Nnyam 4 - Uwumbɔr aagbaŋ

Uwumbɔr aah tii Moses lijinjiir aapɔɔn pu na

¹ Moses nan bui Uwumbɔr ke, “Nibaakan, Israel yaab yaa kaa gaa mi ki kii, kaan pel maah ga len pu na kan, bi yaa bui ke saa dan m chee kan, m ga ŋa kinye?”

² Le Uwumbɔr baa u ke, “Aa joo ba?” Le u bui ke, “Kijaangbeek.”

³ Le Uwumbɔr bui u ke, “Di ki mee lii kitiŋ.” N‑yoonn mu Moses di ki mee lii na, le ki kpaln uwaa, le u san nima chee.

⁴ Le Uwumbɔr bui Moses ke, “Boon ki chuu lijuul wɔb.” Nima chee le Moses boon le ki chuu li, le li ki kpaln kijaangbeek.

⁵ Le Uwumbɔr bui u ke, “Ti ŋa kina ki mɔk Israel yaab ke Uwumbɔr, u ye niyaajatiib Abraham, ni Aisak, ni Jakob Aawumbɔr na le dan aa chee.”

⁶ Uwumbɔr nan ki bui Moses ke, “Di aaŋaal ŋa saabɔkul ponn ni.” Le Moses ŋa kina. Waah nyan uŋaal na, le mu kpaln ibusoon.

⁷ Uwumbɔr nan ki bui u ke, “Ki giin aaŋaal ŋa saabɔkul ni.” Le u ŋa kina, le n‑yoonn mu u chuu nyan ni mu na, mu ki pɔɔ, ki bi ke uwon tiken aah bi pu na.

⁸ Le Uwumbɔr bui ke, “Bi yaa kaa ti ŋun tii si, bee bi yaa kaa faar njan aajinjiir aatuln na kan, nibaakan bi ga faar lelee aajinjiir aatuln.

⁹ Hali bi yaa kaa ki faar lelee aajinjiir aatuln ngbaan mu, kaa gaa si kii kan, ki yaa yii, ke baan pel saah len pu na kan, buen ti kab Nail aamɔɔl aanyun ki di mu kpir kitiŋ binimbiin ni. Nnyun ngbaan ga kpaln nsin.”

¹⁰ Moses nan bui ke, “Aayii, Ndindaan, taa tun mi. Maa ŋmaa len tibɔr mbamɔm, le saah piin ki len m chee buyoonn ki nan saa dandana wee na, m beenin bi kina la, maa ŋmaa len mala mala.”

¹¹ Le Uwumbɔr bui u ke, “Ŋma tii unii bumɔb? Ŋma cha unii ye utafakpaa, bee ubir? Ŋma tii unii ŋinimbil, ki ki cha u ŋani ujoon? Min Uwumbɔr le ŋani kina.

¹² Nima pu na, li cha. M ga ter si aa len, le ki tuk si saah ga len pu na.”

¹³ Moses nan bui ke, “Aayii, Ndindaan, tun ubaa.”

¹⁴ Moses aah nan len kina na, Uwumbɔr nan gee liŋuul u pu le ki bui u ke, “Aakpel Aaronn, u ye Liifai aanii na aa bi ii? M nyi ke uma ga ŋmaa len mbamɔm. Mbamɔn, u choo u nan to si nsan ni. U yaa nan kan si kan, u ga li kpa mpopiin.

¹⁵ Bui u waah ga len pu na. M ga ter nimɔk bilee ni len, ki mɔk nimi naah ga ŋa pu na.

¹⁶ Uma le ga len tibɔr tii si, ki bui binib ngbaan saah ban aa len pu na. Le aa ga sil Uwumbɔr aasisiiyaan, ki bui Aaronn waah ga len pu na.

¹⁷ Li joo kijaangbeek kee aabaa chee, kima le aa ga li joo tun lijinjiir aatuln ngbaan.”

Moses aah gir buen Ijipt aatiŋ ni pu na

¹⁸ Moses nan gir buen Jetro, uchool uja chee, le ki ti bui u ke, “Cha m gir buen ndo yaab chee, Ijipt aatiŋ ni, ki ti lik ke bi beenin bi aan baa ki bi.” Jetro nan kii tii u, le ki chɔi u.

¹⁹ Buyoonn Moses nan beenin bi Midiann aatiŋ ni na, le Uwumbɔr bui u ke, “Gir buen Ijipt aatiŋ ni; binib bimɔk nan ban bi ku si na kpo doo a.”

²⁰ Nima pu na, Moses nan yoor upuu ni ujapɔtiib ki di bi diŋ ubon pu, le ki siir cha Ijipt aatiŋ ni, ki joo kijaangbeek ki Uwumbɔr bui u ke u li joo na.

²¹ Uwumbɔr nan ki gir bui Moses ke, “Saah gir cha Ijipt aatiŋ ni dandana wee na, li nyi ki ti ŋa lijinjiir aatun ŋimɔk m tii si mpɔɔn ke aa ti ŋa na. Tɔ, m ga pɔɔk ubɔr ngbaan aasui, le waan tii nimi nsan ke ni buen.

²² Aa ga bui u ke min Uwumbɔr len ke, ‘Israel yaab le ye maajan aabijabo.

²³ M tuk si, ubɔr, ke aa cha njapɔɔn ngbaan nya ki li cha, nima kan, u ga doon mi ubaa pu, le aa yii. Dandana wee m ga ku saajan aabijabim.’”

²⁴ Moses aah nan cha Ijipt aatiŋ ni na, u nan ti fuu nibaa chee, le bi doon nima, le Uwumbɔr dan u chee le ki ban ke u ku u.

^25-26 Moses aapuu Sipora nan di litakpal li ka ke kijuk na, le ki gii ujapɔɔn aachakpaln le ki di kichakpangbaŋ ngbaan meeh Moses aataafar. Lichakpangeei ngbaan pu le u bui Moses ke, “Aa ye nsin aachal le ki tii mi.” Nima pu na, Uwumbɔr aa nan ku Moses.

²⁷ Uwumbɔr nan bui Aaronn mu ke, “Li cha nteersakpiin pu ki pii Moses nima.” Nima pu na, u nan buen u ti to Moses, Uwumbɔr aajool ngbaan chee; waah kan u na, le u moor utakpiln.

²⁸ Moses nan tuk Aaronn, Uwumbɔr aah bui u pu ki ban ke u gir buen Ijipt aatiŋ ni pu na; u nan ki tuk u lijinjiir aatun ŋi Uwumbɔr bui u ke u tun na.

²⁹ Nima pu na, Moses ni Aaronn nan dii buen Ijipt aatiŋ ni, le ki ti kuun Israel yaab aaninkpiib tɔb chee.

³⁰ Le Aaronn tuk bi tibɔr ti Uwumbɔr nan bui Moses na mɔmɔk, le Moses ŋa lijinjiir aatun binib ngbaan aanimbil ni.

³¹ Bi nan gaa kii, le baah ŋun ke Uwumbɔr dan bi chee ki nan kan baah muk bi ki ŋani bi falaa pu na, le bi gbaan kitiŋ ki doon u.