Nnyam 39 - Uwumbɔr aagbaŋ

Baah nan ŋal bitotoorb aawanpeenkaan pu na

¹ Bi nan di tikokonbɔnn, ni nsiin, ni timann le luu ŋitanyaan ki di ŋal tiwanpeenkaan ni ŋan sakpen na, ke bitotoorb li joo peeni buyoonn bi yaa ti ban bi tun lituln Uwumbɔr aapepel ni na. Bi nan ŋa bitotoorb aawanpeenkaan ngbaan tii Aaronn, Uwumbɔr aah nan bui Moses ke u ŋa pu na.

² Bi nan di ŋitanyaan, ni tikokonbɔnn, ni nsiin, ni timann, ni salmaa aakokonn ŋa libɔkul li kaa kpa iŋaal na.

³ Bi nan di ligagaar le gbaa salmaa aakur, le ki geei ti ŋa tikokonn waatiir ki di luu ŋitanyaan, le ki di ŋa tikokonbɔnn, ni nsiin, ni timann aakokonn.

⁴ Bi nan ŋa ŋibɔgbin aaŋminju ilee, ki di ŋal dab libɔkul li kaa kpa iŋaal na aamɔju, nima kan, bi ga li joo gbei.

⁵ Bi nan di ŋitanyaan ngbaan le ŋal ligbapapaln ki di dab libɔkul ngbaan aan ni ŋa liwanbaal, ke Uwumbɔr aah nan bui Moses ke u ŋa pu na.

⁶ Bi nan ban ŋitakpanyaan ŋilee ŋi bi yin ŋi ke kaneliann na, le ki di ŋi tam salmaa pu. Bi nan ŋmee Jakob aajapɔtiib kipiik ni bilee na aayimbil paan ŋi pu mbamɔm.

⁷ Bi nan di ŋi tam libɔkul li kaa kpa iŋaal na aabɔgbin aaŋminju ilee na le pu, ni mɔk Israel yaab aanibol inaakɔsamɔi kipiik ni ilee na, ke Uwumbɔr aah nan bui Moses ke u ŋa pu na.

Baah nan ŋal kibiŋ aakekengeŋ pu na

⁸ Bi nan di ŋitanbaan ŋi bi di ŋal libɔkul li kaa kpa iŋaal na le ŋal kibiŋ pu aakekengeŋ, le ki gbaŋ li mu pu tiwanbaan.

⁹ Ni nan bi likpakpaln la, le ki kpab nfum mulee, naafɔfɔk nan ye lisaŋ ni ligeln, le naapepeen mu ye lisaŋ ni ligeln.

¹⁰ Bi nan di ŋitakpanyaan ŋitaa lur nfum munaa pu le ki di tam li pu: njan aakuul pu, bi nan di litakpanyaan mamaln li bi yin li ke rubi, ni litakpanyaan li waa chain aan bi yin li ke topas, ni litakpanyaan mamaln li waa chain aan bi yin li ke ganet na le tam;

¹¹ lelee aakuul pu bi nan di litakpanyaan li ye liŋaankal aan bi yin li ke emeral, ni litakpanyaan li bɔn timm aan bi yin li ke safir, ni litakpanyaan li moor aan bi yin li ke diamonn na, le ki di tam;

¹² taataa aakuul pu bi nan di litakpanyaan li ye liŋaankal ki bɔn timm aan bi yin li ke tukois, ni litakpanyaan li bi ke limɔɔtambol aatakpanyaan aan bi yin li ke agate, ni litakpanyaan li man chaun aan bi yin li ke ametis na, le ki di tam;

¹³ nanaa aakuul pu bi nan di litakpanyaan li bi yin li ke beril, ni litakpanyaan li bi yin li ke kaneliann, ni litakpanyaan li ye nkonyon aan bi yin li ke jaspa na, le ki di tam. Bi nan di ŋi mɔmɔk tam salmaa pu la.

¹⁴ Ŋitakpanyaan kipiik ni ŋilee ngbaan pu, bi nan ŋmee Jakob aajapɔtiib ubaabaa aayimbil paan ŋi pu, le ni mɔk Israel yaab aanibol kipiik ni ŋilee na.

¹⁵ Kibiŋ aakekengeŋ ngbaan pu, bi nan ŋa salmaa aakululn ti mur ke ŋŋmin na,

¹⁶ le ki ŋa salmaa aawan nilee, ni salmaa aabɔmbim mulee mu ŋal dab kibiŋ aakekengeŋ ngbaan aapaacham aamɔju ilee na.

¹⁷ Bi nan di salmaa aakululn ti mur ke ŋŋmin na le ki di ŋal dab mbɔmbim mulee ngbaan,

¹⁸ le ki di salmaa aakululn aamɔju ilee iken na ŋal dab salmaa aawan nilee ngbaan, le ni dab libɔkul li kaa kpa iŋaal na aanimbiin ni aaŋmimɔju ilee na pu.

¹⁹ Bi nan ŋa salmaa aabɔmbim mulee mu, ki di ŋal kibiŋ aakekengeŋ ngbaan aaponn ni aataab aamɔju ilee i bi libɔkul li kaa kpa iŋaal na chee.

²⁰ Bi nan ki ŋa salmaa aabɔmbim mulee kpee, ki di mu ŋal dab libɔkul ngbaan aabɔgbin aaŋmimɔju aataab, nimbiin ni wɔb, ki duun baah ŋal dab nin chee na, ligbapapaln aapaacham.

²¹ Uwumbɔr aah nan bui Moses ke u ŋa pu na, bi nan di kibiŋ pu aakekengeŋ aabɔmbim, le ki di ŋŋmimurkoo mu bɔn timm na, ki di gbin dab libɔkul li kaa kpa iŋaal na aabɔmbim, le li ni kibiŋ aakekengeŋ ngbaan baa ligbapapaln aapaacham, kaa sɔkr.

Baah nan ŋa bitotoorb aawanpeenkaan niken pu na

²² Bi nan di ŋitan ŋi bɔn timm na ŋmeen le ki di ŋal kikpalk ki bi libɔkul li kaa kpa iŋaal na aataab.

²³ Bi nan gbaŋ mann gonn uyil aah jer nin chee na, ni taa kar.

^24-26 Bi nan di tikokonn nyaan, ni upiih aakur ti man chaun ki bɔn timm, ni nsiin, ni timann na, ki buu ti nkokon, ki di ni ni salmaa aabɔluln ki di tuun char tɔb ni, ki mann gonn kikpalk ngbaan aataab, ke Uwumbɔr aah nan bui Moses ke u ŋa pu na.

²⁷ Bi nan ŋa tiwanpeenkaan tii Aaronn ni ujapɔtiib,

²⁸ ni nan ye ŋibɔkul, ni tiyikpupur, ni ŋitanyaan aatuutagen,

²⁹ ni kikekengeŋ ki bi joo buu kichaŋ ni na, ki bi di ŋitanyaan, ni ipiih aakur ti man chaun ki bɔn timm, ni nsiin, ni timann na, ki di gbaŋ mann gonn ŋimɔgben, ke Uwumbɔr aah nan bui Moses ke u ŋa pu na.

³⁰ Bi nan di salmaa ŋmeen le ŋa tiwanyaan, ki ŋmee li pu ke “Uwumbɔr yoo”,

³¹ le ki di litaln li bɔn timm na tuun tiwan ngbaan ki di jɔn kiyikpupuk, uyigbeer pu, Uwumbɔr aah nan bui Moses ke u ŋa pu na.

Baah nan ŋa Uwumbɔr Aabool doo pu na

³² Uwumbɔr Aabool aatuln nan doo kookoo. Israel yaab nan ŋa tiwan ngbaan mɔmɔk ke Uwumbɔr aah nan bui Moses ke u ŋa ni pu na.

³³ Bi nan joo ni Moses chee Libool ngbaan, ni laawan mɔmɔk, ni nan ye ipigɔrkee, ni tiwon, ni idɔpuinkee, ni idɔja, ni idɔ i dɔ taab na;

³⁴ ni ipihja aagbaman, ni igbanyaan, ni likekeln li bi di kiir na;

³⁵ ni Uwumbɔr Aakaal Aadakaa u ŋitakpapapan ŋilee bi u ponn ni na, ni waadɔ, ni waabiil,

³⁶ ni teebul, ni waawan mɔmɔk, ni boroboro u bi joo tii Uwumbɔr na;

³⁷ ni karyaa tiib aah tɔŋni tiwan ni pu aan bi di salmaa ŋmeen ŋa ni na, ni karyaa tiib, ni baawan mɔmɔk, ni baakpan,

³⁸ ni salmaa aabimbiln, ni Uwumbɔr aakpan, ni tulalee aayon mu nu mɔ na, ni Libool ngbaan aabisamɔb aakekeln,

³⁹ ni baah seer ipiin aatork nin chee na aabimbiln li bi di tikumann ŋa li na, ni tikumann aaŋulk, ni laadɔja, ni laawan mɔmɔk, ni lisambil li bi ŋir biŋaal li ponn ni na, ni laapɔtaln,

⁴⁰ ni ŋikeken ŋi bi di gob mann na, ni idɔja, ni idɔ i dɔ taab na, ni likekeln li bi di biin mbisamɔb na, ni Libool ngbaan aaŋmin, ni laakpaa, ni laawan mɔmɔk,

⁴¹ ni ŋibɔkunyaan ŋi bitotoorb ga li joo peeni n‑yoonn mu bi yaa ti ban bi tun lituln Chain Aapepel ni na, ŋi ye ŋikekenyaan ŋi Aaronn ni ujapɔtiib bi ye bitotoorb na ga li peeni na.

⁴² Israel yaab nan ŋa lituln ngbaan mɔmɔk ke Uwumbɔr aah nan tuk Moses ke u ŋa pu na.

⁴³ Moses nan lik tiwan ngbaan mɔmɔk le ki kan ke bi ŋa nimɔk ke Uwumbɔr aah nan bui ke bi ŋa pu na. Nima pu na, Moses nan mee Uwumbɔr aanyoor ŋa bi pu.