Nnyam 29 - Uwumbɔr aagbaŋ

Baah ga di kitork aatuln tii Aaronn ni ujapɔtiib pu na aabɔr

¹ “Saah ga ŋa pu ki di kitork aatuln tii Aaronn ni ujapɔtiib aan bi li tun maatuln pu na sɔ. Aa ban unaaja ni ipihja ilee, i taa li kpa iween ibaa.

² Aa di boroboro aayon mu ŋan chain kaa kpa nnyɔk na ŋa boroboro, ki di olif aakpan mu ŋa boroboro ngem, u li bi ke maab na, ki di nkpan gbaa bi.

³ Aa di bi ŋa kibɔɔkuuk ni, ki di tii mi n‑yoonn mu ni ban ni di unaaja ni ipihja ilee na toor kitork tii mi na.

⁴ “Aa di Aaronn ni ujapɔtiib dan nnimbiin ni, Maabool aabisamɔb chee, ki nan fu bi nnyun.

⁵ Aa di utotoor aawanpeenkaan ni ye libɔkul, ni kibiŋ aakekengeŋ, ni libɔkul li kaa kpa iŋaal na, ni kikpalk ki u ga di peen libɔkul ngbaan taab na, ni ligbapapaln na, ki di peen Aaronn.

⁶ Aa di kiyikpupuk na chiŋ u, ki di tiwanyaan ni mɔk ke Uwumbɔr le lee u na buu tam kiyikpupuk na,

⁷ ki di nkpan kpir uyil pu, ki ŋa u utotoor.

⁸ “Aa li joo ni ujapɔtiib mu ki di ŋibɔkul peen bi,

⁹ ki di ŋitan buu bichaŋ ni, ki ki di ŋitan buu biyil. Kina le aa ga kaan Aaronn ni ujapɔtiib bi li tun kitork aatuln. Bi ni biyaabitiib ga li tun kitork aatuln tii mi kina, le ki cha n‑yoonn mu kaa kpa ndoon na.

¹⁰ “Aa di unaaja ngbaan dan nnimbiin ni, Maabool aabisamɔb chee, aan ki cha Aaronn ni ujapɔtiib di biŋaal paan uyil pu.

¹¹ Kɔr unaaja ngbaan nnimbiin ni, Maabool aabisamɔb chee.

¹² Aa teŋ waasin ngbaan, ki di aaŋanbik tuu nsin ngbaan, ki di ŋa kitork aabimbiln na aamɔju inaa na pu, ki di mu gur na kpir libimbiln ngbaan taab.

¹³ “Ni paa na, aa nyan u ponn ni aakpan, ni lipɔɔl nin chee ŋan na, ni ŋipɔɔkpeebil, ni nkpan mu paa ŋi pu na, ki di see mmii ni, kitork aabimbiln paab, ki tii mi.

¹⁴ Aa di waanann, ni ngban, ni ponn ni aawan, ki di nya lipaal ki ti see ni mmii. Ipiin i ga cha m cha pinn bitotoorb ngbaan aatunwanbir na le na.

¹⁵ “Nyan upihja ubaa ki cha Aaronn ni ujapɔtiib di biŋaal paan uyil pu.

¹⁶ Kɔr u, ki teŋ waasin, ki di mu mee kpir kitork aabimbiln ngbaan aapepel ŋinaa pu,

¹⁷ ki geei waanann ŋichek ŋichek, ki finn uponn ni aawan mɔmɔk, ni ŋitaa, ki di paan uyil ni tinann na pu,

¹⁸ ki see upihja ngbaan aanann mɔmɔk libimbiln ngbaan paab, aan ni li ye tijikaar aapiin aatork tii mi. Kitork ngbaan aanunun mɔ m chee.

¹⁹ “Aa di upihja uken na, u aa ga di toor ki ŋa bitotoorb na, aan ki tuk Aaronn ni ujapɔtiib ke bi di biŋaal paan uyil pu.

²⁰ Kɔr u, aan ki di waasin ngem ŋa Aaronn ni ujapɔtiib aaŋangii aatafalan ni, ni biŋangii aaŋanbijam pu, ni biŋangii aataŋanbijam pu, ki di nsin mu gur na kpir libimbiln ngbaan aapepel ŋinaa ngbaan pu.

²¹ Aa ban nsin mu bi libimbiln ngbaan pu na ngem, ni olif aakpan na mu ngem, aan ki yɔk Aaronn ni ujapɔtiib aawanpeenkaan pu. Nima kan, uma, ni waabim, ni baawanpeenkaan ga li ye min yaan la.

²² “Aa gii nyan upihja ngbaan aakpan, ni ujuul aakpan, ni uponn ni aakpan, ni lipɔɔl nin chee ŋan na, ni ŋipɔɔkpeebil, ni ŋaakpan, ni ŋŋangii aataajal;

²³ ki nyan boroboro u bi kibɔɔkuuk ni, ni di u tii mi na, nyan boroboro kpiln libaabaa: nyan boroboro kpiln li bi di olif aakpan ŋa li na libaa, ni baah kaa di olif aakpan ŋa li na mu libaa, ki nyan maab ubaa mu.

²⁴ Aa di tijikaar ngbaan ŋa Aaronn ni ujapɔtiib aaŋaal ni, ki tuk bi ke bi di ti ŋa kitorkpaan tii mi,

²⁵ aan aa ki gaa ti bi chee, ki di paan kitork ki bi kitork aabimbiln na paab ki see ti mmii, ni li ye tijikaar aatork aapiin tii mi. Kitork ngbaan aapiin aabaan nu mɔ m chee.

²⁶ “Chuu nyan upihja ngbaan aabingbaal ki di tii mi, ni li ye kitorkpaan. Libingbaal aanann tee le ga li ye si yaan.

²⁷ “N‑yoonn mu ni kaan utotoor u li tun tii mi na, upihja u ni ga ti di toor kitork na, ni di libingbaal ni litaajal tii mi, ni li ye kitorkpaan. Bitotoorb le yeh tinann ngbaan.

²⁸ N‑yoonn mu maanib ti toor kimɔbaan aatork tii mi na, bitotoorb le yeh kiwakork ngbaan aabingbaal ni litaajal. Min le siin kina, kaan kpeln maalandak. Binib ngbaan aapiin i bi tii min Uwumbɔr na le na.

²⁹ “Aaronn yaa ti kpo buyoonn na kan, ni di waatork aawanpeenkaan di tii waabim, aan bi yaa ti kaan bi bitotoorb kan, bi li joo peeni.

³⁰ Aaronn aajapɔɔn u ga kal waajal pu, ki li ye utotoor, ki ga li koo chain aapepel ni, nnimbiin ni na kan, u di utotoor aawanpeenkaan peen ki ti saa iwiin ilole.

³¹ “Aa nyan upihja u ni di toor kitork ki kaan Aaronn ni ujapɔtiib na, ki ŋaan ti lipepel li bi chain na ni.

³² Bi kpaan ŋmɔ tinann ngbaan, ni boroboro u gur kibɔɔkuuk ni na, Libool ngbaan aabisamɔb, nnimbiin ni.

³³ Bi ki ŋmɔ kiwakork ki bi di toor chapinn aatork na aanann. Bitotoorb baanja le ŋeer bi ji tijikaar ngbaan, ba pu? ti ye chain aajikaar la.

³⁴ Tinann ni tijikaar ngbaan ngem yaa gur ki woln kitaak kan, ni di ti see mmii, ni taa ki ji ti, ba pu? ti ye chain la.

³⁵ “Aa di iwiin ilole toor Aaronn ni ujapɔtiib bitotoorb aatork, ke maah mɔk si pu na mɔmɔk.

³⁶ Idaa mɔmɔk kan, aa ti kɔr unaaja ubaa ki toor chapinn aatork. Nima le ga cha kitork aabimbiln ngbaan ŋa chain, le aa nin di olif aakpan meen li, li ŋa min Uwumbɔr yaan.

³⁷ Idaa mɔmɔk kan, aa ti ŋa kina ki ti saa iwiin ilole, aan nima kan, libimbiln ngbaan ga ŋa chain kookoo, le unii, bee tiwan, taa meeh li, see u mu ye chain.

Baah ga toor kitork tii Uwumbɔr iwiin mɔmɔk pu na

³⁸ “N‑yoonn mu choo na, iwiin mɔmɔk, ni li joo libiln libaa aapiih ilee toor kitork, libimbiln paab tii mi.

³⁹ Ni di ubaa toor kichakpiik ni, aan ki nan di uken mu toor kijook.

⁴⁰ Ni yaa ban ni di njan aapiih toor kan, ni ban boroboro aayon mu ŋan na kuruwaa ubaa, ki di olif aakpan kpalba ubaa buun mu. Ni bar ŋisubil aadaan kpalba ubaa mu ki di ŋa ipiin ngbaan.

⁴¹ Kijook kan, ni di upiih uken na toor kitork, aan ki ban boroboro aayon, ni nkpan, ni ŋisubil aadaan, ki ŋa ke naah ba ŋa kichakpiik ni pu na. Ni yaa ŋa kina kan, ni ye tijikaar aatork aapiin le ki tii min Uwumbɔr, le naabaan nu mɔ m chee.

⁴² N‑yoonn mu choo na, ni li seer ipiin aatork ngbaan mmii ni ki tii mi, nnimbiin ni, Libool na aabisamɔb chee. Nima chee le m ga pii maanib, ki len aa chee tibɔr.

⁴³ Nima chee le m ga pii maanib, Israel yaab, le maawiihn mu moor lak lak na ga ŋa nima chee chain.

⁴⁴ M ga ŋa Libool, ni kitork aabimbiln ngbaan chain. M ga nyan Aaronn ni waabijabim le bi li ye maatotoorb.

⁴⁵ M ga li bi maanib Israel yaab chee, ki li ye Baawumbɔr,

⁴⁶ le bi ga bee ke min le ye Bidindaan Uwumbɔr u nyan ni bi Ijipt aatiŋ ni na, nima kan, m ga ŋmaa li bi bi chee. Min le ye Bidindaan Uwumbɔr.