Nnyam 3 - Uwumbɔr aagbaŋ

Uwumbɔr aah yin Moses pu na

¹ Daalbaadaal le Moses nan bi kpaa uchool Jetro, u ye Midiann aatiŋ aatotoor na aawakor timoor ni, le u nan di ti jer nteersakpiin mubaa ni, ki buen Uwumbɔr aajool Sainai chee.

² Nima chee le Uwumbɔr aatuun nan dan u chee, busub bu bi ke bu aah gaal mmii le na ni. Moses nan kan ke mmii gaal, le busub na mu aa nan wun.

³ Le u dakl ke, “Nimina ye lijinjiir aawan la. Ba ŋa mmii aa wun busub ngbaan? M ga buen ti lik.”

⁴ Buyoonn Uwumbɔr kan ke Moses ŋɔŋ mmii ngbaan chee na, le u yin u mmii ngbaan ni ke, “Moses, Moses.” U nan kii ke, “M sɔ.”

⁵ Le Uwumbɔr bui u ke, “Taa fuu ni mmii ngbaan chee. Chuu takl saanaatak ngbaan; saah si nin chee na ye kitiŋ ki bi chain na la.

⁶ Min le ye aayaajatiib Aawumbɔr, min le ye Abraham, ni Aisak, ni Jakob Aawumbɔr.” Nima pu na, Moses nan biin unimbil pu, kaa nan kaa u lik Uwumbɔr.

⁷ Le Uwumbɔr bui u ke, “M kan maanib aah bi ji falaa Ijipt yaab aaŋaal ponn ni pu na. M ŋun bi wii ki ban unii u ga gaa bi lii na. M nyi baafalaa mɔmɔk aabɔr.

⁸ Nima pu le m sunn ni ki dan ke m nan gaa bi lii, ki nyan bi Ijipt yaab aatiŋ ni, ki tii bi kitiŋ ki ŋan, ki wiir, ki kpa tiwakor aamoŋmɔpaan ni ŋisubil sakpen na; kitiŋ ngbaan le Kanaann yaab, ni Hef yaab, ni Amor yaab, ni Peris yaab, ni Hif yaab, ni Jebus yaab laa bi ki ponn ni na.

⁹ Mbamɔn, m ŋun maanib aah wii pu na, m kan Ijipt yaab aah ŋani bi falaa pu na.

¹⁰ Dandana wee m ban m tun si Ijipt yaab aabɔr chee, nima kan aa ga ŋmaa loln maanib ngbaan pu nsan ki nyan bi kitiŋ ngbaan ni.”

¹¹ Moses nan bui Uwumbɔr ke, “Maa ye nibaa, m ga ŋa kinye ki buen ubɔr chee ki ti nyan Israel yaab Ijipt aatiŋ ni?”

¹² Le Uwumbɔr bui u ke, “M ga li bi aa chee, le buyoonn aa nyan ni bi Ijipt aatiŋ ponn ni na, ni ga li dooni mi lijool lee paab la. Nimina le ga mɔk ke min le tun si.”

¹³ Le Moses giin bui u ke, “M yaa buen Israel yaab chee ki ti bui bi ke, ‘Tiyaajatiib Aawumbɔr le tun ni mi ni chee’ kan, bi ga baa mi ke, ‘Bi yin u kinye?’ Nima pu na, m ga tuk bi kinye?”

¹⁴ Le Uwumbɔr bui u ke, “M ye maah ye u na la. Aa tuk bi ke ‘Baah yin u ke M‑ye‑na le tun ni si.’

¹⁵ Tuk Israel yaab ke min, U‑ye‑na, u ye niyaajatiib Abraham, ni Aisak, ni Jakob Aawumbɔr na le tun ni si bi chee. Bi ga li yin mi kina le n‑yoonn mu kaa kpa ndoon na. Kina le n‑yoonn mu choo na aanib ga li yin mi.

¹⁶ Li cha ki ti kuun Israel yaab aaninkpiib ki bui bi ke min, U‑ye‑na, u ye niyaajatiib Abraham, ni Aisak, ni Jakob Aawumbɔr na, le dan aa chee. Tuk bi ke m dan bi chee le ki kan Ijipt yaab aah ŋani bi falaa pu na.

¹⁷ M dakl ke m ga nyan bi Ijipt aatiŋ ni, nin chee bi ŋani bi falaa na, ki di bi buen kitiŋ ki kpa tiwakor aamoŋmɔpaan ni ŋisubil sakpen na, kitiŋ ki ye Kanaann yaab, ni Hef yaab, ni Amor yaab, ni Peris yaab, ni Hif yaab, ni Jebus yaab aatiŋ na pu.

¹⁸ “Maanib ga pel saah ga bui bi pu na. Le aa di baaninkpiib buen Ijipt yaab aabɔr chee ki ti bui u ke, ‘Uwumbɔr, u ye timi Hiibru yaab Aawumbɔr na, uma le di ubaa mɔk timi. Kina pu na, tii timi nsan ti chuun iwiin itaa ki buen nteersakpiin ponn ni ki ti toor kitork tii Uwumbɔr u ye Tidindaan na.’

¹⁹ M nyi ke Ijipt aabɔr aan tii nimi nsan ni buen, see limukl pii u le u cha ni buen.

²⁰ M ga di maapɔɔn daa Ijipt yaab aatafal, ki ŋa ijawaan aawan baatiŋ ni. Nee aapuwɔb na u ga cha ni buen.

²¹ “M ga cha Ijipt yaab tii si kipak, nima kan, maanib yaa ban bi nya kan, baan li cha iŋaalpeen.

²² Le Israel yaab aapiib mɔmɔk ga mee binaakoontiib bi ye Ijipt yaab, ni bipiib bi koo bi chee ki ye Ijipt yaab na ŋikeken, ni salmaa, ni tikunabr aaleen. Le Israel yaab ga di tiwan nimina peen bijapɔtiib ni bibisatiib aan ki tun Ijipt yaab aawangol buen.”