Nnyam 34 - Uwumbɔr aagbaŋ

Uwumbɔr aah nan ki ŋmee ikaal lelee pu na

¹ Uwumbɔr nan ki bui Moses ke, “Kpii ŋitakpal ŋilee, ŋi li bi ke njan yee na, aan m ki ŋmee ŋi pu ŋimɔbon ŋi nan bi njan yee, ŋi aa nan di lii wii na.

² Gor aabaa, aan kichakpiik ni kan, aa fe dan Sainai Aajool paab m chee nima.

³ Ubaa taa dii ni si; ubaa taa cha m kan u lijool chee nima; kiwakork kibaa taa dan lijool ngbaan taab ki nan ŋmɔ timoor.”

⁴ Le Moses nan ŋa Uwumbɔr aah len pu na, ki kpii ŋitakpal ŋilee ngbaan. Naah woln kichakpiik ni na, le u di ŋi jon Sainai Aajool ngbaan paab.

⁵ Le Uwumbɔr sunn ni ntaalangbam ponn ni, ki nan sil u chee nima, le ki yin ubaa ke U‑ye‑na u aayimbil bi chain na.

⁶ Uwumbɔr nan jer unimbiin ni le ki bui u ke, “Min, U‑ye‑na, min le ye Uwumbɔr u kpa linimbaasaln, kaa gee liŋuul yɔl yɔl na, ki gee binib mbamɔm, ki ŋani maah len pu na.

⁷ M joo maah puu tipuur ti na le ti ye ki tii mmaal lichur, le ki cha pinni titunwanbir; mmaal mu aatetiib tun titunwanbir na kan, m ga daa biyaabitiib ni biyaabisɔsɔk aatafal.”

⁸ Moses nan gbaan kitiŋ mala le ki doon u,

⁹ le ki bui ke, “Ndindaan, maabimbin yaa piir aasui kan, m mee si ke aa dii timi buen. Binib ngbaan aasui pɔɔ pam. Cha pinn timi aataani, ni timi aatunwanbir, aan ki cha ti li ye saanib.”

Uwumbɔr aah ki fikr waah puu tipuur ti na

¹⁰ Uwumbɔr nan ki bui Moses ke, “M ki puu tipuur Israel yaab chee la. M ga ŋa lijinjiir aatuln li kaa kee ŋa dulnyaa wee ni na, binimbil ni. Le binib mɔmɔk ga kan litukpaan li min Uwumbɔr ga ŋmaa ŋa na; ba pu? m ga ŋa lijinjiir aawan tii nimi.

¹¹ Ni li kpa ŋuntii ki joo cha ikaal i m di mɔk nimi din wee na wɔb. M ga jenn nyan Amor yaab, ni Kanaann yaab, ni Hef yaab, ni Peris yaab, ni Hif yaab, ni Jebus yaab, naah ga li tur koo bi ponn ni pu na.

¹² Ni taa kpaan binib ngbaan chee ki ŋa kimɔbaan; ba pu? ni yaa ŋa kina kan, ni ga cha ni yenn.

¹³ Ni gbaa wii baawaa aatork aabimbin, ni ŋitakpal ŋi bi dooni na, ki bii baawaapii li bi yin li ke Asera na, ni laawan mɔmɔk.

¹⁴ “Ni taa doon liwaal libaa; ba pu? Min, Uwumbɔr aan kii ke Israel yaab li dooni tiwan nibaa ki kpee m pu.

¹⁵ Ni taa kpaan binib ngbaan chee ki ŋa kimɔbaan, ba pu? n‑yoonn mu bi toor baawaa na kan, bi ga chɔi nimi, ni ji kitork aajikaar ngbaan.

¹⁶ Nibaakan, nijapɔtiib mu ga yoor bibisatiib, le bibisatiib ngbaan ga fenn nijapɔtiib aasui, le bi ga yii mi ki dii binib ngbaan aawaa.

¹⁷ “Ni taa di tikur ŋa liwaal ki li dooni li.

¹⁸ “Ni li ji boroboro u kaa kpa boroboro aanyɔk na aajim. N‑yoonn ngbaan kan, ni li ŋmɔ boroboro u kaa kpa nnyɔk na ki ti saa iwiin ilole, Abib aaŋmal ni, ba pu? uŋmal ngbaan ni, le ni nan nyan Ijipt aatiŋ ni.

¹⁹ “Israel yaab aah ma njan aabijabim bi na, ni baawakor aajan aabim mɔmɔk ye min yaan la,

²⁰ tɔ, see ni ki gir di upihjabo kpeln ibon aajan aabim m chee. Ni yaa kaan kpeln kan, ni nyii koo usil. Nimi aabijabim ma kan, see ni ki gir daa bi m chee. “Unii umɔk choo nnimbiin ni ke u nan doon mi na kan, u li joo ni ipiin.

²¹ “Ni kpa iwiin iloob le ni di tun nimi aatuln, ni taa tun nibaa winlole daal, ni yaa ye likuul yoonn, bee liwancheel yoonn kan, ni taa tun nibaa liyaadaal ngbaan.

²² “Ni li ji Ndipɔndaan Aajim n‑yoonn mu ni piin ki bi chee njikaabim na, ki li ji Tikakar Aajim buyoonn ni ti kuun tijikaar doo na.

²³ “Libiln ni kan, ni dan ki nan doon min, nimi Israel yaab Aadindaan Uwumbɔr, u ni dii u na, nfum mutaa.

²⁴ Buyoonn m ti jenn nyan ŋinibol ŋimɔk bi ni chee aan ki taln nimi aatiŋ na, ubaa aan ki tak nimi njim mutaa mue aayoonn.

²⁵ “N‑yoonn mu ni di kiwakork toor kitork na kan, ni taa di boroboro u kpa nnyɔk na kpaan tii mi. Ni yaa di kiwakork toor Lakr‑jer Aajim aatork kan, ni taa cha tinann ngbaan gur ki woln kitaak.

²⁶ “Ni li joo ni njan aajikaar ti pue biir nimi aasar ni na, ki di dan min Uwumbɔr Aadichal ni ki nan tii mi. “Ni taa di upiih, bee uŋoob aabiin ŋaa waabo.”

²⁷ Uwumbɔr nan ki bui Moses ke, “Ŋmee tibɔr ngbaan bil; ba pu? tibɔr tee pu le m ga puu tipuur tii sin ni Israel yaab mɔmɔk.”

²⁸ Le Moses nan bi Uwumbɔr chee nima nwiin pu ni kinyeek ki ti saa iwiin imonko ilee, kaa ji, kaa nyu. Le u ŋmee tipuur aakaal kipiik na, ŋitakpapapan ŋilee na pu.

Moses aah nan sunn ni Sainai Aajool taab pu na

²⁹ N‑yoonn mu Moses nan sunn ni Sainai Aajool taab ki joo ni Ikaal kipiik na, le unimbil wɔb moor; ba pu? u nan bi Uwumbɔr chee, le u ni u len tɔb chee tibɔr; Moses ma aa nan nyi kina ubaa.

³⁰ Aaronn ni binib ngbaan aah nan lik Moses aanimbil wɔb na, le bi kan ni moor; le baa kaa ke bi buen u chee.

³¹ Le Moses yin bi, le Aaronn ni Israel yaab aaninkpiib buen u chee, le Moses ti len bi chee tibɔr.

³² Nee aapuwɔb, le Israel yaab mɔmɔk buen ti sil mann gonn u; le Moses di ikaal imɔk Uwumbɔr di tii u lijool paab na, ki di tuk bi.

³³ Moses aah len bi chee tibɔr doo na, le u di likekeln biin unimbil pu.

³⁴ N‑yoonn mu Moses ti buen Uwumbɔr Aabool ni, u ti len u chee na kan, le u chuu biir likekeln ngbaan unimbil wɔb. U yaa ti nyan ni kan, le u tuk Israel aanib ngbaan Uwumbɔr aah len pu na,

³⁵ le bi ti kan ke unimbil wɔb moor. Le u ki di likekeln ngbaan biin unimbil pu, see u ti ki gir cha Uwumbɔr chee.