Nnyam 28 - Uwumbɔr aagbaŋ

Bitotoorb aawanpeenkaan aabɔr

¹ “Kuun aakpel Aaronn ni ujapɔtiib, Nadab, ni Abihu, ni Eleasar, ni Itamar. Yakr bi Israel yaab biken chee, nima kan, bi ga li tun kitork aatuln tii mi.

² Ŋal bitotoorb aawanpeenkaan ki tii Aaronn, ni li ŋan ki nyuŋ u.

³ Yin bikpaluub bi m tii bi nlan na, ki tuk bi ke bi ŋal tiwanpeenkaan tii Aaronn, nima kan, aa ga di u ŋa utotoor ki tii mi, ke u tun maatuln mɔmɔk.

⁴ Tuk bi ke bi ŋal kikekengeŋ ki ŋeer ubiŋ pu, ki ŋal libɔkul li kaa kpa iŋaal na, ni kikpalk nyaan, ni kibɔkugeŋ ki bi di seerkaa gbaŋ ki na, ni kiyikpupuk, ni kikekengeŋ ki bi joo buu kichaŋ ni na. Bi ŋal bitotoorb aawanpeenkaan aawan nimina mɔmɔk ki tii aakpel Aaronn ni ujapɔtiib, nima kan, bi ga li ye binib bi toor kitork tii mi na.

⁵ Bikpaluub ngbaan di tikokonbɔnn, ni nsiin, ni timann, ni salmaa aakokonn, ni ŋitanyaan, ki ŋal baawanpeenkaan mɔmɔk.

⁶ “Bi di tikokonbɔnn, ni nsiin, ni timann, ni salmaa aakokonn, ni ŋitanyaan, ki di ŋa libɔkul li kaa kpa iŋaal na, ki gbaŋ mann goln ŋimɔgben mɔmɔk.

⁷ Bi ŋal ŋibɔgbin aaŋminju ilee, ima le bi ga li joo gbei.

⁸ Bi di ŋitanyaan ngbaan ki ŋal ligbapapaln, ki di dab libɔkul ngbaan aan ni ŋa liwanbaal.

⁹ Ban ŋitakpanyaan ŋilee aan ki ŋmee Jakob aabijabim kipiik ni bilee na aayimbil paan ŋi pu,

¹⁰ ki dii baabin aah ye pu na, ni ŋmee ŋiyimbil ŋiloob libaa pu, ki ŋmee ŋiloob mu liken pu.

¹¹ Aa ban kan unii u ŋmaa kpii ŋitakpanyaan mbamɔm na, aan u ŋmee Jakob aabijabim ngbaan aayimbil paan ŋi pu, ki di ŋi tam salmaa pu.

¹² Aa di ŋi tam iŋminju ilee na pu, ni mɔk Israel yaab aanibol, inaakɔsamɔi kipiik ni ilee na, aan Aaronn ga li pee baayimbil ngbaan ubɔgbiln pu, nima kan, min Uwumbɔr ga li teer maanib bɔr.

¹³ Ni di salmaa ŋa tiwan ngbaan nilee,

¹⁴ ni tikululn tilee ki mur ti tam tɔb, ki di dab salmaa aawan ngbaan.

Kibiŋ aakekengen aabɔr

¹⁵ “Aa ŋa kibiŋ pu aakekengeŋ aawan ki tii Utotoorninkpel aan u li joo mɔk Uwumbɔr aageehn. Aa di waabɔkul li kaa kpa iŋaal na aakekeln aaboln ki di ŋal ubiŋ pu yaan ngbaan mu, ki gbaŋ goln nimɔgben.

¹⁶ Ni li bi likpakpaln, ki kpab ni nfum mulee, naafɔfɔk li ye lisaŋ ni ligeln, le naapepeen mu li ye lisaŋ ni ligeln.

¹⁷ Aa di ŋitakpanyaan ŋitaa lur nfum munaa pu, ki tam kikekengeŋ ngbaan pu; aa di litakpanyaan mamaln li bi yin li ke rubi na, ni litakpanyaan li waa chain aan bi yin li ke topas na, ni litakpanyaan mamaln li waa chain, li bi yin li ke ganet na, ki di lur njan aakuul pu;

¹⁸ ki di litakpanyaan li ye liŋaankal aan bi yin li ke emeral na, ni litakpanyaan li bɔn timm aan bi yin li ke safir na, ni litakpanyaan li moor aan bi yin li ke diamonn na, ki di lur lelee aakuul pu;

¹⁹ ki di litakpanyaan li ye liŋaankal ki bɔn timm aan bi yin li ke tukois na, ni litakpanyaan li bi yin li ke agate na, ni litakpanyaan li man chaun aan bi yin li ke ametis na, ki di lur taataa aakuul pu;

²⁰ ki di litakpanyaan li bi yin li ke beril na, ni litakpanyaan li bi yin li ke kaneliann na, ni litakpanyaan li ye nkonyon, bi yin li ke jaspa na, ki di lur nanaa aakuul pu. Aa di ŋi mɔmɔk tam salmaa pu.

²¹ Ŋitakpanyaan kipiik ni ŋilee ŋee pu, ni ŋmee Jakob aabijabim kipiik ni bilee na aayimbil paan ŋi pu, aan ni mɔk Israel yaab aanibol.

²² Aa ŋa salmaa aakululn ti mur ke iŋmin na.

²³ Aa ŋa salmaa aabɔmbim mulee, aan ki di mbɔmbim ngbaan ŋal dab kibiŋ aakekengeŋ ngbaan aapaacham aamɔju ilee,

²⁴ ki di salmaa aakululn tilee ngbaan ki di ŋal dab mbɔmbim mulee ngbaan,

²⁵ ki di imɔju ilee ngbaan ki di tam ŋitakpanyaan ŋilee na aah dab libɔgbiln aaŋmin ilee i pu na,

²⁶ ki ŋa salmaa aabɔmbim mulee mu, ki di dab kibiŋ aakekengeŋ ngbaan aaponn ni aataab aamɔju ilee i bi libɔkul li kaa kpa iŋaal na chee.

²⁷ Aa ki ŋa salmaa aabɔmbim mulee kpee, aan ki di mu ŋal dab libɔkul ngbaan aabɔgbiln aaŋminju aataab, nimbiin ni wɔb, ki duun baah ŋal dab nin chee na, ligbapapaln na aapaacham.

²⁸ Aa di ŋŋmimurkoo mu bɔn timm na, ki di gbin kibiŋ aakekengeŋ na, ni libɔkul na aabɔmbim, aan nima kan, kibiŋ aakekengeŋ ngbaan li baa ligbapapaln na aapaacham ki taa sɔkr.

²⁹ “N‑yoonn mu Aaronn ti ban u koo Chain Aapepel ni na, u ga li pee kibiŋ aakekengeŋ ki ni ŋmee Israel yaab aanibol aayimbil ki paan ŋitakpanyaan na pu na, nima kan, min Uwumbɔr ga li teer maanib bɔr.

³⁰ Aa di tiwan ni bi yin ni ke Urim ni Tumim na ki di ŋa kibiŋ aakekengeŋ ngbaan aakpalɔŋ ni, aan nima kan, Aaronn ga li joo ni n‑yoonn mu u ti dan nnimbiin ni na. N‑yoonn mumɔk u choo nnimbiin ni na kan, u li pee kibiŋ aakekengeŋ ngbaan, nima kan, u ga ŋmaa bee maageehn ki tuk Israel yaab.

Bitotoorb aawanpeenkaan niken aabɔr

³¹ “Kikpalk ki u ga di peen libɔkul li kaa kpa iŋaal na taab na, ni di ŋitan ŋi bɔn timm na ŋal ki.

³² Kikpalk na li kpa uyil aah ga jer nin chee na, ni gbaŋ mann goln uyil yaan ngbaan aan ni taa kar.

^33-34 Aa di upiih aakur ti man chaun ki bɔn timm, ni nsiin, ni timann, ki buu ti nkokon, ki di ni ni salmaa aabɔluln ki di tuun char tɔb ni, ki mann goln kikpalk ngbaan aataab.

³⁵ Aaronn yaa ti ban u toor kitork tii mi kan, u di peen. N‑yoonn mu u ti dan nnimbiin ni Chain Aapepel ni na, bee u yaa chaa nya kan, ŋibɔlun ngbaan ga li weeni aan m ŋun, nima kan, waan kpo.

³⁶ “Aa di salmaa ŋmeen ki ŋa tiwanyaan, ki ŋmee ni pu ke ‘Uwumbɔr yoo’,

³⁷ ki di litaln li bɔn timm na buu tiwan ngbaan ki di jɔn Aaronn aayikpupuk na, uyigbeer pu.

³⁸ Aaronn di kiyikpupuk ngbaan chiŋ aan tiwanyaan na li jɔn uyigbeer pu, nima kan, min Uwumbɔr ga gaa Israel yaab aapiin i Aaronn ga di dan m chee na, hali binib ngbaan yaa galn baah ban bi tii ipiin pu na kan, m ga gaa i.

³⁹ “Aa di tikokonn nyaan ki luu Aaronn aabɔkul, ki di ŋitanyaan ŋa kiyikpupuk, ni kikekengeŋ ki bi joo buu kichaŋ ni na, ki gbaŋ mann goln umɔgben.

⁴⁰ “Aa ŋa ŋibɔkul, ni kichaŋ aakekengen, ni tiyikpupur, ki tii Aaronn aabijabim, bi li kpa kipak ni kinyaan.

⁴¹ Aa di tiwanpeenkaan ngbaan ki di peen aakpel Aaronn ni waabijabim, ki nyan bi siin ki di olif aakpan kpir bi pu, aan bi li ye bitotoorb.

⁴² Aa ŋal ŋitanyaan aatuutagen tii bi, bi li fɔk ki ti saa bitaŋaayil mɔk, nima kan, baan di bibaa mɔk binib.

⁴³ Aaronn ni ujapɔtiib yaa ban bi dan nnimbiin ni, bee bi yaa ban bi koo Chain Aapepel ni, bi nan ŋa kitork aatuln kan, bi ga yiin tiwanpeenkaan ngbaan la, aan nima kan, baan li kpa ngalm ki kpo. Aaronn ni uyaabitiib mɔmɔk ga li joo nkaal ngbaan kina, le ki cha n‑yoonn mu kaa kpa ndoon na.