Nnyam 5 - Uwumbɔr aagbaŋ

Moses ni Aaronn aah nan buen Ijipt aabɔr chee pu na

¹ Moses ni Aaronn nan buen Ijipt aabɔr chee le ki ti bui u ke, “Israel yaab Aadindaan Uwumbɔr bui ke, ‘Cha maanib buen, nima kan, bi ga ti ji njim mubaa kipɔɔk ni, ki nyuŋ mi.’”

² Le ubɔr ngbaan baa bi ke, “Ŋma ye Uwumbɔr? U ye ŋma aan m pel waabɔr ki cha Israel yaab buen? Maa nyi Uwumbɔr. Maan cha Israel yaab nya buen.”

³ Moses ni Aaronn nan giin bui u ke, “Timi Hiibru yaab Aawumbɔr le di ubaa mɔk timi. Kii tii timi ki cha ti chuun iwiin itaa ki buen kipɔɔk ni, ki ti toor kitork tii Tidindaan Uwumbɔr. Ti yaa kaa ŋa kina kan, u ga di iween, bee butɔb le ku timi.”

⁴ Ubɔr ngbaan nan bui Moses ni Aaronn ke, “Ba ŋa ni ban binib ngbaan yii baatuln? Cha binaagbiib ngbaan gir buen baatuln yaan.

⁵ Nimi binib bee gur wiir jer Ijipt yaab, le dandana wee ni ban ni di cha lituln ngbaan.”

⁶ Liyaadaal ngbaan le ubɔr bui Ijipt yaab ni Israel yaab bi joo binaagbiib bi tun lituln na ke:

⁷ “Taa ki tii Israel yaab ntɔm mu bi joo ŋmalni ŋitambil ni na. Cha bima bibaa buen ti ban ni ntɔm ngbaan,

⁸ ki ki cha bi li beenin ŋani ŋitambil baah nan ŋani pu na, libaa taa bar. Baa kpa lituln sakpen, nima le cha bi kpa mpaan ki bui mi ke bi ban bi buen ti toor kitork tii Baawumbɔr.

⁹ Tii bi lituln li pɔɔ na, nima kan, baan li kpa mpaan ki pel inyamɔn aabɔr.”

¹⁰ Le binib bi joo binaagbiib na, ni Israel yaab bi mɔk biken lituln na buen ti tuk Israel yaab ke, “Dandana wee na ubɔr bui ke ti taa ki tii nimi ntɔm, ni li joo ŋani ŋitambil.

¹¹ U bui ke nimi le ga buen ti ban ni ntɔm ngbaan aan ki nan ŋa ŋitambil ngbaan; ni mu aah nan ŋani ŋi wiir pu na, ni li beenin ŋani kina.”

¹² Nima pu na, binib ngbaan nan fii ki chuun Ijipt aatiŋ ni, ni kookoo, le ki ban ntɔm bi nan ŋa ŋitambil.

¹³ Le binib bi joo binaagbiib ngbaan na nan muk bi, ke bi li beenin ŋani ŋitambil ŋi li wiir, ke baah nan tii bi ntɔm aan bi ŋani ŋi wiir pu na.

¹⁴ Ijipt yaab nan gbaa Israel yaab bi lik biken aan bi tun lituln na, le ki baa bi ke, “Ba ŋa naa ki ŋani ŋitambil ŋi wiir ke naah nan ŋani pu na?”

¹⁵ Le binib bi lik biken ngbaan na buen ubɔr chee ki ti baa u ke, “Ubɔr, ba ŋa aa ŋani timi kina?

¹⁶ Baa ki tii timi ntɔm ti li joo ŋani ŋitambil, le aa beenin ban ke ti li ŋani ŋitambil ŋi li wiir. Bi gbaa timi la, ni mu ye saanib aataani.”

¹⁷ Le ubɔr bui bi ke, “Ni san ligbanyakl la, le kaa ban ni tun lituln, nima le ni kpa mpaan ki mee nsan ke m cha ni buen ti toor kitork tii Uwumbɔr.

¹⁸ Siir man libuul lee ni, ki gir buen ti tun lituln. Maan ki cha bi tii nimi ntɔm, m mu tee ban ke ni ŋa ŋitambil ŋi li wiir ke naah nan ŋani pu na.”

¹⁹ Binib ngbaan nan bee ke falaa pii bi a; ba pu? ubɔr ngbaan nan bui bi ke bi buen ti ban ntɔm ki ki ŋa ŋitambil ŋi li wiir ke baah nan ti ŋani pu na.

²⁰ Baah nan gir cha na, le bi ton Moses ni Aaronn nsan ni, bi nan si kii bima la.

²¹ Bi nan bui Moses ni Aaronn ke, “Uwumbɔr kan naah ŋa tiwan ni na, ki ga daa nitafal, nimi le cha ubɔr ni waaninkpiib nan timi. Nimi le tii bi nsan ke bi ku timi.”

Moses aah len Uwumbɔr chee pu na

²² Moses nan gir bui Uwumbɔr ke, “Ndindaan, ba ŋa aa ŋa saanib ngbaan falaa kina? Ba ŋa aa tun ni mi do?

²³ N‑yoonn mumɔk m yaa buen ubɔr chee ki ti bui u saah ban pu na kan, le u moo ŋani saanib ngbaan falaa. Le saa ban aa ŋa nibaa ki ter bi.”