Nnyam 33 - Uwumbɔr aagbaŋ

Uwumbɔr aah nan bui Israel yaab ke bi fii Sainai Aajool chee ki li cha pu na

¹ Uwumbɔr nan bui Moses ke, “Fii do, aa ni binib bi aa nyan ni bi Ijipt aatiŋ ni na, ki li cha kitiŋ ki m puu tii Abraham, ni Aisak, ni Jakob, ni biyaabitiib na ni.

² M ga cha maatuun loln ni pu nsan, le m ga jenn nyan Kanaann yaab, ni Amor yaab, ni Hef yaab, ni Peris yaab, ni Hif yaab, ni Jebus yaab.

³ Ni cha kitiŋ ki kpa nkpan, ni n‑yaan, ki nyuun na ni la. Min mbaa aan dii nimi buen; ba pu? nitafal aah pɔɔ pu na, nibaakan m ga ti kuln nimi nsan ni.”

⁴ N‑yoonn mu binib ngbaan ŋun kina na, le bisui bii, baa ki peeni salmaa aawan kpala,

⁵ ba pu? Uwumbɔr le nan bui Moses ke u tuk binib ngbaan ke, “Nitafal pɔɔ pam. Nibaakan, m yaa ban m dii nimi foor siib kan, m ga kuln nimi kookoo. Tɔ, chuu nyan nimi aasalmaa aaleen, aan m dakl lik maah ga ŋa nimi pu na.”

⁶ Nima pu na, baah nyan Sainai Aajool chee ki cha na, binib ngbaan aa nan ki peeni salmaa aaleen kpala.

Uwumbɔr aah bi Libool li ponn ni na aabɔr

⁷ N‑yoonn mumɔk Israel aanib ngbaan ti kal nin chee na kan, le Moses di Uwumbɔr Aabool li bi chain na ti gaa dandar. U nan yin li ke Uwumbɔr aah bi Libool li ponn ni na, le unii umɔk nan ban u baa Uwumbɔr tibɔr na kan, le u ti buen li chee.

⁸ N‑yoonn mu Moses buen nima na kan, le binib ngbaan nya sil baadir aabisamɔi, le ki lik Moses le u ti koo li ponn ni.

⁹ Moses yaa ti koo li ponn ni kan, le ntaalangbam dan nan sil Libool ngbaan aabisamɔb, le Uwumbɔr len Moses chee tibɔr ntaalangbam ngbaan ponn ni.

¹⁰ Binib ngbaan yaa ti kan ntaalangbam ngbaan kan, le bi ti gbaan kitiŋ.

¹¹ Le Uwumbɔr len Moses chee tibɔr, le ni bi ke unii ni ujɔ le aah bi len tɔb chee na. Le Moses ki gir buen linampal. Le unachipɔɔn u nan ter u, bi yin u ke Josua aan u ye Nunn aajapɔɔn na ma ti bee Libool ngbaan ni.

Uwumbɔr puu ke u ga li bi waanib chee

¹² Moses nan bui Uwumbɔr ke, “Ni ye mbamɔn ke aa tuk mi ke m loln binib ngbaan pu nsan, ki di bi buen kitiŋ ngbaan ni, tɔ, saa tuk mi u ga cheen mi na. Aa bui ke aa nyi mi, ki gee maabɔr mbamɔm.

¹³ Ni yaa ye kina kan, tuk mi saalandak, nima kan, m ga dii si ki piir aasui n‑yoonn mɔmɔk. Teer ke sin le lee linibol ngbaan ke bi li ye saanib.”

¹⁴ Le Uwumbɔr bui u ke, “M mamaŋ ga dii si buen, le ki ga tii si lifuur.”

¹⁵ Moses nan giin bui u ke, “Aa yaa kaan dii timi kan, taa cha ti nya do ki buen.

¹⁶ Aa yaa kaa dii timi buen kan, ni ga ŋa kinye aan unii bee ke aasui piin m ni saanib pu? Saah bi ti chee pu na le ga cha ti ni biken aabimbin taa li kpaa dulnyaa wee ni.”

¹⁷ Uwumbɔr nan gar Moses ke, “M ga ŋa saah mee pu na, ba pu? m nyi si, le nsui piin aa pu mbamɔm.”

¹⁸ Le Moses mee ke, “Uwumbɔr, kina kan, cha m kan si, saawiihn mu moor ki deer ŋinimbil na ni.”

¹⁹ Le Uwumbɔr ki bui u ke, “M ga cha maajilmaa aawiihn ngbaan jer aanimbiin ni, le m ga yin maayimbil li bi chain na. Min le ye Uwumbɔr, le ki kpa linimbaasaln unii u m lee u na pu.

²⁰ Maan cha aa kan nnimbil wɔb, ba pu? unii ubaa aan ŋmaa kan mi ki ki li fu;

²¹ m chee do, mpaan mubaa bi litakpal lee pu aa ga ŋmaa sil.

²² N‑yoonn mu maawiihn mu moor ki deer ŋinimbil na yaa nan jer kan, m ga di si siin kitakpaluŋ kee ni, ki di ŋŋaal biin aa pu, aan ki ti jer doo.

²³ M ga chuu nyan ŋŋaal aa pu, le aa ga kan mpuwɔb ki taa kan nnimbil wɔb.”