nab.

¹³ Nimina mɔmɔk aa nan kpeln ubɔr ngbaan aasui, u nan moo pɔɔk usui ke Uwumbɔr aah len pu na la, waa nan ŋun tii Moses ni Aaronn.

Falaa aah lir Ijipt aatiŋ ni pu na Nsin aafalaa

¹⁴ Uwumbɔr nan bui Moses ke, “Ubɔr ngbaan aasui pɔɔ pam, le u yii ke binib ngbaan taa buen.

¹⁵ Nima pu na, fen kan, aa fe fii mala kichakpiik ni, buyoonn ubɔr chaa Nail aamɔɔl ni na, ki ti kan u. Aa li joo kijaangbeek ki nan kpaln uwaa na, ki ti li kii u, limɔɔl aagbaan,

¹⁶ ki bui u ke, ‘Timi Hiibru yaab Aadindaan Uwumbɔr le tun ni mi ke m nan tuk si ke aa cha waanib ngbaan buen ki ti doon u nteersakpiin ni, le ki nan saa din na, saa ŋun tii u.

¹⁷ Ubɔr, Uwumbɔr bui ke waah ga ŋa tiwan nimɔk na, le aa ga bee waah kpa mpɔɔn pu na. Lik, m ga di kijaangbeek kee faa limɔɔl lee aanyun, le nnyun ngbaan kpaln nsin.

¹⁸ Ijan ga kpo, le nnyun mu nuŋ, le Ijipt yaab aan ki ŋmaa nyu nnyun ngbaan.’”

¹⁹ Uwumbɔr nan ki bui Moses ke, “Bui Aaronn ke u yoor waajaangbeek ngbaan paacham ki di mɔk ŋimɔɔ, ni ikpen, ni ibun mɔmɔk, Ijipt aatiŋ ponn ni. Nnyun ngbaan mɔmɔk ga kpaln nsin, le kitiŋ ngbaan mɔmɔk aanyun, hali ŋibuu ŋimɔk kpa nnyun na ga kpaln nsin.”

²⁰ Moses ni Aaronn nan ŋa Uwumbɔr aah bui ke bi ŋa pu na mɔmɔk. Ubɔr ngbaan ni waaninkpiib aanimbiin ni, le Aaronn yoor waajaangbeek ngbaan paacham, le ki di faa limɔɔl ngbaan aanyun, le nnyun ngbaan mɔmɔk kpaln nsin.

²¹ Ijan imɔk nan bi limɔɔl ngbaan ni na kpo, le mu nuŋ, nima pu na, Ijipt yaab aa nan ki ŋmaa nyun nnyun ngbaan. Ijipt aatiŋ mɔmɔk nan ye nsin ŋmeen la.

²² Ubɔr aanyɔkdam mu nan ŋa kina, le ubɔr ngbaan moo pɔɔk usui sakpen. Le ubɔr ngbaan nan yii, kaa ŋun tii Moses ni Aaronn, ke Uwumbɔr aah tuk bi ke ubɔr ngbaan aan kii ke binib ngbaan buen pu na.

²³ Ubɔr ngbaan aah kaa ga ŋun tii bi pu na, le u ti siir kun udo, kaa gar bi.

²⁴ Ijipt yaab nan gbii inyunbun kpaŋ limɔɔl aagbaan; ba pu? baa nan ŋman bi nyu limɔɔl aanyun.

²⁵ Uwumbɔr aah nan cha limɔɔl ngbaan aanyun kpaln nsin na, iwiin ilole nan jer.