Nnyam 40 - Uwumbɔr aagbaŋ

Baah nan gaa Uwumbɔr Aabool ki di li tii u pu na

¹ Uwumbɔr nan bui Moses ke,

² “Njan aaŋmal aajan aawiindaal kan, aa gaa Maabool.

³ Aa di Dakaa u ponn ni Ikaal Kipiik bi na siin Libool ngbaan ni, ki di likekeln gbin u chee.

⁴ Aa di teebul koon ni, ki di waawan chɔŋ u pu; ni ki kpee na, aa di tiwan ni bi joo karyaa tiib tɔŋni ni pu na koon ni, ki di karyaa tiib chɔŋ ni pu.

⁵ Aa di salmaa aatork aabimbiln li bi seer tulalee aayon li pu na siin Uwumbɔr Aakaal Aadakaa chee, aan ki di likekeln gbin Libool ngbaan aabisamɔb.

⁶ Aa di kitork aabimbiln li bi seer ipiin li pu na siin Libool ngbaan aabisamɔb chee.

⁷ Aa di lisambil li bi ŋir biŋaal li ponn ni na siin Libool ngbaan ni kitork aabimbiln aakaasisik ni, ki ban nnyun gbiin li.

⁸ Aa di tiwan gob Libool na, aan ki di likekeln leen naabisamɔb.

⁹ “Di maakpan meen Libool ngbaan, ni laawan mɔmɔk, ki ŋa ni chain, ki di ni tii mi.

¹⁰ Ni paa na, di maakpan meen kitork aabimbiln, ni laawan mɔmɔk, aan ni ŋa chain, ki di ni tii mi.

¹¹ Ni ki kpee na, ŋa lisambil li bi ŋir biŋaal li ponn ni na mu kina, ki di tii mi.

¹² “Di Aaronn ni ujapɔtiib dan Libool ngbaan aabisamɔb chee ki cha bi fu nnyun.

¹³ Di utotoor aawanpeenkaan peen Aaronn, ki di maakpan kpir uyil pu. Aa yaa ŋa u kina kan, u ga ŋmaa tun utotoor aatuln ki tii mi.

¹⁴ Li joo ni ujapɔtiib mu, ki nan di ŋibɔkul peen bi,

¹⁵ ki di maakpan kpir biyil pu, ke saah ŋa bite pu na, nima kan, bi ga ŋmaa tun bitotoorb aatuln tii mi. Saah ga di maakpan kpir biyil pu pu na le ga cha bi li ye bitotoorb n‑yoonn mu choo na.”

¹⁶ Moses nan ŋa tiwan ngbaan mɔmɔk ke Uwumbɔr aah bui u ke u ŋa pu na.

¹⁷ Nima pu na, njan aaŋmal aajan aawiin daal libiln leler ni, baah nyan ni Ijipt ponn ni buyoonn na, le bi nan gaa Uwumbɔr Aabool siin.

¹⁸ Moses le nan di laadɔ i dɔ taab na, ni tiwon aadɔja ki di chɔɔn, ki di idɔpuinkee mu puin, le ki di idɔja mɔmɔk di siin.

¹⁹ U nan kpaa tiwan ni bi ga di biin Libool ngbaan pu na, le ki di biin li pu, lipaal wɔb, ke Uwumbɔr aah nan bui u ke u ŋa pu na.

²⁰ Le u di ŋitakpapapan ŋilee na ki di ŋa Uwumbɔr Aakaal Aadakaa ni. U nan di ŋidabil na ki di bɔn ibuen i dab baa dakaa ngbaan pu na, li ki di waabiil biin u pu.

²¹ U nan di dakaa ngbaan siin Libool ngbaan ponn ni, ki di likekeln ngbaan mu di leen kiir. Waah ŋa pu na, le u kiir Nkaal Aadakaa ngbaan ke Uwumbɔr aah nan bui u pu na.

²² U nan di teebul ngbaan mu di siin Libool ngbaan ni, ŋŋangan wɔb, likekeln na aapaal wɔb,

²³ le ki di boroboro u bi di tii Uwumbɔr na paan u pu, ke Uwumbɔr aah nan bui u pu na.

²⁴ U nan di karyaa tiib aah chɔŋni tiwan ni pu na siin Libool ngbaan ni, ŋŋangii wɔb, ki lik teebul wɔb,

²⁵ nima chee le u see karyaa tiib Uwumbɔr aanimbiin ni, ke waah bui u ke u ŋa pu na.

²⁶ U nan di salmaa aatork aabimbiln mu siin Libool ngbaan ni, likekeln ngbaan chee,

²⁷ le ki see tulalee aayon mu nu mɔ na, ke Uwumbɔr aah nan bui u pu na.

²⁸ U nan di likekeln di leen Libool ngbaan aabisamɔb,

²⁹ nima chee le u di libimbiln li bi toor ipiin aatork na di siin likekeln ngbaan aapaal wɔb. U nan toor kitork ki bi joo seer mmii ni na, ni njikaabim aapiin li pu, ke Uwumbɔr aah nan bui u ke u ŋa pu na.

³⁰ U nan di lisambil li bi ŋir biŋaal li ponn ni na siin Libool ni kitork aabimbiln ngbaan aakaasisik ni, le ki ban nnyun gbiin li ni,

³¹ aan Moses, ni Aaronn, ni ujapɔtiib ŋir biŋaal ki finn bitaa

³² buyoonn bi yaa ti ban bi koo Libool ngbaan ni, bee bi yaa ti dan kitork aabimbiln chee na, ke Uwumbɔr aah nan bui u ke u ŋa pu na.

³³ Moses nan gaa tiwan mann gob Libool ni kitork aabimbiln ngbaan, le ki di likekeln leen tiwan ngbaan aabisamɔb. Kina le u nan ŋa lituln ngbaan mɔmɔk doo.

Uwumbɔr aataalangbam aah nan biin Waabool pu pu na

³⁴ N‑yoonn ngbaan, Uwumbɔr aataalangbam nan biin Libool pu, le waawiihn mu moor ki deer ŋinimbil na gbiin li ponn ni.

³⁵ Nimina pu na, Moses aa nan ŋmaa koo Libool ngbaan ni.

³⁶ Buyoonn Uwumbɔr aataalangbam ti biir Libool ngbaan pu nin chee Israel yaab nan ka na, le Israel yaab ti fii nima chee.

³⁷ N‑yoonn mumɔk ntaalangbam ngbaan si nima chee na kan, baa fii nima.

³⁸ N‑yoonn mu bi nan bi chuun kina na, bi nan kani Uwumbɔr aataalangbam ngbaan biini Libool na pu, nwiin pu, le kinyeek kan, ni ye mmii ki wiin li pu.