Nnyam 32 - Uwumbɔr aagbaŋ

Salmaa aanaaja

¹ N‑yoonn mu binib ngbaan nan bee ke Moses yunn lijool ngbaan paab, kaa sunn ni, ki bi nima chee na, le bi kuun ni ki mann goln Aaronn, le ki bui u ke, “Taa nyi tiwan ni ŋa Moses u nan nyan ni timi Ijipt aatiŋ ni na aan waa gir ni na, nima pu na, ŋa liwaal tii timi, ti li dii li.”

² Le Aaronn bui bi ke, “Chuu nyan ni tafajɔn bi nipuutiib, ni nijapɔtiib, ni nibisatiib tuu na, ki li joo ni bi man.”

³ Nima pu le binib ngbaan mɔmɔk nan chuun nyan ni baasalmaa aatafajɔn le ki joo ni Aaronn chee.

⁴ Le u gaa tafajɔn ngbaan le ki donn bi, le ki di kpaar ŋa tiwan ni naahn unaa na ni, le ni kpaln salmaa aanaajabo. Le binib ngbaan bui ke, “Timi Israel yaab aawaal li nyan ni timi Ijipt aatiŋ ni na le na.”

⁵ Nima chee le Aaronn nan maa kitork aabimbiln, salmaa aanaajabo ngbaan aanimbiin ni, le ki moon ke, “Fen kan, ti ga fe ŋa kitork aajim ki nyuŋ Uwumbɔr.”

⁶ Le ni woln kichakpiik ni, le bi joo ni tiwakor ke bi toor kitork ki di see mmii ni, ki di tiken ŋa tijikaar ki kpaan ji tɔb chee. Le binib ngbaan kal bi ji njim ngbaan, le ni ti kpaln lidanyul ni kidagook aatuln.

⁷ Uwumbɔr nan bui Moses ke, “Gir sunn mala, ba pu? saanib bi aa nyan ni bi Ijipt aatiŋ ni na tun titunwanbir, ki yii mi a.

⁸ Maah mɔk bi ke bi li dii mi pu na, bi di lii a, le ki donn salmaa ŋa unaajabo ki dooni u, ki toor kitork tii u, le ki len ke baawaal sɔ, uma le nyan ni bi Ijipt aatiŋ ni.

⁹ M nyi binib ngbaan aasui aah pɔɔ sakpen pu na.

¹⁰ Nimina ma kan, taa ki gaŋ mi. Liŋuul chuu mi sakpen, le m ga bii bi. M ga tee cha aa ni saamaal ma pɔr ki ŋa linibol sakpeln.”

¹¹ Tɔ, Moses nan gaŋ Udindaan Uwumbɔr le ki bui ke, “Uwumbɔr, ba ŋa aa cha saaŋuul fii saanib pu sakpen kina, naa ye saapɔɔn sakpiin pu le aa nan di nyan ni bi Ijipt aatiŋ ni ii?

¹² Aa ban ke Ijipt yaab len ke aa nyan ni saanib Ijipt aatiŋ ni, ke aa nan ku bi ŋijoo ŋee ni, ki bii bi kookoo la aa? Cha saaŋuul sɔŋ, ki kpeln saalandak, ki taa bii saanib ngbaan kina.

¹³ Teer saanaagbiib Abraham, ni Aisak, ni Jakob bɔr. Teer tipuur bamɔnn ti aa nan puu, ke aa ga cha bi maa ki pɔr, ki li wiir ke iŋmabi i bi kitaapaak na, ki di kitiŋ ki aa nan puu ke aa ga di tii bi, aan bi li yeh ki n‑yoonn mu kaa kpa ndoon na bɔr.”

¹⁴ Nima pu na, Uwumbɔr nan kpeln waalandak, le kaa ki daa bitafal waah nan dak pu na.

¹⁵ Le Moses gir sunn ni lijool ngbaan aataab, ki joo ni ŋitakpapapan ŋilee ŋi Uwumbɔr ŋmee ikaal ŋi pu na.

¹⁶ Uwumbɔr ubaa le nan kpii ŋitakpal ngbaan, le ki ŋmee ikaal ngbaan paan ŋi pu.

¹⁷ Tɔ, Josua nan ŋun binib ngbaan kpa kifuuk, le u bui Moses ke, “M ŋun butɔb aafuuk linampal.”

¹⁸ Le Moses nan bui u ke, “Kifuuk ngbaan aa ye ke bi kan linyaŋ la, ki mu aa ki ye ke bi san dii bi la, ni ye ilahn le bi gaa ki kpa kifuuk.”

¹⁹ N‑yoonn mu Moses fuu ni linampal ki kan unaajabo aawaal, aan binib ngbaan bi waa liwaal linimbiin ni na, le liŋuul chuu u. Le u di ŋitakpapapan na di lii lijool ngbaan aataab, le ŋi wii.

²⁰ U nan donn unaajabo u bi nan mɔɔ na, le ki san u, u ti kpaln n‑yon, le ki di buun nnyun ni, ki di tii binib ngbaan le bi nyun.

²¹ Le u baa Aaronn ke, “Binib ngbaan ŋa si kinye, aan aa cha bi tun titunwanbir sakpen timina aaboln?”

²² Aaronn nan giin bui u ke, “Uninkpel, taa gee liŋuul m pu; aa nyi binib ngbaan aanimbil aah man ke bi tun ni kaa ŋan na pu na.

²³ Bi bui mi ke, ‘Moses, uma le nan nyan ni timi Ijipt aatiŋ ni, taa nyi tiwan ni ŋa u aan u ti yunn sakpen kina na, nima pu na, ŋa liwaal tii timi.’

²⁴ Le m bui bi ke bi li joo ni salmaa aatafajɔn tiib, le binib bi kpa na joo ni nan tii mi. Le m donn bi mmii ni, ki di ŋa unaajabo ngbaan.”

²⁵ Moses nan kan ke Aaronn le cha binib ngbaan gaa bibaa ki ŋa kijɔrk aatuln, baadim aanimbil ni.

²⁶ Nima chee le u sil mbisamɔb chee le ki teen ke, “Ŋma si Uwumbɔr aachaŋ ni na? Udaan nyan ni ki dan m chee.” Nima pu na, Liifai aamaal nan buen ti sil gbaŋ u.

²⁷ Le u bui bi ke, “Uwumbɔr, u ye nimi Israel yaab Aawumbɔr na bui ke, ‘Nimi bi si uchaŋ ni na di nimi aajaak aajum ki bɔ dii binib bi gur na ni, ki ku nina aabim, ni nijɔtiib, ni nido yaab mɔmɔk.’”

²⁸ Liifai aamaal ngbaan nan kii, le ki ku binib ŋichur ŋitaa liyaadaal ngbaan.

²⁹ Le Moses bui Liifai aamaal ngbaan ke, “Din wee, ni toor nibaa ki mɔk ke ni ye Uwumbɔr aatotoorb, nima le cha ni ku nijapɔtiib ni nina aabim, nima pu na, Uwumbɔr mu ŋa waanyoor ŋa ni pu.”

³⁰ Naah woln kitaak na, le Moses bui binib ngbaan ke, “Ni tun titunwanbir pam. Tɔ, m ga ki gir buen lijool ngbaan paab Uwumbɔr chee; nibaakan, ni ga kan chapinn nimi aatunwanbir pu.”

³¹ Moses nan ki gir buen Uwumbɔr chee ki ti bui ke, “Binib ngbaan tun titunwanbir pam. Bi di salmaa le ŋa liwaal le ki dooni li.

³² Uwumbɔr, di cha pinn bi baatunwanbir; aa yaa kaan ŋa kina kan, chuu ber maayimbil kigbaŋ ki aa ŋmee saanib aayimbil ki ponn ni na.”

³³ Le Uwumbɔr giin bui u ke, “Ni ye binib bi tun titunwanbir m chee na aayimbil le m ga ber maagbaŋ ni.

³⁴ Tɔ, siir ki li cha, ki ti loln binib ngbaan pu nsan, ki buen nin chee m bui si na. Teer ke maatuun ga loln ni pu nsan; tɔ, n‑yoonn choo le m ga daa binib ngbaan aatafal, baatunwanbir pu.”

³⁵ Nima pu na, Uwumbɔr nan daa bitafal ki cha iween i bir na lir bi pu, ba pu? bi nan muk Aaronn le u ti ŋa salmaa aanaajabo aawaal tii bi.