Nnyam 35 - Uwumbɔr aagbaŋ

Likpaakool daal aabɔr

¹ Moses nan yin Israel yaab mɔmɔk ki kuun ni bi ubaa chee, le ki nan bui bi ke, “Uwumbɔr aah bui ke m tuk nimi pu na sɔ:

² ni kpa iwiin iloob, ni li tun nibaa aatuln, winlole daal ma kan, ni li joo mu chain, ni di mu tii mi Uwumbɔr, nwiin ngbaan li ye lifuur daal. Unii umɔk tun lituln nwiin ngbaan daal na kan, ni ku u.

³ Uwumbɔr aakpaakool ngbaan daal kan, ubaa taa tuur mmii udo lichiln ni.”

Uwumbɔr Aabool aapiin aabɔr

⁴ Moses nan ki bui Israel yaab ngbaan mɔmɔk ke, “Uwumbɔr aah len pu na sɔ:

⁵ Tiin Uwumbɔr ipiin man. Unii umɔk ban u ŋa kina na kan, u li joo ni salmaa, ni tikunabr, ni tikumann,

⁶ ni ŋitanyaan, ni ŋitambɔn, ni ŋitaman, ni tiŋɔkor aakeken,

⁷ ni ipihja aagbaman, ni igbanyaan, ni lisiijal aadɔ,

⁸ ni nkpan mu bi joo seer karyaa tiib na, ni tulalee u bi joo ŋmalni Uwumbɔr aakpan ni na, ni tulalee aayon mu nu mɔ na;

⁹ ni ŋitakpanyaan ŋi bi ga di ŋa Utotoorninkpel aabɔkul li kaa kpa iŋaal na, ni liwapapaln li bi ubiŋ pu na.

Uwumbɔr Aabool aawan

¹⁰ “Bijab bi nyi baatuln mbamɔm na, nimi le ga nyan ni ki ŋa Uwumbɔr aah tuk nimi pu na.

¹¹ Waah ban ni ŋa tiwan ni na sɔ: Libool ngbaan, ni baah ga li joo tiwan ni biini li pu na nilee, ni ipigɔrkee, ni tiwon, ni idɔpuinkee, ni idɔja, ni idɔ i dɔ taab na,

¹² ni Uwumbɔr Aakaal Aadakaa, ni waadɔ, ni waabiil, ni likekeln li bi ga di kiir u na,

¹³ ni teebul, ni waadɔ, ni waawan mɔmɔk, ni boroboro u ni ga di tii Uwumbɔr na,

¹⁴ ni karyaa tiib aah ga li tɔŋni tiwan ni pu na, ni waawan mɔmɔk, ni karyaa tiib ni baakpan,

¹⁵ ni tulalee aayon aabimbiln, ni laadɔja, ni Uwumbɔr aakpan, ni tulalee aayon mu nu mɔ na, ni mbisamɔb aakekeln,

¹⁶ ni baah ga li seer ipiin aatork ni pu na aabimbiln, ni tikumann aaŋulk ki tak li na, ki kpee laadɔja ni laawan mɔmɔk, ni lisambil li bi ga li ŋir biŋaal li ponn ni na, ni laapɔtaln,

¹⁷ ni ŋikeken ŋi bi ga di gob mann Libool ngbaan na, ni idɔja, ni idɔ i dɔ taab na, ni mbisamɔb aakekeln,

¹⁸ ni ikpaa, ni iŋmin,

¹⁹ ni ŋibɔkunyaan ŋi bitotoorb ga li joo peeni n‑yoonn mu bi yaa ti ban bi tun lituln, chain aapepel ni na, ŋi ye ŋikekenyaan ŋi Aaronn ni ujapɔtiib bi ye bitotoorb na ga li peeni na.”

Baah nan tii Uwumbɔr baapiin pu na

²⁰ Israel aanib ngbaan mɔmɔk nan siir,

²¹ le binib bi mɔmɔk nan gee ke bi tii na nan joo ni baapiin nan tii Uwumbɔr, bi di ŋa Waabool. Bi nan joo ni tiwan nimɔk bi ga li joo dooni Uwumbɔr na, ni baah ga di ni ŋal bitotoorb aawanpeenkaan na.

²² Binib bi mɔmɔk nan gee bi tii na, bijab ni bipiib mɔmɔk, nan joo ni ipinbi waatiir i ŋan na, ni tafajɔn tiib, ni mbɔmbim, ni neeni aakuleen, ki kpee salmaa aawan aabɔŋ aabɔŋ, le ki di tii Uwumbɔr.

²³ Unii umɔk nan kpa ŋitanyaan, ni upiih aakur ti man chaun na, ni nsiin, ni timann, ni tiŋɔkor aakekeln; ni ipihgbaman, ni igbanyaan, bi nan joo ni nimɔk.

²⁴ Binib bimɔk nan kpa tikunabr, bee tikumann na, nan joo ni baah ga ŋmaa tii pu na, le ki nan tii Uwumbɔr baapiin, le binib bi nan kpa lisiijal aadɔ bi ga ŋmaa di i ŋa nibaa na, mu nan joo ni.

²⁵ Bipiib bi mɔmɔk ŋmaa fik tikokonn na nan joo ni tikokonn ti ŋan na, ni tibɔmbɔnn, ni timamann, ni tikur mamann aakokonn mu.

²⁶ Bi nan di tiŋɔkor mu fik tikokonn ki joo ni.

²⁷ Le bisalolm joo ni ŋitakpanyaan aabɔŋ, bi di ŋa utotoor aabɔkul li kaa kpa iŋaal na, ni kibiŋ aakekengeŋ na mu,

²⁸ ni mbaabil, ni nkpan mu bi ga li joo ŋani karyaa tiib ponn ni, ni Uwumbɔr aakpan, ni tulalee aayon mu na.

²⁹ Le Israel aanib bimɔk nan gee bi tii na nan joo ni baapiin ki nan tii Uwumbɔr, waah nan bui Moses lituln li na pu.

Binib bi ga ŋmaa ŋa Uwumbɔr Aabool aawan na

³⁰ Moses nan ki bui Israel yaab ke, “Uwumbɔr lee Uri aajapɔɔn u bi yin u ke Besalel, aan u ye Hur aayaabil na, ki nyan ni Juda aanibol ni na.

³¹ Uwumbɔr gbiin u mpɔɔn, le ki tii u nnyim, ni nlan, ni mbeem, ke u li nyi tiwanyaan aatuln mɔmɔk,

³² le u kpa nlandak ki nyi waah ga di salmaa, ni tikunabr, ni tikumann ki donn ŋa tiwanyaan mɔmɔk aabɔŋ pu na,

³³ le ki nyi waah ga gii ŋitakpanyaan pu ki ŋeer waah ban pu na; ki ŋmaa kpii tiwan aabɔŋ, ki nyi tiwanyaan aatuln mɔmɔk.

³⁴ Uwumbɔr di kina aalan ki di tii u ni Ahisamak aajapɔɔn u bi yin u ke Oholiab aan u nyan ni Dann aanibol ni na, ke bi di baah nyi pu na mɔk biken.

³⁵ U cha bi ŋmaa kpii ŋitakpanyaan pu, bee tikunabr pu, ki ŋmee ki naani tiwan aabɔŋ ni pu, ki ŋmaa joo tikokonn luu ŋitanyaan, ni ŋikeken ŋiken aabɔŋ. Bi nyi ki ŋmaa ŋani tiwan aabɔŋ, ki ŋmaa joo ipiih aakur ti man chaun, ni nsiin, ni timann na gbaŋni nyɔla nyɔla mɔmɔk aabɔŋ.