Nnyam 6 - Uwumbɔr aagbaŋ

¹ Uwumbɔr nan bui Moses ke, “Dandana wee, aa ga kan maah ga ŋa ubɔr ngbaan pu na. M ga muk u aan u cha maanib ngbaan buen. Mbamɔn, m ga muk u pam, le uma ubaa ga bui binib ngbaan ke bi nya waatiŋ ponn ni.”

Uwumbɔr aah yin Moses pu na

² Uwumbɔr nan len Moses chee ki bui ke, “Min le ye Uwumbɔr.

³ Min Uwumbɔr Mpɔɔnsakpiindaan nan dan Abraham, ni Aisak, ni Jakob chee, le maa nan cha bi bee maayimbil li ye M‑ye‑na.

⁴ M nan ki puu tipuur tii bi ke m ga di Kanaann aatiŋ ki bi nan ye biwɔwɔm ki ponn ni na tii bi.

⁵ Dandana wee m ŋun bima Israel yaab aah wii baafalaa ponn ni pu na, Ijipt yaab aah di bi ŋa baanaagbiib pu na, le m teer maah puu tipuur ti na.

⁶ Nima pu na, tuk Israel yaab ke, ‘Min le ye Uwumbɔr. M ga gaa nimi lii, ki nyan nimi tinaagbiir ni, Ijipt yaab chee. M ga yoor maaŋaal mu kpa mpɔɔn na paacham, ki daa binib ngbaan aatafal, le ki ga gaa nimi lii.

⁷ M ga di nimi ŋa maanib, m ga li ye nimi Aawumbɔr. Ni ga bee ke m ye Nidindaan Uwumbɔr u gaa nimi lii, ki nyan nimi tinaagbiir ni, Ijipt yaab chee na.

⁸ M ga di nimi buen kitiŋ ki m nan puu ke m ga di ki tii Abraham, ni Aisak, ni Jakob na, m ga di ki tii nimi, ki li ye nimi aatiŋ. Min le ye Uwumbɔr.’”

⁹ Moses nan tuk Israel yaab Uwumbɔr aah len pu na, le baa nan ŋun tii u; ba pu? bisui nan bii pam, baah nan bi tinaagbiir ni aan Ijipt yaab ŋani bi mbiin pu na.

¹⁰ Uwumbɔr nan bui Moses ke,

¹¹ “Li cha ki ti tuk Ijipt yaab aabɔr ngbaan ke see u cha Israel yaab nyan kitiŋ kee ni ki buen.”

¹² Moses nan giin bui u ke, “Hali Israel yaab bibaa aa ŋun tii mi, ubɔr ngbaan le tee ga ti ŋun tii mi ii? M mu aa ti ki ŋmaa len tibɔr mbamɔm.”

¹³ Uwumbɔr nan tii Moses ni Aaronn nsan ke: “Tuk Israel yaab, ni ubɔr ngbaan, ke min le lii nimi bumɔb ke ni loln Israel yaab pu nsan, aan bi nya Ijipt aatiŋ ni.”

Moses ni Aaronn aamaal aabɔr

¹⁴ Rubenn, uma le nan ye Jakob aajan aabo, u nan kpa mbijabim binaa la, baayimbil sɔ: Hanok, ni Palu, ni Hesronn, ni Kami. Rubenn aamaal le na.

¹⁵ Simeonn nan kpa mbijabim biloob la, baayimbil sɔ: Jemuel, ni Jaminn, ni Ohad, ni Jakinn, ni Sohar, ni Saul, u nan ye Kanaann aapiibo na aabo na. Simeonn aamaal le na.

¹⁶ Liifai nan kpa mbijabim bitaa la, baayimbil sɔ: Gesonn, ni Kohaf, ni Merari. Liifai aamaal le na. Liifai nan bi ki ti saa ŋibin nkub ni piitaa ni ŋilole la.

¹⁷ Gesonn nan kpa mbijabim bilee la, baayimbil sɔ: Libni, ni Simei, le bi nan pɔr ki kpa yaabitiib pam.

¹⁸ Kohaf nan kpa mbijabim binaa la, baayimbil sɔ: Amram, ni Isar, ni Hebronn, ni Usiel. Kohaf nan bi ki ti saa ŋibin nkub ni piitaa ni ŋitaa la.

¹⁹ Merari nan kpa mbijabim bilee la, baayimbil sɔ: Mali ni Musi. Bi mɔmɔk nan ye Liifai yaab aamaal la.

²⁰ Amram nan yoor ute aaninkpan Jokebed, le u ma Aaronn ni Moses. Amram nan bi ki ti saa ŋibin nkub ni piitaa ni ŋilole la.

²¹ Isar nan kpa mbijabim bitaa la, baayimbil sɔ: Kora, ni Nefeg, ni Sikri.

²² Usiel mu nan kpa mbijabim bitaa la, baayimbil sɔ: Misael, ni Elsafann, ni Sitri.

²³ Aaronn nan yoor Eliseba, Aminadab aabisal u ye Nasonn aaninkpan na, le u nan ma Nadab, ni Abihu, ni Eleasar, ni Itamar.

²⁴ Kora nan kpa mbijabim bitaa la, baayimbil sɔ: Asir, ni Elkana, ni Abiasaf: Kora aamaal le na.

²⁵ Aaronn aajapɔɔn Eleasar nan yoor Putiel aabisal, le ki ma Fineas. Bi mɔmɔk nan ye Liifai aamaal aayidam la.

²⁶ Aaronn ni Moses le Uwumbɔr nan bui bi ke, “Ni loln Israel yaab pu nsan, ki nyan bi Ijipt aatiŋ ni.”

²⁷ Bima bilee ngbaan le nan buen ti bui Ijipt aabɔr ke u di Israel yaab lii.

Uwumbɔr aah nan tuk Moses ni Aaronn ke bi ŋa pu na

²⁸ N‑yoonn mu Uwumbɔr nan len tibɔr Moses chee Ijipt aatiŋ ni na,

²⁹ u nan len ke, “Min le ye Uwumbɔr. Tuk Ijipt yaab aabɔr ngbaan maah ga len pu na.”

³⁰ Le Moses nan giin bui u ke, “Aa nyi ke maa ŋmaa len tibɔr mbamɔm, ubɔr ngbaan ga ŋa kinye ki ŋun tii mi?”