Nnyam 38 - Uwumbɔr aagbaŋ

Baah ŋa kitork aabimbiln pu na

¹ U nan di lisiijal aadɔ le ŋa kitork aabimbiln. Li nan ye likpakpaln la, laah fɔk pu na nan ye ŋitaa ŋilole ni ligeln, le laah waa pu na mu ye ŋitaa ŋilole ni ligeln, le laah fɔk paacham pu na ye ŋitaa ŋinaa ni ligeln.

² U nan ŋa ŋimɔchɔn ki baan ŋimɔgben ŋinaa pu, le ni kpaan liwanbaal. U nan di tikumann aakur le donn biin li pu.

³ U nan ki ŋa laawan mɔmɔk kpee li pu: ŋisambil ŋi bi ga li joo nfatan ŋani ŋi ponn ni na, ni ŋichakpaa, ni ŋisambil, ni inanmoon. Bi nan di tikumann aakur le ŋa ni mɔmɔk.

⁴ U nan di tikumann aakur le mɔɔ kiŋulk le ki di taŋ libimbiln ngbaan aakaasisik ni.

⁵ U nan mɔɔ ibuen inaa le ki di dab baan ŋimɔgben ŋinaa ngbaan.

⁶ U nan di lisiijal aadɔ le kpii idɔ, le ki donn tikumann aakur biin i pu,

⁷ le ki di i bɔ ibuen inaa na ponn ni. Bi nan di idɔ le ŋa li, le li ponn ni ye kiloŋ.

Baah ŋa tikumann aakur aasambil pu na

⁸ U nan di bipiib bi tun lituln Uwumbɔr Aabool aabisamɔb chee na aakumann aanimbilikr, le ki donn ti ki ŋa tikumann aasambil ni laapɔtaln.

Baah gaa tiwan gob Uwumbɔr Aabool pu na

⁹ Uwumbɔr aah ga li bi Libool li ponn ni na, u nan di ŋitanyaan aakekeln le gaa tiwan gob li. U nan di likekeln li aafɔfɔk ye ŋitaa nkub ni piiŋmu na,

¹⁰ le ki di tikumann aakur aadɔja moninko, ki di chɔɔn tikumann aadɔ moninko i dɔ taab na pu, ki kpee ipigɔrkee ni tikunabr aakur aadɔ ki di gob ŋŋangii wɔb.

¹¹ U nan ŋa kina le ŋŋangan wɔb mu.

¹² U nan di likekeln li aafɔfɔk ye ŋitaa imonko itaa ni kipiik ni ŋiŋmu na, ni idɔja kipiik, ki di chɔɔn idɔ kipiik i dɔ taab na, ki kpee ipigɔrkee ni tikunabr aakur aadɔ, le ki di gob liwilir aapepel wɔb.

¹³ U nan di likekeln li aafɔfɔk ye ŋitaa imonko itaa ni kipiik ni ŋiŋmu na, le ki di gob mbisamɔb, liwipuul aapepel wɔb.

^14-15 Mbisamɔb ngbaan aapepel mɔmɔk ŋilee aakeken ngbaan nan ye ŋitaa moninko ni ŋilee ni ligeln, le ki di idɔja itata chɔɔn ŋŋangii ni ŋŋangan wɔb aadɔ i dɔ taab na pu.

¹⁶ Ŋikeken ngbaan nan ye ŋitanyaan ŋmeen, le ki mann gonn Libool ngbaan.

¹⁷ Idɔ i nan dɔ taab na nan ye tikumann aakur ŋmeen la, le ipigɔrkee ni tikur aadɔ nan ye tikunabr aakur. Le bi di tikunabr donn biin idɔja na aapaacham. Bi nan ki di tikunabr le ŋa idɔ i bi di punn na.

¹⁸ Bi nan di ŋitanyaan aakekeln li bi nan di ipiih aakobɔnn, ni nsiin, ni timann luu li, ki gbaŋ mann gonn li na leen baah gob ni na aabisamɔb. Laafɔfɔk nan ye ŋitaa piitaa, le laah fɔk paacham pu na ye ŋitaa ŋilole ni ligeln, ke ŋikeken ŋi bi di gob na.

¹⁹ Bi nan di li leen idɔja inaa i chɔɔ tikumann aadɔ inaa i dɔ taab na pu la. Ipigɔrkee, ni idɔja paacham, ni tikur aadɔ na, bi nan di tikunabr aakur le ŋa ni.

²⁰ Bi nan di tikumann aakur le mɔɔ Libool ni tiwan ngbaan aakpaa mɔmɔk.

Baah nan di tikur ti di ŋa Uwumbɔr Aabool ngbaan na

²¹ Baah nan di tikur timɔk ŋa Uwumbɔr Aabool li ponn ni ŋitakpapapan ŋilee ŋi pu Uwumbɔr nan ŋmee ikaal kipiik na aakahm sɔ: Moses le nan cha Liifai yaab ŋmee tiwan ngbaan mɔmɔk, le utotoor Aaronn aajapɔɔn Itamar nan mɔk bi baah ga ŋmee ni pu na.

²² Uri aajapɔɔn Besalel u aayaaja ye Hur aan u nyan ni Juda aanibol ni na, le nan ŋa tiwan mɔmɔk, Uwumbɔr aah nan tuk Moses pu na.

²³ Waateter le nan ye Ahisamak aajapɔɔn Oholiab u nyan ni Dann aanibol ni na, uma le nan ŋmee tiwan ŋitakpal pu, ki naani tiwan aabɔŋ, ki luu ŋitanyaan aakeken, ki joo ipiih aakobɔnn, ni nsiin, ni timann mu luu ŋikeken ŋiken.

²⁴ Salmaa aakur ti mɔmɔk bi nan di tii Uwumbɔr, Waabool pu na, taanyunyuun ga li pii ndibim kuruwaa lichur.

²⁵ Baah nan kahn binib bi na aah nan tii tikunabr aakur ti na aanyunyuun ga li pii ndibim kuruwaa ŋichur ŋitaa ni ikui inaa ni piitaa.

²⁶ Baah nan kahn binib bi fuu ŋibin moninko ki jer na le nan pan tikunabr aakur ngbaan ŋeer baah ye pu na. Binib ngbaan mɔmɔk nan ye binib ŋichur ikui iloob ni ŋitaa ni ikui iŋmu ni piiŋmu la.

²⁷ Le bi nan di tikunabr aakur ti aanyunyuun ga li pii ndibim kuruwaa ŋichur ŋitaa ni ikui inaa na, ŋa Libool ni laakeken aadɔ nkub i dɔ taab na. Ndɔ mɔk nan jin tikunabr ti aanyunyuun ga li pii ndibim kuruwaa piitaa ni binaa na.

²⁸ Besalel nan di tikunabr aakur ti gur aan taanyunyuun ga li pii ndibim kuruwaa piitaa na mɔɔ tikur aadɔ ni ipigɔrkee ki di dab idɔja pu, ki donn ti gur na biin idɔja ngbaan aapaacham.

²⁹ Baah nan di tikumann aakur ti di tii Uwumbɔr na aanyunyuun ga li pii ndibim kuruwaa ŋichur ŋilee ni ikui inaa ni moninko ni biŋmu.

³⁰ U nan di tikur ngbaan le ki di ŋa mbisamɔb aadɔ i dɔ taab na, ni libimbiln, ni laaŋulk, ni laawan mɔmɔk.

³¹ U nan ki di tikur ngbaan le mɔɔ tiwan ni nan gob Libool ngbaan aadɔ i dɔ taab na, ni naabisamɔb aadɔ i dɔ taab na mu, ni Libool ngbaan, ni tiwan ni gob li na aakpaa mɔmɔk.