Nnyam 30 - Uwumbɔr aagbaŋ

Baah ga li seer tulalee aayon kitork aabimbiln li paab na aabɔr

¹ “Ni di lisiijal aadɔ ki di ŋa tiwan ni pu ni ga li seer tulalee aayon na.

² Ni li bi likpakpaln, naafɔfɔk li ye ŋisaŋ ŋitaa, naawawaan li ye ŋisaŋ ŋitaa, le naafɔfɔk paacham li ye ŋisaŋ ŋiloob. Naamɔchɔn ŋinaa na, ni nima li ye liwanbaal.

³ Ni di salmaa aakur donn biin ni paacham, ni ŋimɔgben ŋinaa, ni ŋimɔchɔn ŋinaa, ki ŋa salmaa aakuul mann gonn ni.

⁴ Ni ki ŋa salmaa aabuen ilee, ki di baan ŋimɔgben aataab, nin chee idɔ i ni ga li joo yoor u na, ki di i bɔ mu ni.

⁵ Ni di lisiijal aadɔ ki ŋa idɔ ngbaan, ki donn salmaa aakur ŋmeen biin i pu.

⁶ Ni di tulalee aayon aabimbiln ngbaan ki di siin likekeln li gbin Uwumbɔr Aakaal Aadakaa chee na aapuwɔb. M ga dan nima, ni chee.

⁷ Kichakpiik mɔmɔk ni, n‑yoonn mu Aaronn ti dan u nan toor ki gor karyaa tiib na kan, u ti see tulalee aayon mu nu mɔ na nima chee.

⁸ U yaa ki dan u nan see karyaa tiib kijook wɔb kan, u ki ŋa kina. Ni li seer tulalee aayon ngbaan tii mi n‑yoonn mɔmɔk, nibaa taa kiir nimi.

⁹ Ni taa di tulalee aayon mu maa gee na ki di see nima chee, ki taa toor kiwakork aatork, bee njikaabim aatork li pu, ki taa bar ŋisubil aadaan kpir li pu.

¹⁰ Libiln ponn ni kan, Aaronn ti di kiwakork ki u di toor titunwanbir aachapinn na aasin, ki di gbaa ŋimɔchɔn ŋinaa pu nfum mbaa aan ki ŋa li chain. Ŋibin mɔmɔk ni kan, u ti ŋa kina nfum mbaa. Tulalee aayon aabimbiln ngbaan li bi chain, ni di li tii min Uwumbɔr.”

Uwumbɔr aah bi Libool li ponn ni na aalampoo aabɔr

¹¹ Uwumbɔr nan bui Moses ke,

¹² “Tɔ, aa yaa ti kahn Israel yaab ki bee baah bi pu na kan, bi mɔmɔk ga ti pa tipar tii mi, baamɔfal pu, nima kan, falaa ubaa aan dan bi pu buyoonn bi bi kahn bi na.

¹³ Baah kahn bimɔk na ga pa ŋimombil ŋeer baah siin pu na. Bi mɔmɔk pa kina aapiin tii mi.

¹⁴ Baah kahn umɔk aan u fuu ŋibin moninko ki jer na ŋeer u pa kina aamombil tii mi.

¹⁵ Bi yaa ban bi pa ŋimombil ngbaan baamɔfal pu kan, uwankpadaan taa pa jer, ugiin mu taa pa bar.

¹⁶ Ni gaa ŋimombil ngbaan Israel yaab chee, ki li joo toor Maabool li m bi li ponn ni na. Lampoo ngbaan aamombil le ye baamɔfal aapar, le m ga li kii bi.”

Tikumann aakur aasambil

¹⁷ Uwumbɔr nan ki bui Moses ke,

¹⁸ “Di tikumann aakur ŋa lisambil aan li li kpa lipɔtaln, ki li ye tikumann aakur ŋmeen, ki di li siin Libool ni kitork aabimbiln aakaasisik ni, ki ban nnyun ŋa li ponn ni.

¹⁹ Aaronn ni ujapɔtiib ga li joo nnyun ngbaan le finn biŋaal ni bitaa,

²⁰ le ki nin koo Libool ngbaan ni, bee bi nin buen ti toor tijikaar aatork. Nima kan, baan kpo.

²¹ Bi li finni biŋaal ni bitaa, ki taa kpo. Bi ni baamaal li joo nkaal ngbaan ki cha n‑yoonn mu kaa kpa ndoon na.”

Nkpan mu bi joo ŋani Uwumbɔr aanib, ni waawan pu na aabɔr

²² Uwumbɔr nan ki bui Moses ke,

²³ “Di mbaabil ŋi nu mɔ na, ni li ye mir aanyun kuruwaa biloob, ni tiwan ni nu mɔ aan bi yin ni ke sinamonn na kuruwaa bitaa, ni ŋibun aayon kuruwaa bitaa,

²⁴ ni nsupuun mu nu mɔ na kuruwaa biloob. Ni di tiwan ni bi joo ŋaŋni tiwan Maabool ponn ni na ŋaŋ ni mɔmɔk, ki di olif aakpan galaŋ ubaa di kpee,

²⁵ aan ki ŋa maakpan tii mi. Aa di ni mɔmɔk ŋmal tɔb ni ke tulalee na.

²⁶ Aa di mu meen Maabool, ni Maakaal Aadakaa,

²⁷ ni teebul, ni waawan mɔmɔk, ni karyaa tiib aah tɔŋni tiwan ni pu na, ni naawan mɔmɔk, ni tulalee aayon aabimbiln,

²⁸ ni libimbiln li bi seer kitork li paab na, ni laawan mɔmɔk, ni lisambil li bi joo nnyun ŋani ki finni biŋaal ni bitaa na, ni laapɔtaln ni.

²⁹ Ni ŋa tiwan ngbaan mɔmɔk kina aan ni ŋa chain, le unii, bee tiwan taa meeh maawan ngbaan nibaa, see u mu ye chain.

³⁰ Aa di mu kpir Aaronn ni ujapɔtiib aayil pu ki ŋa bi bitotoorb aan bi li tun tii mi.

³¹ Bui Israel aanib ngbaan ke, ‘Maakpan mu bi chain na, ni li joo mu tun lituln kina n‑yoonn mɔmɔk.

³² Ni taa di nkpan ngbaan ki di kpir unii u kaa ye utotoor na pu, ki taa di tiwan nimɔk ni di ŋa nkpan ngbaan na ki di ŋa nkpan muken. Mu ye chain aakpan la, nima pu na, ni li joo mu chain.

³³ Unii ubaa yaa ŋa nkpan ngbaan aaboln, bee u yaa di mu ki di meen unii u kaa ye utotoor na kan, waan ki li ye maanii.’”

Tulalee aayon

³⁴ Uwumbɔr nan ki bui Moses ke, “Ban mbaabil ŋi nu mɔ na. Ŋaayimbil sɔ, stakte, ni onika, ni galbanum, ni frankinsense aatulalee, ki cha ni mɔmɔk li ŋak tɔb.

³⁵ Aa di tiwan ngbaan kpaan ki ŋmal ni ke tulalee na, ki ban n‑yaan ŋa ni ponn ni, ni li bi chain ki taa bii.

³⁶ Aa ban ngem ki san, ni ŋa n‑yon, ki di koo Maabool ponn ni, aan ki ti di ni yɔk Uwumbɔr Aakaal Aadakaa aanimbiin ni. Aa li joo tulalee aayon ngbaan chain.

³⁷ Ni taa di maah mɔk nimi tiwan ni na ŋa tulalee kina aaboln ki li joo nibaa. Ni li joo tulalee aayon ngbaan chain ki di u tii mi baanja.

³⁸ Unii ubaa yaa ŋa tulalee kina aaboln ki joo u kan, waan ki li ye maanii.”