Nnyam 27 - Uwumbɔr aagbaŋ

Kitork aabimbiln

¹ “Ni di lisiijal aadɔ ŋa kitork aabimbiln. Ni ŋa li likpakpaln, laafɔfɔk kitiŋ, ni laawawaan li ŋak tɔb, nfɔfɔk kitiŋ li ye ŋitaa ŋilole ni ligeln, le nwawaan mu li ye ŋitaa ŋilole ni ligeln, nfɔfɔk paacham li ye ŋitaa ŋinaa ni ligeln.

² Ni ŋa ŋimɔchɔn ŋimɔgben ŋinaa mɔmɔk pu, ŋi ni kitork aabimbiln ngbaan li ye liwanbaal, ki di tikumann donn biin ni mɔmɔk pu.

³ Ni ŋa ŋisambil ŋi ni ga li joo nfatan ŋani ŋi ponn ni na; ni ki ŋa ŋichakpaa, ni ŋisambil, ni inanmoon, ki kpee mmii aasambil mu. Ni di tikumann aakur ŋmeen ŋa tiwan ngbaan mɔmɔk.

⁴ Ni di tikumann ŋa kiŋulk, ki ŋa ibuen i ni ga li joo yoor ki na ki baan kimɔgben mɔmɔk.

⁵ Ni di kiŋulk ngbaan taŋ kitork aabimbiln ngbaan aakaasisik ni.

⁶ Ni di lisiijal aadɔ ŋa idɔ ilee i ni ga li joo yoor kitork aabimbiln ngbaan na, ki di tikumann aakur donn biin i pu,

⁷ aan ki di i ŋa ibuen i baa ŋimɔgben pu na, aan ki li joo yoor libimbiln ngbaan.

⁸ Ni di idɔ ŋmeen ŋa libimbiln ngbaan, ki cha li li ye kiloŋ ŋmeen, ni ŋa li ke maah mɔk si pu lijool paab na.

Baah ga gob Uwumbɔr Aabool pu na aabɔr

⁹ “Maah ga li bi Libool li ponn ni na, ni di ŋitanyaan aakekeln gaa tiwan gob li. Ni di ŋitanyaan aakekeln li aafɔfɔk ye ŋitaa nkub ni piiŋmu na, ki di gob ŋŋangii aapepel wɔb,

¹⁰ ki di tikumann aadɔja moninko, ki di chɔɔn tikumann aadɔ moninko i dɔ taab na pu. Idɔja ngbaan li kpa ipigɔrkee i bi di tikunabr ŋa i na i pu.

¹¹ Ni ŋa kina ŋŋangan wɔb mu.

¹² Ni di ŋitanyaan aakekeln li aafɔfɔk ye ŋitaa imonko itaa ni kipiik ni ŋiŋmu na gob liwilir aapepel wɔb, ki di tikumann aadɔja kipiik chɔɔn tikumann aadɔ kipiik i dɔ taab na pu.

¹³ Ni ŋa kina liwipuul wɔb, nin chee mbisamɔb bi na mu.

^14-15 Mbisamɔb ngbaan aaŋangii ni ŋŋangan wɔb li kpa ŋitanyaan aakekeln li aafɔfɔk ye ŋitaa moninko ni ŋilee ni ligeln na, ki di idɔja itata chɔɔn ŋŋangii ni ŋŋangan wɔb aadɔ i dɔ taab na pu.

¹⁶ Mbisamɔb ma kan, ni di likekeln li aafɔfɔk ye ŋitaa piitaa, aan bi di tikokonbɔnn, ni timann, ni nsiin, luu li, ki gbaŋ mann gonn na leen mu pu. Ni di li leen idɔja inaa i chɔɔ idɔ inaa i dɔ taab na pu.

¹⁷ Ni di tikunabr ŋa idɔ i ni ga di punn na, ni yaapigɔrkee mɔmɔk, ki di tikumann ŋa idɔ i dɔ taab na.

¹⁸ Naah ga gob ni pu na aafɔfɔk li ye ŋitaa nkub ni piiŋmu, naawawaan li ye ŋitaa imonko itaa ni kipiik ni ŋiŋmu, naah ga li fɔk paacham pu na li ye ŋitaa ŋilole ni ligeln. Ni di ŋitanyaan ŋa likekeln ngbaan, ki di tikumann ŋa idɔ i dɔ taab na.

¹⁹ Ni di tikumann ŋmeen ŋa tiwan ni mɔmɔk ni joo tun lituln Libool ngbaan ni na, ni laakpaa mu.

Baah ga li joo Uwumbɔr Aabool ni aakaryaa pu na

²⁰ “Moon ki tuk Israel aanib mɔmɔk ke bi li joo ni olif aakpan mu ŋan mbamɔm na, aan ni li joo seer karyaa kijoobɔŋ mɔmɔk.

²¹ Aaronn ni ujapɔtiib le ga di karyaa ngbaan siin Libool li ponn ni m ga li bi na, likekeln li bi Uwumbɔr Aakaal Aadakaa aanimbiin ni na aapuwɔb nima chee. Nnimbiin ni, karyaa ngbaan ga li gaal kijook ki ti saa kichakpiik ni. Israel yaab ni biyaabitiib li joo nkaal ngbaan ki cha n‑yoonn mu kaa kpa aadoon na.