Nnyam 26 - Uwumbɔr aagbaŋ

Uwumbɔr aah ga li bi Libool li ni na aabɔr

¹ “Ni ŋa Libool li bi chain na, nin chee m ga li bi na. Ni di iŋmibɔn, ni iman, ki di luu ŋitanyaan aakeken kipiik ki di gaa Libool ngbaan. Ni gbaŋ ŋi ki naan tiwan ni kpa ifeen na mann gonn ŋikeken ngbaan.

² Ni cha ŋikeken ngbaan li ŋak tɔb, ŋaah ga li fɔk pu na li ye ŋipiikeken ŋilole, ki li pee ki saa lipiikekeln libaa.

³ Ni di ŋikeken ŋiŋmu kpaan ŋal dab tɔb, ki di ŋiŋmu ŋi gur na mu ŋal dab tɔb.

⁴ Ni di ŋikekengen bɔmbɔn ki di ŋa iŋminsarkee ki di kpaŋ igbaan lipaal aatan mɔmɔk pu.

⁵ Ni ŋa iŋminsarkee piiŋmu lipepel libaa, ki ŋa piiŋmu mu lipepel liken.

⁶ Ni ŋa salmaa ŋmeen aapigɔrkee piiŋmu ki di chuu iŋminsarkee ngbaan dab tɔb.

⁷ “Ni di iŋoob aakur aatan aakeken kipiik ni libaa ŋal dab tɔb, ki li joo biini Libool ngbaan pu.

⁸ Ni cha ŋimɔk li ŋak tɔb, ni li ye ŋipiikeken ŋilole ni ligeln aafɔfɔk, ki li pee saa lipiikekeln libaa.

⁹ Ni di ŋiŋmu ki di ŋal dab tɔb, aan ni ŋa likekeln libaa, ki di ŋiloob mu ŋal dab tɔb. Ni kpab liloloob na nfum mulee ki di ŋa Libool ngbaan aabisamɔb.

¹⁰ Ni ŋa iŋminsarkee piiŋmu lipepel libaa, ki ŋa iŋminsarkee piiŋmu mu lipepel liken aamɔgben.

¹¹ Ni di tikumann ŋa ipigɔrkee piiŋmu, ki di lɔk ŋipepel ŋilee ngbaan dab tɔb,

¹² ki di litangeln li gur na ki di leen Libool ngbaan aapuwɔb.

¹³ Ŋikekengen ŋi gur jɔn Libool ngbaan aasikakl na ga li bii li pu la.

¹⁴ “Ni di upihja aagban mu man na, ni ngbanyaan muken ki di biin lipaal wɔb.

¹⁵ “Ni di lisiijal aadɔ ki di ŋa Libool ngbaan aawon.

¹⁶ Ŋikpan ngbaan aafɔfɔk li ye ŋitaa kipiik ni ŋiŋmu, le ŋaawawaan li ye ŋisaŋ ŋinaa ni ligeln, ŋikpan ngbaan li fɔk ki pee ŋak tɔb.

¹⁷ Ŋimɔk li kpa ŋimɔchɔn ŋilelee, aan nima kan, ŋi ga ŋmaa toŋ tɔb pu.

¹⁸ Ni ŋa idɔja ngbaan moninko, ki di ŋa ŋŋangii wɔb,

¹⁹ ki mɔɔ tikunabr aadɔ imonko ilee, ki di ilelee chuu idɔja ngbaan mubaabaa aataab.

²⁰ Ni ŋa idɔja moninko mu ki di ŋa Libool ngbaan aaŋangan wɔb,

²¹ aan ki mɔɔ tikunabr aadɔ imonko ilee, ki di ilelee chuu idɔja ngbaan mubaabaa aataab.

²² Ni ŋa idɔja iloob ki di ŋa Libool ngbaan aawilir, lipuwɔb,

²³ aan ki ŋa idɔja ilee siin ŋigulɔ mɔk ni.

²⁴ Ni di ŋigulɔ aadɔja ngbaan, ni taab aadɔ di dab tɔb ki ti pii paacham mu. Idɔja ilee i bi ŋigulɔ ŋilee na ga li bi kina la.

²⁵ Nima kan, idɔja ngbaan ga li ye iniin, aan ki li kpa tikunabr aadɔ kipiik ni iloob, ilelee li dab joo ndɔja mubaabaa.

²⁶ “Ni ŋa lisiijal aadɔja kipiik ni iŋmu,

²⁷ ni di iŋmu ŋa ŋŋangii ni ŋŋangan wɔb, ki di iŋmu mu ŋa liwilir, lipuwɔb.

²⁸ Kaasisik ni aadɔja, ndɔpuinkoo na, ni di i puin aan i li dan paacham, idɔja na pu, i puin ki nya Libool ngbaan aapepel libaa ki ti saa liken.

²⁹ Ni di salmaa donn biin idɔ ngbaan pu, ki ŋa salmaa aabɔmbim chuu idɔpuinkee aadɔja ngbaan; ni donn salmaa biin i mu pu.

³⁰ Ni ŋa Libool ngbaan maah nan mɔk si pu lijool paab pu na.

³¹ “Ni di ŋitanyaan ŋi bi di tikokonbɔnn, ni timann, ni nsiin luu ŋi na ki ŋa likekeln ngbaan. Ni gbaŋ mann goln li, ki ŋa tiwan ni kpa ifeen na.

³² Ni di li leen lisiijal aadɔ inaa i tok tikunabr aawan ninaa pu na, ki di salmaa donn biin i pu, ki ŋa ipigɔrkee baan i pu.

³³ Ni di likekeln sakpeln ngbaan di leen Libool ngbaan ni, ki yakr li nfum mulee; ni di Uwumbɔr Aakaal Aadakaa u ŋitakpapapan ŋilee bi u ponn ni na, ki di siin likekeln ngbaan aapuwɔb. Likekeln ngbaan le ga yakr Chain Aapepel, ni Chain Chain Aapepel chee.

³⁴ Ni di Uwumbɔr Aakaal Aadakaa ngbaan aabiil biin u pu.

³⁵ Ni di Uwumbɔr aaboroboro aateebul siin ŋŋangan wɔb, Libool ngbaan ni, ki di karyaa tiib aah tɔŋni tiwan ni pu na mu siin ŋŋangii wɔb.

³⁶ “Naah ga dii mbisamɔb mu ki koo Libool ngbaan ni na, ni ŋa ŋitanyaan ŋi ni di tikokonbɔnn, ni timann, ni nsiin luu na, ki di ŋal dab tɔb, ki gbaŋ ŋimɔgben na, aan ki di leen mbisamɔb.

³⁷ Ni di lisiijal aadɔ ŋa idɔja iŋmu, ki di salmaa donn biin i pu, ki di salmaa ŋa ipigɔrkee aawan baan i pu; ki ŋa tikumann aadɔja iŋmu ki di punn mbisamɔb aadɔja ngbaan aataab.